မိုးညှင်းမြို့တွင် ဖျားနာကုဆေးခန်း(Fever Clinic)စတင်ဖွင့်လှစ် တစ်ပတ်တွင် (၃)ရက်ဖြင့် ဝန်ဆောင်မှု ပေးသွားမည်

မိုးညှင်း ၂၆ အောက်တိုဘာ

ကချင်ပြည်နယ် မိုးညှင်းခရိုင် မိုးညှင်းမြို့တွင် အောက်တိုဘာလ ၂၆ရက် နံနက်(၉)နာရီကဖျားနာ ကုဆေးခန်း (Fever Clinic)ကို မိုးညှင်းခရိုင် ခုတင်(၁၀ဝ)ဆံ့ ပြည်သူ့ဆေးရုံဝင်းအတွင်းတွင် မနောချို စုကြေးအဖွဲ့၏ ထည့်ဝင်လှူဒါန်းငွေဖြင့် ဖွင့်လှစ်ဆောင်ရွက်ခဲ့ကြောင်း သိရသည်။

အခမ်းအနားတွင် ခရိုင်ဆေးရုံအုပ်ကြီး ဒေါက်တာလာမာမီးက အဖွင့်အမှာစကား ပြောကြားပြီး အဆိုပါ ( Fever Clinic) ဖျားနာကုဆေးခန်းတွင် တာဝန်ခံကြီးကြပ်ဆောင်ရွက်ပေးမည့် ကလေး အထူးကုဆရာဝန် ဒေါက်တာကျော်လှိုင်ထွေးက ယခုဖွင့်လှစ်မည့် ဆေးခန်းသည် ကိုဗစ်-၁၉ ရောဂါ သံသယ လူနာများအပါအဝင် ဖျားနာနေသူများကို စနစ်တကျ ကျန်းမာရေးစောင့်ရှောက်မှုပေးမည့် ဆေးခန်း ဖြစ်ပြီး မည်သူမဆို အသက်အရွယ် ကျား/မ မရွေး လာရောက်ကုသမှု ခံယူနိုင်ပါ ကြောင်း၊ အဓိက အားဖြင့် ကိုဗစ်-၁၉ရောဂါ သံသယလူနာများ ဆေးရုံကြီးအတွင်း ဝင်ရောက်မှု နည်းနိုင်သမျှ နည်းပါးအောင် ယခုလိုဆေးခန်းဖွင့်လှစ်ခြင်းဖြစ်ကြောင်း ရှင်းလင်းပြောကြားသည်။

ဆက်လက်၍ ဆေးခန်းဆောက်လုပ်ခြင်းအတွက် မတည်ငွေကျပ်သိန်း(၁၀ဝ) စိုက်ထုတ်လှူဒါန်း ပေးခဲ့သည့် မနောချိုစုကြေးအဖွဲ့မှ တာဝန်ရှိသူများက အဆောက်အအုံ ပိုင်ဆိုင်မှု စာရွက်စာတမ်းများကို ခရိုင်ဆေးရုံအုပ်ကြီးဒေါက်တာလာမာမီးထံပေးအပ်ခဲ့ကြသည်။

ယခုဖွင့်လှစ်ခဲ့သည် ဖျားနာကုဆေးခန်း(Fever Clinic)ကို ရက်သတ္တတစ်ပတ်လျှင်၃ရက်ဖြင့် (တနင်္လာ၊ ဗုဒ္ဓဟူး၊ သောကြာ) နေ့များတွင် နံနက် ၉နာရီမှ မွန်းလွဲ ၁နာရီအချိန်အထိ ဝန်ဆောင်မှုပေးသွားမည် ဖြစ်ကြောင်း သိရှိရပြီး အခမ်းအနားသို့ ပြည်နယ်လွှတ်တော်ကိုယ်စားလှယ် ဦးတင်အေး၊ ခရိုင်ဆေးရုံ အုပ်ကြီး ဒေါက်တာလာမာမီးနှင့် အခြားဖိတ်ကြားထားသော ဧည့်သည်တော်များ တက်ရောက်ခဲ့ကြောင်း သတင်းရရှိသည်။

ကျော်ကျော်ထွေး(မိုးညှင်း)