နေပြည်တော် ဧပြီ ၁၂
ဟိုတယ်နှင့်ခရီးသွားလာရေးဝန်ကြီးဌာနတွင် ၁၃၈၅ခုနှစ်၊ မြန်မာ့ရိုးရာယဉ်ကျေးမှု မဟာ သင်္ကြန်ပွဲတော် အကြိုအခမ်းအနားကို ယနေ့မွန်းလွဲပိုင်းတွင် နေပြည်တော်ရှိ ဝန်ကြီးဌာန ကျောက်စိမ်းခန်းမ၌ ကျင်းပသည်။
အခမ်းအနားသို့ ဟိုတယ်နှင့်ခရီးသွားလာရေးဝန်ကြီးဌာန ပြည်တောင်စုဝန်ကြီး ဒေါက်တာ သက်သက်ခိုင်၊ ဒုတိယဝန်ကြီး ဦးဖြိုးဇော်စိုး၊ အမြဲတမ်းအတွင်းဝန်၊ ညွှန်ကြားရေးမှူးချုပ်နှင့် အရာရှိကြီးများ၊ ဝန်ကြီး ဌာနမှ အရာထမ်း၊ အမှုထမ်းများ၊ ဟိုတယ်နှင့်ခရီးသွား အသင်းအဖွဲ့များမှ ဥက္ကဋ္ဌများနှင့် တာဝန်ရှိ ပုဂ္ဂိုလ်များ၊ ဟိုတယ်များမှ တာဝန်ရှိသူများ၊ ဖိတ်ကြားထားသူများ တက်ရောက်ကြသည်။
အခမ်းအနားတွင် ပြည်ထောင်စုဝန်ကြီး ဒေါက်တာသက်သက်ခိုင်က ဝန်ကြီးဌာနရှိ ဝန်ထမ်းများအနေနှင့် ပင်ပန်းမှုများပြေပျောက် စိတ်အပန်းပြေ စေရန်နှင့် နှစ်သစ်ကူးအကြို ပျော်ရွှင်မှုများရရှိစေရန် ယနေ့အခမ်းအနားကို ကျင်းပ ခြင်းဖြစ်ပါကြောင်း၊ ဝန်ကြီးဌာနအနေနှင့် ယခုနှစ် နေပြည်တော် လမ်းလျှောက်သင်္ကြန်တွင် ဝန်ကြီးဌာန၏ မိသားစုသင်္ကြန်မဏ္ဍပ်တစ်ခု ပါဝင်တည်ဆောက်ဆင်နွှဲ သွားမည်ဖြစ်ပြီး စတုဒီသာကျွေးမွေးဧည့်ခံခြင်း၊ ယိမ်းအဖွဲ့ဖြင့် ကပြဖျော်ဖြေခြင်းများ ပါဝင်မည်ဖြစ်သဖြင့် ဝန်ထမ်းမိသားစုများအားလုံး လာရောက်ပါဝင်ဆင်နွှဲ ကြစေလိုပါကြောင်း၊နှစ်သစ်တွင် ယနေ့ အခမ်းအနားကို တက်ရောက်လာကြသူများအားလုံး စိတ်၏ချမ်းသာခြင်း၊ ကိုယ်၏ကျန်းမာခြင်းနှင့် ပြည့်စုံပါစေကြောင်း ဆုမွန်ကောင်းတောင်း စကားပြောကြားသည်။
ထို့နောက် ပြည်ထောင်စုဝန်ကြီးနှင့် ဒုတိယဝန်ကြီးတို့က ဝန်ကြီးဌာန၏ မြန်မာ့ရိုးရာ ယဉ်ကျေးမှု မဟာ သင်္ကြန်ပွဲတော် အကြိုအခမ်းအနားသို့ တက်ရောက်လာကြသူများကို သပြေခက်ဖြင့် နှစ်သစ်ကူး အတာရေစင်ပက်ဖျန်းပေးသည်။
ယင်းနောက် ဝန်ကြီးဌာန၏ သင်္ကြန်ယိမ်းအဖွဲ့က ဟိုတယ်နှင့်ခရီးသွားလာရေးဝန်ကြီး ဌာန သီချင်းဖြင့် ကပြဖျော်ဖြေတင်ဆက်ပြီး ဌာနခွဲများအလိုက် ဝန်ထမ်းများက အဆိုအကများဖြင့် ဖျော်ဖြေတင်ဆက် ကြကာ မြန်မာ့ရိုးရာအစားအစာများဖြင့် စတုဒိသာကျွေးမွေး ဧည့်ခံကြသည်။
ဆက်လက်၍ ပြည်ထောင်စုဝန်ကြီးနှင့် ဒုတိယဝန်ကြီးတို့က ဝန်ကြီးဌာနယိမ်းအဖွဲ့နှင့် အကနည်းပြ ဆရာမကို အမှတ်တရလက်ဆောင်များ ပေးအပ်ချီးမြှင့်ခဲ့ကြောင်း သိရသည်။
(သတင်းစဉ်)
