နေပြည်တော် ဇူလိုင် ၂၇

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီး ဌာနနှင့် ရွှေ(ကျေးလက်နှင့် မြို့ပြ) ဖွံ့ဖြိုးတိုးတက်ရေးဘဏ်လီမိတက်(Shwe Bank)တို့ ပူးပေါင်း၍ မြစိမ်းရောင်စီမံကိန်းကျေးရွာ(၉)ရွာတွင် Mobile Financial Payment စနစ်ဖြင့် ချေးငွေထုတ်ယူ နိုင်ရေးသဘောတူ စာချုပ်လက်မှတ်ရေးထိုးပွဲအခမ်းအနားကို  ယနေ့နံနက် ၁၀ နာရီတွင် ရုံးအမှတ်(၃၆)၊ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၌ ကျင်းပသည်။ 

ဦးစွာ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးသိန်းလွင်က အဖွင့်အမှာစကား ပြောကြားသည်။ 

    
ထို့နောက် ရွှေ(ကျေးလက်နှင့် မြို့ပြ) ဖွံ့ဖြိုးတိုးတက်ရေးဘဏ်လီမိတက်(Shwe Bank)မှ တာဝန်ရှိသူတစ်ဦးက ကျေးဇူးတင်စကား ပြောကြားခဲ့ပြီး ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးသိန်းလွင်နှင့် ရွှေ(ကျေးလက်နှင့် မြို့ပြ)ဖွံ့ဖြိုးတိုးတက်ရေး ဘဏ်လီမိတက်မှ အုပ်ချုပ်မှုဒါရိုက်တာ ဦးကျော်သက်ဦးတို့က မြစိမ်းရောင်စီမံကိန်းကျေးရွာ ကိုးရွာတွင် မိုဘိုင်းဖုန်းဖြင့် ငွေကြေးလွှဲပြောင်းခြင်းလုပ်ငန်းဖြင့် ချေးငွေထုတ်ယူနိုင်ရေး ရှေးပြေးဆောင်ရွက်မှုဆိုင်ရာ သဘောတူစာချုပ်အား နှစ်ဦးနှစ်ဖက်လက်မှတ် ရေးထိုးခဲ့ကြသည်။
  

  
လက်မှတ်ရေးထိုးပွဲအခမ်းအနားသို့ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးသိန်းလွင်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများနှင့် ရွှေ(ကျေးလက်နှင့်မြို့ပြ) ဖွံ့ဖြိုးတိုးတက်ရေးဘဏ်လီမိတက် (Shwe Bank)မှ ကိုယ်စားလှယ်များ  တက်ရောက်ခဲ့ကြောင်း သိရသည်။

(သတင်းစဉ်)