မိုင်းခုတ် ဇန်နဝါရီ ၂၄
လားဟူတိုင်းရင်းသားများ၏ ရိုးရာနှစ်သစ်ကူးပွဲတော်ကို ရှမ်းပြည်နယ် (အရှေ့ပိုင်း)၊ မိုင်းဆတ်ခရိုင်၊ မိုင်းခုတ်မြို့အတွင်းရှိ လားဟူတိုင်းရင်းသားများနေထိုင်သော ကျေးရွာများ၌ ပျော်ရွှင်စွာကျင်းပလျက် ရှိကြောင်း သိရသည်။
အဆိုပါ လားဟူနှစ်သစ်ကူးပွဲတော်ကို နှစ်စဉ် တပို့တွဲလဆန်း(၁)ရက်နေ့မှစတင်ကာ (၇)ရက်တိုင်တိုင် ပျော်ရွှင်စွာကျင်းပလေ့ရှိပြီး ထင်းရှူးပင်များအဖူးဖူးသည့်အချိန်၊ ချယ်ရီပန်း၊ မက်မန်းပန်းနှင့် မက်မွန်ပန်းများ အပွင့် ပွင့်သည့်အချိန်တွင် ကျင်းပကြကြောင်းလည်း သိရသည်။
ထိုသို့ နှစ်သစ်ကူးပွဲတော်ကျင်းပချိန်တွင် မိမိထက်သက်ကြီး၊ ဝါကြီးပုဂ္ဂိုလ်များက အေးချမ်းစေကြောင်း အနက်အဓိပ္ပာယ်ဆောင်သည့် လက်ဆေးပေးခြင်းမင်္ဂလာကို ပြုလုပ်ကြပြီး တစ်နှစ်ပတ်လုံး စိုက်ပျိုး၊ မွေးမြူထားသော ဆန်၊ ဟင်းသီးဟင်းရွက်နှင့် တိရိစ္ဆာန်များအား ချက်ပြုတ်၍လည်းကောင်း၊ ကောက်ညှင်းဆန်များအား ခေါပုတ်အဖြစ်သို့ထောင်း၍လည်းကောင်း၊ နှစ်သစ်ကူးပွဲတော်သို့ လာရောက် လည်ပတ်သူများအား တည်ခင်းဧည့်ခံလေ့ရှိပြီး ခေါပုတ်နှင့် ဝက်သားအား နှစ်သစ်ကူးလက်ဆောင်အဖြစ် ပေးအပ်လေ့ရှိကြောင်းလည်း သိရသည်။
ယင်းအပြင် လားဟူတိုင်းရင်းသားကျေးရွာများ၌ ထင်းရှူးပင်၊ ချယ်ရီပန်း၊ မက်မန်းပန်းနှင့် မက်မွန်ပန်းများအား ဝါးတိုင်အထက်တွင်ချည်၍လည်းကောင်း၊ စပါး၊ ကောက်ညှင်းနှင့် အခြားသီးနှံမျိုး စေ့များ ထည့်ထားသည့်တောင်းများအား စားပွဲအထက်တွင်တင်၍လည်းကောင်း မနက်နေထွက်သည်မှ နေဝင်ချိန်အထိ ကျေးရွာနေတိုင်းရင်းသားများနှင့် လာရောက်လည်ပတ်သူများက လားဟူတိုင်းရင်းသားများ၏ အိုးစည်၊ ဗုံမောင်း၊ ပလွေများတီးမှုတ်ကာ ဝိုင်းဝန်းကကြပြီး လိုရာဆုကို တောင်းကြကြောင်းလည်း သိရသည်။
ထိုသို့ပြုလုပ်ခြင်းဖြင့် လားဟူတိုင်းရင်းသားများ၏ ကျန်းမာရေး၊ ပညာရေး၊ စိုက်ပျိုး/မွေးမြူရေး လုပ်ငန်းများ ပိုမိုတိုးတက်ကောင်းမွန်ကာ တိုင်းရင်းသားအချင်းချင်းပိုမိုချစ်ခင်စည်းလုံးမှုရှိသဖြင့် နှစ်စဉ် လားဟူတိုင်းရင်းသားရိုးရာနှစ်သစ်ကူးပွဲတော်ကို ပျော်ရွှင်စွာကျင်းပကြပြီး မိုင်းခုတ်မြို့အတွင်းရှိ နောင်တုံ၊ မိုင်းလုံး၊ ရှုခင်းသာ(၁၊ ၂၊ ၃)၊ ပူကျွဲ(၁၊ ၂)၊ ဝမ်ကောင်း၊ မိုင်းနင်းစသည့် ကျေးရွာများနှင့် ကျေးရွာအုပ်စု အတွင်းရှိ ကျေးရွာများ၌ ပျော်ရွှင်စွာကျင်းပလျက်ရှိကြောင်း သိရသည်။
ယဉ်ယဉ်ဝင်း(ပြန်/ဆက်)
