ရေကြည် ၁၀ နိုဝင်ဘာ
ဧရာဝတီတိုင်းဒေသကြီး ရေကြည်မြို့နယ်၌ ညဘက်အစာရှာစားသောက်နေသည့် လင်းဝက်ငှက်များကို ၈ တောင်လောက်ရှိ ဝါးလုံးဒုတ်ဖြင့် လိုက်လံရိုက်သတ်ပြီး ရောင်းချလျက်ရှိကြောင်း ဒေသခံများထံမှ သိရသည်။
ဒေသခံများက “ဒေသအခေါ် ဒီလင်းဝက် ငှက်ကလေးတွေက ညဘက်မှအစာရှာစားတဲ့ ငှက်မျိုးဖြစ်တယ် ရေကျတဲ့ အချိန်မှာ ငဝန်တာအပြင်ဘက်နှင့် တာအတွင်းဘက်တွေမှာရှိတဲ့ ရေစပ်ကျင်းနေရာနှင့် အချို့ကုန်းပေါ်နေတဲ့ နေရာမျိုးတွေမှာ ကြွက်တွေငါးတွေကို ရှာစားလေ့ရှိတယ် ငှက်ရှာတဲ့လူတွေအနေနဲ့ မလုပ်သင့်ဘူးလို့ ထင်မိတယ် အခုသူတို့ရှာနေတဲ့ နေရာတွေက မကျည်းလာအုပ်စု၊ပန်းဇံအုပ်စု၊နှောကုန်းအုပ်စုတို့ပိုင်သည့် ငဝန်တာ အပြင်ဘက်ရှိ ကိုင်းကွင်းတွေမှာ လမိုက်ညတိုင်း လင်းဝက်ငှက်တွေကို ရိုက်နေတာဖြစ်တယ်” ဟု ဒေသခံများက ပြောသည်။
လင်းဝက်ငှက် ရောင်းသူတစ်ဦးကို မေးကြည့်ရာ “ကျွန်မကတော့ ဖောက်သယ်ယူရောင်းတာပါ သူတို့ကိုဘယ်လို ရှာတာလဲ မေးကြည့်တော့ ထီးရိုးဝါး၊ ဝါးဖယောင်း ခပ်သွယ်သွယ် ဖြောင့်ဖြောင့် ၈ တောင်တုတ်ပြုလုပ်ပြီး လမိုက်ရက်တွေမှာ လိုက်ရိုက်ရတာ လင်းဝက်ငှက်ကို ရိုက်ရတာ ခြေသံငြိမ်ရတယ် ကိုယ်ခြေထောက်ကို ခြင်ကိုက်နေတာပြန်ရိုက်လို့မရဘူး အသံကြားတာနဲ့ ထပြန်သွားကြတယ် ဒီငှက်တွေက ငါးကောင်တစ်စု ဆယ်ကောင်အများဆုံး တစ်စုနေတတ်ကြတယ် ကိုယ်အကြိုက်ဆုံး ကြီးတဲ့အကောင်ကို ရိုက်ရတယ် တစ်ခါရိုက်ရင် နှစ်ကောင်လောက်ရိုက်လို့ရတယ် လင်းဝက်ငှက် တစ်ကောင်ကို ၁၅၀၀ ကျပ်ဖြင့် ရောင်းရကြောင်း ၎င်းက ပြောပြ၍သိရှိရသည်။
ဆန်းတင့်(ရေကြည်)
