လွိုင်ကော်   ဒီဇင်ဘာ   ၃၀

ကယားပြည်နယ် ရင်းနှီးမြှုပ်နှံမှုကော်မတီ အစည်းအဝေးအမှတ်စဉ်(၇/၂၀၂၁)ကို ဒီဇင်ဘာ ၃၀ ရက် နံနက်ပိုင်းက ကယားပြည်နယ် အစိုးရအဖွဲ့ရုံး၊ အစည်းအဝေးခန်းမ၌ ကျင်းပရာ ကယားပြည်နယ် ဝန်ကြီးချုပ် ဦးခင်မောင်ဦး၊ ပြည်နယ်စီးပွားရေးရာဝန်ကြီး ဦးစိန်ဦး၊ ပြည်နယ်ဥပဒေချုပ် ဦးကြည်မြိုင်၊ ကယားပြည်နယ် အစိုးရအဖွဲ့  အတွင်းရေးမှူး ဦးအံ့မော်နှင့် တာဝန်ရှိသူများ တက်ရောက်ကြသည်။

ရှေးဦးစွာ ကယားပြည်နယ် ရင်းနှီးမြှုပ်နှံမှုကော်မတီ ဥက္ကဋ္ဌ၊ ပြည်နယ်ဝန်ကြီးချုပ်  ဦးခင်မောင်ဦးက အဖွင့်အမှာစကား ပြောကြားပြီး ကယားပြည်နယ် ရင်းနှီးမြှုပ်နှံမှုကော်မတီ အစည်းအဝေး အမှတ်စဉ် (၆/၂၀၂၁) ဆုံးဖြတ်ချက်မှ ဆောင်ရွက်ပြီးစီးမှု အခြေအနေများကို ပြည်နယ်ရင်းနှီးမြုပ်နှံမှုကော်မတီ အတွင်းရေးမှူး ဒေါက်တာထွန်းထွန်းက ဆွေးနွေးတင်ပြသည်။

ဆက်လက်၍ ပြည်နယ်ရင်းနှီးမြှုပ်နှံမှု ကော်မတီ အတွင်းရေးမှူးက ၂၀၂၁ခုနှစ် ဒီဇင်ဘာလအတွင်း ရင်းနှီးမြှုပ်နှံမှု လုပ်ငန်းများအား မြေပြင်ကွင်းဆင်း ဝန်ဆောင်မှုပေးခြင်းနှင့်စပ်လျဉ်း၍ လည်းကောင်း ၊ ကယားပြည်နယ် ရင်းနှီးမြှုပ်နှံမှုကော်မတီ၏ အတည်ပြုမိန့်ဖြင့် ဟိုတယ်တည်ဆောက်၍ ဝန်ဆောင်မှုပေးခြင်းလုပ်ငန်း ဆောင်ရွက်နေသော လုပ်ငန်းတစ်ခုက တည်ဆောက်မှုကာလ တိုးမြှင့်ခွင့်ပြုပါရန် တင်ပြလာခြင်းနှင့် စပ်လျဉ်း၍ လည်းကောင်း၊ ကိုဗစ်-၁၉ ရန်ပုံငွေမှ ထုတ်ပေးထားသည့် ချေးငွေများ အကျိုးရှိစွာ အသုံးချမှုအပေါ်  စိစစ်ကြပ်မတ်ရေးအဖွဲ့ (ကယားပြည်နယ်)နှင့် ချေးငွေရယူထားသော ကယားပြည်နယ်ရှိ လုပ်ငန်းရှင်များနှင့် ပဉ္စမအကြိမ် တွေ့ဆုံခဲ့မှု အခြေအနေနှင့် စပ်လျဉ်း၍လည်းကောင်း ၊ ကယားပြည်နယ်အတွင်း ရင်းနှီးမြှုပ်နှံမှု ပြုလုပ်နိုင်မည့် မြေယာသတင်းအချက်အလက်များနှင့်စပ်လျဉ်း၍ Land Information Bank တွင် ထည့်သွင်းနိုင်ရေးအတွက် ဆောင်ရွက်မည့် အစီအစဉ်များအား လည်းကောင်း၊ ပြည်နယ်အတွင်းရှိ အလတ်စားအဆင့် ရင်းနှီးမြှုပ်နှံမှုပြုလုပ်ရန် အလားအလာရှိသော မွေးမြူရေးလုပ်ငန်း၊ စက်မှုလုပ်ငန်း၊ ဆိုလာလုပ်ငန်း ဆောင်ရွက်လိုသည့် လုပ်ငန်းရှင်များနှင့် တွေ့ဆုံဆွေးနွေးခဲ့မှု အခြေအနေကို လည်းကောင်း ရှင်းလင်းတင်ပြကြသည်။

ထို့နောက် ကယားပြည်နယ် ရင်းနှီးမြှုပ်နှံမှုကော်မတီ ဥက္ကဋ္ဌ၊ ပြည်နယ်ဝန်ကြီးချုပ် ဦးခင်မောင်ဦး၊  ကယားပြည်နယ် ရင်းနှီးမြှုပ်နှံမှုကော်မတီအဖွဲ့ဝင်၊ ပြည်နယ်စီးပွားရေးရာဝန်ကြီးနှင့် ကယားပြည်နယ် အစိုးရအဖွဲ့ အတွင်းရေးမှူး တို့က လိုအပ်သည်များ ဖြည့်စွက်လမ်းညွှန် မှာကြားခဲ့ကြောင်း သိရသည်။

ခရိုင်(ပြန်/ဆက်)