ဟနွိုင်း အောက်တိုဘာ ၂၄
ဗီယက်နမ်နိုင်ငံသည် ယခုနှစ်အတွင်း အမေရိကန်ဒေါ်လာ ၄ ဒသမ ၂ ဘီလီယံတန်ဖိုးရှိ ကော်ဖီတန်ချိန် ၁ ဒသမ ၇ သန်းကို တင်ပို့ရန် မျှော်မှန်းထားကြောင်း လယ်ယာစိုက်ပျိုးရေးနှင့် ကျေးလက်ဖွံ့ဖြိုးရေး ဝန်ကြီးဌာနကို ကိုးကားပြီး ဗီယက်နမ်သတင်းက အောက်တိုဘာ ၂၃ ရက်တွင် ထုတ်ပြန်ထားသည်။
ဗီယက်နမ်နိုင်ငံ၌ ကော်ဖီတင်ပို့မှုမှ ၄ ဒသမ ၂ ဘီလီယံ ဒေါ်လာသည် ၂၀၃၀ ပြည့်နှစ်တွင် ပို့ကုန် ရည်မှန်းထားသည့် ၆ ဘီလီယံဒေါ်လာအတွက် အခြေခံအုတ်မြစ်တစ်ခုကို ပေးမည်ဖြစ်ကြောင်း သိရသည်။
ယခုနှစ် ပထမကိုးလအတွင်း ဗီယက်နမ်နိုင်ငံသည် ၃ ဒသမ ၁၆ ဘီလီယံဒေါ်လာတန်ဖိုးရှိ ကော်ဖီ တန်ချိန် ၁ ဒသမ ၂၆၆ သန်းကို တင်ပို့နိုင်ခဲ့ကြောင်း အကောက်ခွန်ဦးစီးဌာနမှ သိရသည်။
ဆင်ဟွာ
