ပခုက္ကူ   နိုဝင်ဘာ   ၂၃

မကွေးတိုင်းဒေသကြီး၊ ပခုက္ကူမြို့၌ ရက်ကန်းနှင့်အသက်မွေးပညာသင်တန်းကျောင်း (RCC) နှစ်ထပ် သင်တန်း ခန်းမဆောင်အဆောက်အဦတည်ဆောက်မှုလုပ်ငန်းကို ၂၀၂၀ ပြည့်နှစ် ဖေဖော်ဝါရီလ ၄ ရက်မှစတင်ခဲ့ရာ ယခုအခါ ရာနှုန်းပြည့်တည်ဆောက်ပြီးစီးနေပြီဖြစ်ကြောင်း သိရသည်။

သမဝါယမနှင့် ကျေးလက်ဒေသဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန၊ ပခုက္ကူမြို့၊ ရက်ကန်းနှင့် အသက်မွေးပညာသင်တန်းကျောင်းဝင်းတွင် ၂၀၂၀-၂၀၂၁ ဘဏ္ဍာရေးနှစ်၊ ခွင့်ပြုငွေကျပ် ၁၅၁ သန်း ကျော်ဖြင့် အလျား ပေ ၈၀ ၊ အနံ ၃၆ ပေ၊ အမြင့် ၂၄ ပေရှိသည့် ရက်ကန်းနှင့်အသက်မွေးပညာသင်တန်းကျောင်း (RCC) နှစ်ထပ်သင်တန်းခန်းမ ဆောင်အဆောက်အဦကို Best Synergy Construction ကုမ္ပဏီက တာဝန်ယူတည်ဆောက်ခဲ့ရာ ယခုနှစ် နိုဝင်ဘာ ၂၃ ရက်တွင် ရာနှုန်းပြည့်တည်ဆောက်ပြီးစီးနေပြီဖြစ်ကြောင်း၊ နှစ်ထပ်သင်တန်းခန်းမဆောင်အဆောက်အဦတွင် အခန်းပေါင်း ၆ ခန်းပါဝင်ပြီး အလျား ပေ ၃၀ ၊ အနံ ပေ ၃၀ ၊ အမြင့် ၁၂ ပေ အကျယ်အဝန်းရှိသည့် စာသင်ခန်း ၂ ခန်း၊ အလျား ပေ ၂၀၊ အနံ ပေ ၃၀ ၊ အမြင့် ၁၂ပေ အကျယ်အဝန်းရှိသည့် စာသင်ခန်း ၄ ခန်းနှင့် ရေလောင်းအိမ်သာ ၆ ခန်း ပါဝင်ကြောင်း အဆောက်အဦတည်ဆောက်ရေးလုပ်ငန်း တာဝန်ခံအင်ဂျင်နီယာ ဒေါ်ယမင်းသိင်္ဂီထံက  သိရသည်။

အလားတူ ပခုက္ကူမြို့နယ် ကွန်းရွာကျေးရွာတွင် ခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၏ အနီးကြီးကြပ်မှုဖြင့် အလျား ပေ ၇၀ ၊ အနံ ပေ ၆၀ ရှိသည့် ဘက်စုံသုံးမုန်တိုင်းဘေးဒဏ်ခံအဆောက်အဦကိုလည်း ၂၀၂၀ ပြည့်နှစ် ဖေဖော်ဝါရီလမှ စတင်တည်ဆောက်ခဲ့ရာ ယခုအခါ ရာနှုန်းပြည့်ပြီးစီးနေပြီဖြစ်ကြောင်း၊  အဆိုပါ အအောက်အဦ တည်ဆောက်မှုပြီးစီးခြင်းကြောင့် ပခုက္ကူမြို့နယ်၊ ကွန်းရွာကျေးရွာအုပ်စုအတွင်းရှိ ဧရာဝတီမြစ်ကမ်းနံဘေးနှင့် ရေပေါ်ကျွန်းကျေးရွာများဖြစ်သည့် ခြောက်ဦးသား၊ ကျွန်းပုလု၊ မြင်းကျွန်း၊ လက်ပံကျွန်းကျေးရွာတို့တွင် ဧရာဝတီမြစ်ရေကြီးပြီး မြစ်ကမ်းပါးပြိုကျခြင်း၊ ရေဝင်ရောက်ခြင်းနှင့် အခြားသဘာဝဘေးအန္တရာယ်များကြုံတွေ့လာပါက ဘေးကင်းလုံခြုံစွာပြောင်းရွှေ့နေထိုင်နိုင်မည်ဖြစ်ကြောင်း ၎င်းထံက ထပ်မံသိရှိရသည်။

ဆလိုင်းကိုကီး(မဟာဝိဇ္ဇာ)