အောက်တိုဘာ ၂၅
ယူဂန်ဒါနိုင်ငံအလယ်ပိုင်း မူကိုနိုခရိုင်တွင် ယနေ့ မနက် ၁ နာရီခန့်က စာသင်ကျောင်းတစ်ကျောင်း မီးလောင်မှုဖြစ်ပွားသဖြင့် ကလေး ၁၁ ဦး သေဆုံးကြောင်း ရဲတပ်ဖွဲ့ကပြောကြားသည်။
အဆိုပါမီးလောင်မှုသည် ဆာလာမာမျက်မမြင်ကျောင်းတွင် ဖြစ်ပွားခဲ့ခြင်းဖြစ်ကြောင်း ရဲတပ်ဖွဲ့၏ထုတ်ပြန်ချက်တွင် ဖော်ပြထားသည်။
ထိုမီးလောင်ကျွမ်းမှုဖြစ်ပွားရသည့်အကြောင်းရင်းကိုမသိရှိရသေးသော်လည်း ယခုအချိန်အထိ သေဆုံးသူ ၁၁ ဦးရှိကြောင်း အတည်ပြုသတင်းထုတ်ပြန်ထားသည်။
ထို့ပြင် ခြောက်ဦးသည် အခြေအနေစိုးရိမ်ရပြီး ဟီရိုနာဆေးရုံတွင် ကုသမှုခံယူလျက်ရှိသည်ဟု သိရသည်။
ယူဂန်ဒါနိုင်ငံရှိစာသင်ကျောင်းများတွင် မီးလောင်မှုများဖြစ်ပွားလေ့ရှိကြောင်းနှင့် မြို့တော်ကမ်ပါလာရှိ စာသင်ကျောင်းတစ်ကျောင်းတွင် ဇန်နဝါရီလက မီးလောင်ကျွမ်းမှုကြောင့် ကလေး လေးဦးသေဆုံးခဲ့ကြောင်း ဖော်ပြထားသည်။
နိုင်ငံအလယ်ပိုင်းအထက်တန်းကျောင်းတွင် ၂၀၁၈ ခုနှစ်က မီးလောင်ကျွမ်းမှုဖြစ်ပွားသဖြင့် ကျောင်းသားကိုးဦးထက်မနည်း သေဆုံးခဲ့သည်ဟု သိရသည်။
ကိုးကား-ဆင်ဟွာ
ဘာသာပြန်-မြင့်မြင့်ချို
