ငွေဆောင်၊ ၃၀ ဇန်နဝါရီ
ဧရာဝတီတိုင်းဒေသကြီး ဝန်ကြီးချုပ် ဦးလှမိုးအောင်၊ တိုင်းဒေသကြီး အစိုးရအဖွဲ့ဝင်ဝန်ကြီးများနှင့် တာဝန်ရှိသူများသည် ဇန်နဝါရီ ၃၀ ရက် နံနက်ပိုင်းက ငွေဆောင်မြို့ ဆင်မကျေးရွာရှိ ငရုတ်ကောင်း - ငွေဆောင် -ချောင်းသာ - လမ်းပိုင်းရှိ ရှင်းလင်းဆောင်တွင် ဧရာဝတီတိုင်းဒေသကြီးမှ ရခိုင်ပြည်နယ်သို့ ဆက်သွယ်မည့် (ကမ်းခြေပတ်လမ်း) ဖောက်လုပ်နေမှု အခြေအနေအား ကြည့်ရှုစစ်ဆေးခဲ့သည်။
ရှေးဦးစွာ ဧရာဝတီတိုင်းဒေသကြီး လမ်းဦးစီးဌာနမှ ဦးရန်နိုင်ဇော်၊ ညွှန်ကြားရေးမှူး (မြို့ပြ) က ဧရာဝတီတိုင်း ဒေသကြီးမှ ရခိုင်ပြည်နယ်သို့ ဆက်သွယ်မည့် ငရုတ်ကောင်း - ငွေဆောင် - ချောင်းသာ - ရွှေသောင်ယံ - မကျီးဇင် (ကမ်းခြေပတ်လမ်း) ဖောက်လုပ်နေမှု၊ ကမ်းခြေပတ်လမ်းနှင့် ပတ်သတ်သည့်အခြေအနေများကို ရှင်းလင်းတင်ပြ ခဲ့သည်။
ထို့နောက် ဝန်ကြီးချုပ် ဦးလှမိုးအောင်မှ မိမိတို့ တိုင်းဒေသကြီးသည် ကမ်းခြေအရှည်မိုင် ၂၉၀ ကျော်ခန့်နှင့် ချောင်းသာ - ငွေဆောင်ကဲ့သို့ နာမည်ကျော်ကမ်းခြေ အပန်းဖြေနေရာများကို ပိုင်ဆိုင်လျက်ရှိပြီး အချို့ကမ်းခြေများမှာ လမ်းပန်းဆက်သွယ်ရေး ကောင်းမွန်မှုမရှိသေးသဖြင့် ခရီးသွားပြည်သူများ ရောက်ရှိမှု နည်းပါးလျက်ရှိကြောင်း၊ အစိုးရသစ်သက်တမ်းတွင် ဖောက်လုပ်လျက်ရှိသည့် (ကမ်းခြေပတ်လမ်း-Coastal Road) ပြီးစီးပါက ခရီးသွားလုပ်ငန်းကဏ္ဍ ဖွံ့ဖြိုးတိုးတက်၍ ဒေသခံပြည်သူများ၏ လူမှုစီးပွားဘဝများ ဖွံ့ဖြိုးတိုးတက်လာမည်ဖြစ်ပြီး ဧရာဝတီတိုင်းနှင့် ရခိုင်ပြည်နယ်သို့ သွားလာရေး အဆင်ပြေ ချောမွေ့လာမည်ဖြစ်ကြောင်း၊ တိုင်းဒေသကြီး လမ်းဦးစီးဌာနအနေဖြင့် လမ်းဖွံ့ဖြိုးရေးကဏ္ဍအား ဆက်လက်ကြိုးပမ်း ဆောင်ရွက်သွားစေလိုကြောင်း၊ တိုင်းဒေသကြီးအစိုးရအနေဖြင့်လည်း ပံ့ပိုးဆောင်ရွက်လျက် ရှိကြောင်း၊ ယခုလမ်းအားလည်း ဘဏ္ဍာနှစ်အလိုက် အကောင်အထည်ဖော် ဆောင်ရွက်ပြီး ရေရှည်ထိန်းသိမ်းသွားရန် လိုအပ်ပါကြောင်း လမ်းညွှန်မှာကြားခဲ့သည်။
အဆိုပါကမ်းခြေပတ်လမ်းသည် ဧရာဝတီတိုင်းဒေသကြီး၊ ငရုတ်ကောင်းမြို့မှ ရခိုင်ပြည်နယ် ဂွမြို့အထိ (၉၆ မိုင် ၅ ဒသမ ၅ ဖာလုံ) ရှည်သောလမ်းဖြစ်ပြီး ဧရာဝတီတိုင်းဒေသကြီး ဘက်အပိုင်းတွင်လမ်းအရှည် (၈၆ မိုင် ၂ ဒသမ ၅ ဖာလုံ) ခန့် ရှည်ကြောင်း သိရသည်။
လုပ်ငန်းများပြီးစီးပါက ဒေသခံပြည်သူများအတွက် အလုပ်အကိုင်အခွင့်အလမ်း များစွာပေါ်ပေါက်လာမည်ဖြစ်ပြီး လူမှုစီးပွားဘဝ ဖွံဖြိုးတိုးတက်လာမည်ဖြစ်ကြောင်း သိရသည်။
မူမူသွင်(ပြန်/ဆက်)
