ပခုက္ကူ ၁၄ ဖေဖော်ဝါရီ    

ပခုက္ကူမြို့ ဟိုတယ်ရိုးမမှ အဓိကကူညီပံ့ပိုးသောမြေလတ်ဧရာ(ဧရာအနောက်)ဖလား ဘောလုံးပြိုင်ပွဲ ဗိုလ်လုပွဲနှင့် ဆုချီးမြှင့်ပွဲကို ဖေဖော်ဝါရီက ၁၃ ရက် ညနေ ၃ နာရီခွဲက ကျင်းပရာ စစ်ကိုင်းတိုင်းဒေသကြီး အသက်(၁၉)နှစ် အောက် လူငယ်အသင်းက ဧရာအနောက်(ပခုက္ကူအသင်း)အား လေးဂိုး နှစ်ဂိုးဖြင့်အနိုင်ရ ဗိုလ်စွဲသွားကြောင်း သိရသည်။

အခမ်းအနားတွင် ပထမဆုရရှိသော စစ်ကိုင်းတိုင်းဒေသကြီး အသက်(၁၉)နှစ်အောက်လူငယ်အသင်းအား မကွေးတိုင်းဒေသကြီး လူမှုရေးဝန်ကြီး ဒေါက်တာခင်မောင်အေး၊ စစ်ကိုင်းတိုင်းဒေသကြီး လူမှုရေးဝန်ကြီး ဒေါက်တာဇော်ဝင်း ၊ ပြည်သူ့ လွှတ်တော်ကိုယ်စားလှယ် ဦးပိုက်ကို၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးခင်ဇော် တို့က တံခွန်စိုက်ဆုဖလားနှင့် ဆုကြေးငွေများ ချီးမြှင့်ပေးအပ်ပြီး ဒုတိယဆုရရှိသော ဧရအနောက် (ပခုက္ကူ) အသင်းနှင့် နေရာအလိုက်အကောင်းဆုံးရရှိသူများကို တာဝန်ရှိသူများက ပေးအပ်ချီးမြှင့်ခဲ့သည်။ 

အဆိုပါ ပြိုင်ပွဲကို ဇန်နဝါရီ ၂၆ ရက်မှ ဖေဖော်ဝါရီ ၁၃ ရက်အထိကျင်းပခဲ့ပြီး ဗိုလ်လုပွဲသို့ မကွေးတိုင်းဒေသကြီး လူမှုရေးဝန်ကြီး ဒေါက်တာခင်မောင်အေး၊ စစ်ကိုင်းတိုင်းဒေသကြီး လူမှုရေးဝန်ကြီး ဒေါက်တာဇော်ဝင်း ၊ ပြည်သူ့လွှတ်တော်ကိုယ်စားလှယ် ဦးပိုက်ကို၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးခင်ဇော်၊ ပခုက္ကူမြို့နယ်အုပ်ချုပ်ရေးမှူး ဦးမြင့်ဆောင်နှင့် ဌာနဆိုင်ရာများ ၊ ဘော်လုံးဝါသနာရှင်များ တက်ရောက်အားပေးခဲ့ကြောင်း သိရသည်။

ဦးတင်အောင်ဝင်း