ကျိုက်မရော ဩဂုတ် ၂၈
မွန်ပြည်နယ်ဝန်ကြီးချုပ် ဦးဇော်လင်းထွန်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာ တာဝန်ရှိသူများသည် ယနေ့နံနက် ၉ နာရီက ကျိုက်မရောမြို့နယ်၊ နိတုံကျေးရွာ မိုးစပါး ရေကြီးနစ်မြုပ်ပျက်စီးခဲ့သည့် စပါးစိုက်ခင်းများအတွက် ပြန်လည်စိုက်ပျိုးမည့် တောင်သူများသို့ မျိုးစပါး ၁၄၈၀ တင်း ထောက်ပံ့ပေးအပ်ခြင်း အခမ်းအနား တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်တွင် နှစ်စဉ်မိုးစပါးဧက ခြောက်သိန်း၊ ငါးသောင်းကျော်နှင့် နွေစပါးဧက လေးသောင်းကျော် စိုက်ပျိုးလျက်ရှိကြောင်း၊ ဇူလိုင်လအတွင်း မိုးသည်းထန်စွာ ရွာသွန်းခဲ့မှုကြောင့် ပြည်နယ်တစ်ခုလုံး၏ မြို့နယ် ၇ မြို့နယ်မှာ မိုးစပါး စိုက်ဧက ၄၂၄၃၇ ရေလွှမ်းမိုးခဲ့ပြီး ၉၈၂၅ ဧက ပျက်စီးဆုံးရှုံးခဲ့ကြောင်း၊ ကျိုက်မရောမြို့နယ်အနေဖြင့် ရေနစ်မြုပ်ကာလ ကြာမြင့်ခြင်းကြောင့် စပါးစိုက်ခင်းများ အချိန်မီ ပြန်လည်စိုက်ပျိုးနိုင်ရန် မျိုးစပါးများ ထောက်ပံ့ပေးအပ်ခြင်းဖြစ်ကြောင်း၊ တောင်သူများအနေဖြင့် စိုက်ဧကပြည့်မီရေး၊ အထွက်နှုန်းကောင်းမွန်ရေး ကြိုးပမ်းဆောင်ရွက်ကြရန် ပြောကြားပြီး မျိုးစပါး တင်း ၁၄၈၀ ထောက်ပံ့ပေးအပ်သည်။
ဆက်လက်၍ စိုက်ပျိုးရေးဦးစီးဌာနမှ တာဝန်ရှိသူများကို မိုးစပါးအထွက်နှုန်း တိုးတက်စေရေးအတွက် သဘာဝမြေဩဇာနှင့် ဓါတ်မြေဩဇာကိုပေါင်းစပ်ပြီး အချိုးကျအသုံးပြုနိုင်ရေး၊ ပိုးမွှားရောဂါ ကာကွယ်နှိမ်နင်းရေး နည်းပညာပေး လုပ်ငန်းများကို ထိရောက်စွာ ဆောင်ရွက်ကြရန် မှာကြားကာ တောင်သူများနှင့်တွေ့ဆုံ၍ လိုအပ်သည်များ ပေါင်းစပ်ညှိနှိုင်းသည်။
မွန်ပြည်နယ်တွင် ဩဂုတ်လအထိ မိုးစပါး ၆၆၈၇၄၉ ဧက စိုက်ပျိုးပြီးစီးခဲ့၍ ၉၇ ဒသမ ၁၆ ရာခိုင်နှုန်း စိုက်ပျိုးပြီးဖြစ်ကြောင်း၊ ဇူလိုင်လအတွင်း မိုးသည်းထန်စွာ ရွာသွန်းခြင်း၊ မြစ်ရေလျှံခြင်းတို့ကြောင့် ကျိုက်မရောမြို့နယ်တွင် မိုးစပါး ၁၁၀၆၉ ဧက ရေလွှမ်းမိုးခဲ့ပြီး ၅၅၇၁ ဧက ပျက်စီးခဲ့၍ ပြန်လည် စိုက်ပျိုးနိုင်ရေးအတွက် မျိုးစပါးများကို ထောက်ပံ့ပေးအပ်ခြင်းဖြစ်ကြောင်း သိရသည်။
မြို့နယ်(ပြန်/ဆက်)
