တောင်ငူ အောက်တိုဘာ ၂၉
ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ် စိုက်ပျိုးရေးဦးစီးဌာနက ၂၀၂၁ - ၂၀၂၂ ခုနှစ် မိုးစပါးစံကွက် ရိတ်သိမ်းခြင်းကို အောက်တိုဘာ ၂၉ ရက်က တောင်ငူမြို့နယ် ကံရိုးကျေးရွာအုပ်စု ကွင်းအမှတ် ၅၃၈ (က)၊ ဦးပိုင်အမှတ် (၂၇/၁) တောင်သူ ဦးခိုင်ဦး၏ နှံကောက်အမျိုးအစား စံကွက်၌ ရိတ်သိမ်းခဲ့ရာ တစ်ဧကအထွက် တင်းအစိုချိန် ၁၂၇ တင်း၊ အခြောက်ချိန် ၁၁၅ တင်း ထွက်ရှိကြောင်း သိရသည်။
အဆိုပါ စံကွက်ရိတ်သိမ်းရာသို့ ပဲခူးတိုင်းဒေသကြီး စိုက်ပျိုးရေးဦးစီးဌာနမှ တိုင်းဒေသကြီးဦးစီးမှူး ဦးမျိုးဝင်း ၊ ခရိုင်နှင့် မြို့နယ်ဌာနဆိုင်ရာများ ၊ မြို့နယ်စိုက်ပျိုးရေး ဦးစီးမှူး ဦးနိုင်မင်းလှိုင်နှင့် မြို့နယ် စိုက်ပျိုးမွေးမြူရေးနှင့် ကျေးလက်ဒေသ ဖွံ့ဖြိုးတိုးတက်ရေးကော်မတီ အဖွဲ့ဝင်များ၊ ဌာနဆိုင်ရာများမှ တာဝန်ရှိသူများနှင့် တောင်သူများ တက်ရောက်ကြသည်။
တောင်ငူမြို့နယ်တွင် မိုးစပါးစိုက်ဧက ၅၇၉၈၄ ဧကကို တောင်သူ ၆၇၃၉ ဦးက စိုက်ပျိုးထားရှိရာ အထွက်နှုန်း ကောင်းမွန်စွာ ထွက်ရှိသဖြင့် လာမည့်စိုက်ပျိုးရာသီကာလ၌ တိုးချဲ့စိုက်ပျိုးနိုင်ရေးအတွက် လျာထားဆောင်ရွက်လျက်ရှိကြောင်း မြို့နယ်စိုက်ပျိုးရေးဦးစီးဌာနမှ သိရသည်။
ခရိုင်(ပြန်/ဆက်)
