ရန်ကုန် ၈  မေ

ယခုဘဏ္ဍာနှစ် ​ ခုနှစ်လအတွင်း နိုင်ငံသားရင်းနှီးမြှုပ်နှံမှု ကျပ် ၁၂၀၀ ဘီလီယံကျော် ရရှိထားပြီး ယခင်နှစ်ကာလတူနှိုင်းယှဉ်ပါက ကျပ် ၃၀၀ ဘီလီယံကျော် ပိုမိုဝင်ရောက်ခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန(DICA)၏ စာရင်းများအရ သိရသည်။

လက်ရှိ ၂၀၁၉-၂၀၂၀ ဘဏ္ဍာနှစ်၊ အောက်တိုဘာ ၁ ရက်နေ့မှ ဧပြီ ၃၀ ရက်နေ့အထိ နိုင်ငံသားရင်းနှီးမြှုပ်နှံမှု ခွင့်ပြု/ အတည်ပြုပေးခဲ့မှုမှာ နိုင်ငံသားရင်းနှီးမြှုပ်နှံမှုလုပ်ငန်း ၇၃ ခုမှ ရင်းနှီးမြှုပ်နှံမှုပမာဏ ကျပ် ၁၂၅၁၂၂၃ ဒသမ ၉၁၅ သန်း ရရှိထားသည်။

ပြီးခဲ့သည့်  ၂၀၁၈-၂၀၁၉ ဘဏ္ဍာနှစ် ကာလတူတွင် နိုင်ငံသားရင်းနှီးမြှုပ်နှံမှု ခွင့်ပြု/ အတည်ပြုပေးခဲ့မှုမှာ နိုင်ငံသားရင်းနှီးမြှုပ်နှံမှုလုပ်ငန်း ၈၉ ခုမှ ရင်းနှီးမြှုပ်နှံမှုပမာဏ ကျပ် ၈၉၃၉၁၆ ဒသမ ၇၄၀ သန်းသာ ရရှိခဲ့သည်။

ယခုဘဏ္ဍာနှစ်အတွင်း နိုင်ငံသားရင်းနှီးမြှုပ်နှံမှု ခွင့်ပြု/ အတည်ပြုပေးခဲ့သည့် လုပ်ငန်းမှာ ပြီးခဲ့သည့် နှစ်ကာလတူထက်လုပ်ငန်း ၁၆ ခု လျော့နည်းခဲ့သော်လည်း ရင်းနှီးမြှုပ်နှံမှုပမာဏ များလာခြင်းမှာ ရင်းနှီးမြှုပ်နှံမှုပမာဏ ကြီးမားသည့်လုပ်ငန်းများ ဝင်ရောက်လာခြင်းကြောင့်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန(DICA)ထံမှ သိရသည်။

လက်ရှိ ဘဏ္ဍာနှစ် ​ခုနှစ်လအတွင်း နိုင်ငံသားရင်းနှီးမြှုပ်နှံမှု လုပ်ငန်းများအနက် စက်မှုကဏ္ဍတွင် အများဆုံးဖြစ်ပြီး ဒုတိယအများဆုံးလုပ်ငန်းမှာ အခြားဝန်ဆောင်မှုကဏ္ဍ၊ တတိယအများဆုံးလုပ်ငန်းမှာ ဟိုတယ်နှင့်ခရီးသွားကဏ္ဍတို့ဖြစ်ကာ အိမ်ရာအဆောက်အအုံ တည်ဆောက်ဖွံ့ဖြိုးမှုကဏ္ဍ၊ လယ်ယာကဏ္ဍ၊ သတ္တုတူးဖော်ရေးကဏ္ဍ၊ ရေနံနှင့် သဘာဝဓာတ်ငွေ့ကဏ္ဍ၊ မွေးမြူရေးနှင့်ရေးလုပ်ငန်း ကဏ္ဍနှင့် လျှပ်စစ်ဓာတ်အားကဏ္ဍတို့တွင်လည်း ရင်းနှီးမြှုပ်နှံထားကြောင်း သိရသည်။

Nyein Nyein