မြင်းမူ ဩဂုတ် ၉
စစ်ကိုင်းခရိုင်၊ မြင်းမူမြို့ တပင်ရွှေထီးရပ်ကွက်တွင် မိသားစုတစ်ပိုင်တစ်နိုင် စားဖိုချောင်သုံးဟင်းသီး/ဟင်းရွက် ကိုယ်တိုင်စိုက်ပျိုးရောင်းချလျှက်ရှိသည့် မိသားစုမှာ ပုံမှန်ဝင်ငွေရရှိလျှက်ရှိကြောင်းသိရှိရသည်။
မိသားစုအနေနဲ့ စားဖိုချောင်သုံး အသီး/အရွက်များကို ရာသီအလိုက် နှစ်ပတ်လည် စိုက်ပျိုးရောင်းချလျှက်ရှိပါကြောင်း၊ ခုနောက်ပိုင်း ကိုဗစ်ကာလဖြစ်တော့ ခြံကိုဖောက်သည် လာရောက်ဝယ်ယူသူတွေများလာကြောင်း၊ ဈေးကိုလည်းထက်ဝက်လျှော့ပြီးဖောက်သည်တွေကိုရောင်းပေးလျှက်ရှိကြောင်း၊ ဖောက်သည်တွေကတစ်ဆင့် မော်တော်ကား၊ ဆိုင်ကယ်၊ စက်ဘီးများဖြင့်ရပ်ကွက်များ၊ ရွာများကိုတစ်ဆင့်ပြန်လည်ရောင်းချကြကြောင်း၊ ခြံအတွင်းစားဖိုချောင်သုံး အသီးအရွက်(၁၀)မျိုးကျော်စိုက်ပျိုးထားပြီး ရောင်းချလျှက်ရှိရာ နေ့စဉ်ငွေကျပ် ၂၅၀၀၀ ကျော်ဝင်ငွေရရှိကြောင်း ခြံပိုင်ရှင်ဦးစိန်ဝင်းထံမှသိရှိရသည်။
မီးဖိုချောင်သုံး အသီး/အရွက်များဖြစ်သည့် ကန်စွန်း၊ ချဉ်ပေါင်၊ ငရုပ်သီးစိမ်း၊ နံနံပင်ခရမ်းသီး၊ ပူဒီနံ၊ ရုံးပတေသီး၊ ကိုက်လံနှင် ဇလတ်ပင်များအပြင် စားသောက်ဆိုင်များမှအများဆုံးဝယ်ယူပြီး ဈေးကောင်းရရှိသည့် အိုးမုန့်ညှင်း၊ မုံ့ညှင်းဖြူ၊ မုန့်ညှင်းချိုပင်များကို စိုက်ပျိုးရောင်းချလျှက်ရှိကြောင်းသိရှိရသည်။
အောင်စိုးဖေ(မြင်းမူ)
