ကသာ၊  ၁၆  ဇန်နဝါရီ

စစ်ကိုင်းတိုင်းဒေသကြီး၊ ကသာမြို့နယ်၊ သပြေပင်ကျေးရွာရှိ မြစိမ်းရောင်လည်ပတ်ရန်ပုံငွေ၏ အတိုးရငွေဖြင့်ဆောင်ရွက်သည့် ကျေးရွာတွင်း သဲကျောက်လမ်းခင်းခြင်းလုပ်ငန်းသည် ရာနှုန်းပြည့် ဆောင်ရွက်ပြီးစီးပြီဖြစ်ကြောင်း ဇန်နဝါရီ ၁၄ ရက်နေ့က တာဝန်ရှိသူများ၏ သွားရောက်စစ်ဆေးချက် အရ သိရသည်။

အဆိုပါကျေးရွာရှိ ၂၀၂၀-၂၀၂၁ ဘဏ္ဍာရေးနှစ်အတွင်းမှ ဆောင်ရွက်သည့် ကျေးရွာတွင်း သဲကျောက်လမ်းခြင်းလုပ်ငန်းသည် မြစိမ်းရောင်လည်ပတ်ရန်ပုံငွေ အတိုးရငွေ၏ ၅၀ ရာခိုင်နှုန်းဖြင့် ကသာခရိုင် ငါးလုပ်ငန်းဦးစီးဌာနမှ တာဝန်ယူဆောင်ရွက်ခဲ့ခြင်းဖြစ်ပြီး  ကျေးရွာ၏ ရွာအဝင် ရွာဦးလမ်းပိုင်းမှ ရွာတွင်းလမ်းပိုင်း အရှည်ပေ ၂၆၄၀ ၊ အကျယ် ၁၄ ပေနှင့် အမြင့်ထု ၆ လက်မရှိသည့် သဲကျောက်လမ်းဖြစ်ကြောင်း၊ ကျေးရွာရှိ ဒေသခံပြည်သူများသည်လည်း အဆင်ပြေစွာ သွားလာရသည့် အတွက် ဝမ်းသာလျက်ရှိကြောင်း သိရသည်။

ကသာခရိုင် ငါးလုပ်ငန်းဦးစီးဌာနမှ ကသာမြို့နယ်၊ စကားကုန်းကျေးရွာအုပ်စု၊ သပြေပင်ကျေးရွာတွင် ၂၀၁၅-၂၀၁၆ ဘဏ္ဍာရေးနှစ်မှစတင်၍ မြစိမ်းရောင်ကျေးရွာစီမံကိန်း လုပ်ငန်းများကို အကောင်အထည်ဖော်ဆောင်ရွက်ခဲ့ပြီး လုပ်ငန်းများလည်ပတ်ဆောင်ရွက်ရာတွင် ပဉ္စမအကြိမ်အထိ အတိုးရရှိငွေကျပ် ၃၄၁ သိန်းကျော်ရရှိရာ အဆိုပါအတိုးရငွေမှ ကျေးရွာဖွံ့ဖြိုးရေး လုပ်ငန်းဖြစ်သည့် သဲကျောက်လမ်းခင်းလုပ်ငန်းကို ဆောင်ရွက်ခဲ့ခြင်းဖြစ်ကြောင်း၊ အဆိုပါကျေးရွာ၌ ယခင်နှစ်များတွင် ကျေးရွာဖွံ့ဖြိုးရေးအတွက် ငွေကျပ် ၂၅ သိန်းတန်ဖိုးရှိ ကျောင်းဆရာ/ဆရာမ နေအိမ်များ တည်ဆောက်ခြင်းနှင့် ငွေကျပ် သိန်း ၃၀ တန်ဖိုးရှိ အ.ထ.က ကျောင်းခြံစည်းရိုး ကာရံခြင်း လုပ်ငန်းများကို ဆောင်ရွက်ပေးခဲ့ပြီးဖြစ်ကြောင်း၊ မြစိမ်းရောင်လည်ပတ်ရန်ပုံငွေ၏ အတိုးရငွေများမှ ကျေးရွာဖွံ့ဖြိုးရေးလုပ်ငန်းများကို ဆက်လက်ဆောင်ရွက်သွားမည်ဖြစ်ကြောင်း သိရသည်။

ရဲအောင်(ကသာ)