စဉ့်ကိုင် ဒီဇင်ဘာ ၃၁
မန္တလေးတိုင်းဒေသကြီး၊ စဉ့်ကိုင်မြို့နယ်တွင် ၂၀၂၀-၂၀၂၁ ခုနှစ်၊ မိုးနှောင်းချည်မျှင်ရှည်ဝါ သီးနှံစံပြကွက် ရိတ်သိမ်းပွဲကို ယနေ့ နံနက် ၁၀ နာရီက မီးသွေးဘုတ်ကျေးရွာအုပ်စု၊ နတ်ရေကန်ကျေးရွာရှိ ဧကတောင်သူ ဦးကံတင်၏ ဝါသီးနှံစံပြကွက်တွင် ကျင်းပခဲ့ကြောင်း သိရသည်။
ဝါသီးနှံစံကွက်ရိတ်သိမ်းပွဲတွင် စိုက်ပျိုးရေးဦးစီးဌာန မြို့နယ်ဦးစီးမှူး ဒေါ်စိုးစိုး က စဉ့်ကိုင်မြို့နယ်တွင် ၂၀၂၀-၂၀၂၁ ခုနှစ်၊ မိုးနှောင်းချည်မျှင်ရှည်ဝါ စိုက်ဧက (၅၅၃၉) ဧက စိုက်ပျိုးထားရှိပြီး ဝါသီးနှံစိုက်ပျိုး ထုတ်လုပ်မှု တိုးတက်မြင့်မားရေးနှင့် မျိုးကောင်းမျိုးသန့်များ ကျယ်ကျယ်ပြန့်ပြန့် သုံးစွဲနိုင်ရေးအတွက် အထူးဇုန် ဧက(၂၀၀) စံပြကွက်ကို မီးသွေးဘုတ်ကျေးရွာအုပ်စုတွင် ရွှေတောင်-၁၀ ဝါမျိုးကို F.S မျိုးသန့် အဆင့်ဖြင့် စိုက်ပျိုးထားရှိရာ လာမည့်ဝါစိုက်ပျိုးရာသီတွင် မျိုးစေ့အဖြစ် ပြန်လည်အသုံးပြုနိုင်ရေးအတွက် မျိုးစေ့ထုတ်လုပ်ခြင်းလုပ်ငန်းများကို သက်ဆိုင်ရာဌာန၊ တောင်သူနှင့် ပုဂ္ဂလိကအစီအစဉ်များဖြင့် ဆောင်ရွက် ထားရှိမှုအခြေအနေများကို ရှင်းလင်းပြောကြားခဲ့သည်။
ထို့နောက် ဝါသီးနှံစံပြကွက်ရိတ်သိမ်းခဲ့ရာ ဝါတစ်ဧက ပျမ်းမျှအထွက်နှုန်း (၆၅၁)ပိသာ ထွက်ရှိခဲ့ကြောင်း သိရသည်။
၀င်း၀င်းသန်း(စဉ့်ကိုင်)
