ဝန်းသို ဇူလိုင် ၁၂

စစ်ကိုင်းတိုင်းဒေသကြီး၊ ကောလင်းခရိုင်၊ ဝန်းသိုမြို့နယ်၊ အောင်သိဒ္ဓိဘုန်းတော်ကြီးကျောင်း CBFQ တွင် ဇူလိုင် ၁၁ ရက်က အနံ့ပျောက်သူများနှင့် ၎င်းတို့၏မိသားစုဝင် စုစုပေါင်း (၃၇)ဦးအား မြို့နယ်ပြည်သူ့ကျန်းမာရေးဦးစီးဌာနမှ RDT Test Kit ဖြင့် စစ်ဆေးခဲ့ရာ ဝင်းကြီး (၆)မိုင်မှ ၁ ဦး၊ ပိန္နဲကုန်းကျေးရွာမှ ၁ ဦး၊ သင်တောကျေးရွာမှ ၄ ဦး၊ စက်ဝင်း (၂)ရပ်မှ ၉ ဦး၊ မြို့သစ် (၁)ရပ်မှ ၁ ဦး၊ ဖလဲတန်းရပ်မှ ၁ ဦး၊ မြို့သစ်(၃)ရပ်မှ ၁ ဦး စုစုပေါင်း ကိုဗစ်-၁၉ အတည်ပြုလူနာသစ် ၁၈ ဦး ထပ်မံတွေ့ရှိခဲ့ကြောင်း သိရသည်။

ယင်းအတည်ပြုလူနာများအနက် ဂျိုးတောင်တိုက်နယ်ဆေးရုံ သီးသန့်ကုသလူနာဆောင်တွင် ၄ ဦး၊  မြို့နယ်ပြည်သူ့ဆေးရုံ သီးသန့်ကုသလူနာဆောင်တွင် ၃ ဦး၊ ကျန်အတည်ပြုလူနာ ၁၁ ဦးအား အောင်သိဒ္ဓိဘုန်းတော်ကြီးကျောင်း ဓမ္မာရုံတွင် သီးသန့်ထားရှိ၍ ကုသပေးလျက်ရှိပြီး ဝန်းသိုမြို့နယ်တွင် လက်ရှိအချိန်ထိ ကိုဗစ်-၁၉ ရောဂါပိုး တွေ့ရှိသူ စုစုပေါင်း ၂၁ ဦးရှိပြီ ဖြစ်သည်။

ဝန်းသိုမြို့နယ်တွင် ကိုဗစ်-၁၉ ရောဂါပိုး အတည်ပြုလူနာသစ်များ ဆက်လက်များပြားလာပါက ထားရှိနိုင်ရန်အတွက် မြို့နယ်အားကစားကွင်းနေရာလွတ်တွင် ယာယီဆေးရုံတည်ဆောက်နိုင်ရန် မြို့နယ် ကိုဗစ်-၁၉ ရောဂါ ကာကွယ်ထိန်းချုပ်ရေးနှင့် အရေးပေါ်တုံ့ပြန်ရေးကော်မတီဥက္ကဋ္ဌမှ ဦးစီး၍ ပြင်ဆင်ဆောင်ရွက်လျက်ရှိကြောင်း သိရသည်။

ကျော်မြိုင်