နေပြည်တော် မတ် ၁၄
ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ အသိပညာ မြှင့်တင်ရေး ဆွေးနွေးပွဲကို ယနေ့နံနက်ပိုင်းတွင် မြန်မာနိုင်ငံတော်ဗဟိုဘဏ်၌ ကျင်းပသည်။
ဆွေးနွေးပွဲသို့ ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ လုပ်ငန်း အဖွဲ့ ဒုတိယဥက္ကဋ္ဌ အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင် ဦးကျော်ဝင်းသိန်း၊ မြန်မာ နိုင်ငံတော်ဗဟိုဘဏ် ဒုတိယဥက္ကဋ္ဌ ဒေါက်တာလင်းအောင်၊ မြန်မာနိုင်ငံတော်ဗဟိုဘဏ်မှ ညွှန်ကြားရေးမှူးချုပ်များနှင့် အရာထမ်းများ၊ ဘဏ်များ၊ ငွေရေးကြေးရေးကုမ္ပဏီများ၊ ပြည်ပငွေလွှဲ လုပ်ငန်းလိုင်စင်ရရှိသူများ၊ မိုလ်ဘိုင်းငွေရေးကြေးရေးဝန်ဆောင်မှုပေးသူများနှင့် Money Changer များမှ တာဝန်ရှိသူများ တက်ရောက်ကြသည်။
ဆွေးနွေးပွဲတွင် အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင်က မြန်မာနိုင်ငံ၏ ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးနယ်ပယ်တွင် ဆောင်ရွက် ခဲ့မှု လုပ်ငန်းစဉ်များ၊ ငွေကြေးဆိုင်ရာအရေးယူဆောင်ရွက်ရေးအဖွဲ့ (FATF) ၏ အကြံပြုချက်များ အပေါ် အကောင်အထည်ဖော်ဆောင်ရွက်မှု အခြေအနေများ၊ အာရှ-ပစိဖိတ် ငွေကြေးခဝါချမှု တိုက်ဖျက်ရေးအဖွဲ့ (APG) ၏ အဖွဲ့ဝင်နိုင်ငံအဖြစ် ပူးပေါင်းဆောင်ရွက်လျက်ရှိသည့် အခြေအနေ များ၊ မြန်မာနိုင်ငံအနေဖြင့် FATF ၏ ပူးပေါင်းဆောင်ရွက်မှုမရှိသော နိုင်ငံများစာရင်း (NCCT) အပါအဝင် ဆုံးရှုံးနိုင်ခြေမြင့်မားသောနိုင်ငံများစာရင်းမှ လွတ်မြောက်ရေး ကြိုးပမ်းခဲ့မှု အခြေအနေများကို ဆွေးနွေးပြောကြားသည်။
ထို့နောက် မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌက မြန်မာနိုင်ငံတော်ဗဟိုဘဏ် အနေဖြင့် ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးအတွက် ဘဏ်နှင့်ငွေရေးကြေးရေးအဖွဲ့အစည်းများအပေါ် ကြီးကြပ်စစ်ဆေးမှုနှင့် ကြပ်မတ်ကွပ်ကဲမှု ဆောင်ရွက်လျက်ရှိသည့်အခြေအနေများနှင့် AML/CFT ဆိုင်ရာလုပ်ငန်းများကို ပိုမိုထိရောက်စွာ အကောင်အထည်ဖော် ဆောင်ရွက်နိုင်ရန်အတွက် မြန်မာနိုင်ငံတော်ဗဟိုဘဏ်မှဦးဆောင်၍ အထူးစုံစမ်းစစ်ဆေးရေးဦးစီးဌာနနှင့် ငွေကြေးဆိုင်ရာစုံစမ်းထောက်လှမ်းရေးအဖွဲ့ (FIU) တို့ဖြင့် ပူးပေါင်းညှိနှိုင်းပြီး သင်တန်းများသင်ကြားပို့ချခြင်းနှင့် ယခုကဲ့သို့ အသိပညာမြှင့်တင်ရေးဆွေးနွေးပွဲများကို စဉ်ဆက်မပြတ်ဆောင်ရွက်ပေးသွားမည့်အခြေအနေများကို ဆွေးနွေးပြောကြားသည်။
ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ အသိပညာ မြှင့်တင်ရေးဆွေးနွေးပွဲတွင် မြန်မာနိုင်ငံတော်ဗဟိုဘဏ်၊ ငွေကြေးဆိုင်ရာစုံစမ်းထောက်လှမ်းရေး အဖွဲ့နှင့် အထူးစုံစမ်းစစ်ဆေးရေးဦးစီးဌာနတို့မှ အရာရှိကြီးများက ငွေကြေးခဝါချမှုနှင့်အကြမ်းဖက် မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ ကိစ္စရပ်များအပေါ် နားလည်သဘောပေါက်စေရန် အတွက် ဘဏ်နှင့်ငွေရေးကြေးရေးအဖွဲ့အစည်းများကို On-site ကြီးကြပ်စစ်ဆေးရာတွင် အဓိက စစ်ဆေးသည့်အချက်များ၊ ကြိုတင်ကာကွယ်ရေးဆိုင်ရာ ဆောင်ရွက်ချက်များနှင့် သတင်းပို့ရန် တာဝန်များ၊ ဘဏ်များမှ သတ်မှတ်ပမာဏထက်ကျော်လွန်သော သတင်းပေးပို့ချက်များ (TTR) နှင့် သံသယဖြစ်ဖွယ် ငွေကြေးလွှဲပြောင်းဆောင်ရွက်မှုများ (STR)ပေးပို့မှုအခြေအနေများ၊ လူအများအပြား သေကျေစေသော လက်နက်များပြန့်ပွားရေးကို ငွေကြေးထောက်ပံ့မှုတိုက်ဖျက်ရေးဆိုင်ရာ အရေးယူ ပိတ်ဆို့ခြင်းကိစ္စရပ်များ၊ လင်ငင်းရလဒ် (I.O) ၃.၄ နှင့်စပ်လျဉ်း၍ အကောင်အထည်ဖော်ခြင်း ဆောင်ရွက်ချက်များနှင့် ဆက်လက်ဆောင်ရွက်ရမည့်အချက်များ၊ ငွေကြေး သို့မဟုတ် တန်ဖိုးလွှဲပြောင်း ရေးဝန်ဆောင်မှုများ (Money or Value Transfer Services- MVTS) နှင့် ပြည်ပငွေလွှဲလုပ်ငန်း လိုင်စင်ရရှိသူ (Remittance Business License-RBL) များက လိုက်နာဆောင်ရွက်ရမည့်အချက် များအား အသိပညာပေးရှင်းလင်းဆွေးနွေးကြပြီး တက်ရောက်လာကြသူများက AML/CFT ဆိုင်ရာ သိရှိလိုသည့်အချက်များအား မေးမြန်းခြင်းနှင့် သက်ဆိုင်ရာတာဝန်ရှိသူများက ပြန်လည်ဖြေကြားခြင်းတို့ကို ဆောင်ရွက်ခဲ့ကြသည်။
ထို့ပြင် ဆွေးနွေးပွဲတွင် ဘဏ်များ၊ ငွေရေးကြေးရေးကုမ္ပဏီများ၊ ပြည်ပငွေလွှဲလုပ်ငန်းလိုင်စင် ရရှိသူများ၊ မိုဘိုင်းငွေရေးကြေးရေးဝန်ဆောင်မှုပေးသူများနှင့် Money Changer တို့မှ တာဝန်ရှိသူများက ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ သိရှိလိုသည် များကို ပြန်လည်ဆွေးနွေးမေးမြန်းခဲ့ကြပြီး ဆွေးနွေးပွဲကို ရုပ်သိမ်းကြောင်း သတင်းရရှိသည်။
သတင်းစဉ်
