နိုင်ငံတကာအဖွဲ့အစည်းတွေဆီက အထည်ကြီးပျက်တွေနဲ့ ဂိုက်ဖမ်းပြနေသူတွေထဲမှာ (Myanmar Derangement Syndrome)  လို့ဆိုတဲ့   မြန်မာဆိုင်ရာစိတ်ရောဂါလက္ခဏာစုတွေ ထကြွနေကြပြီး သောင်းကျန်းရမ်းကားနေကြလေရဲ့။ သူတို့ဟာ စက်ဆုပ်ရွံရှာဖွယ်ကောင်းတဲ့၊    ဘဝင်မြင့်နေတဲ့၊ စိတ်ကြီးဝင်ပြီး    အထက်စီးဆန်တဲ့ စိတ်ဓာတ်တွေ အကြီးအကျယ် ကိန်းအောင်းနေတဲ့ သီလကြောင်တွေပါ။ သူတို့ဟာ သူတို့နေထိုင်ရာနေရာကနေ လွန်စွာဝေးကွာလှတဲ့ ဖွံ့ဖြိုးဆဲနိုင်ငံတွေရှိ အသားညို၊ အသားဝါလူမျိုးတွေကို ဗလာချီ ဝေဖန်ထိုးနှက်နေကြသူတွေပါ။ အင်အားကြီးအနောက်နိုင်ငံတွေက သူတို့ရဲ့ “အန်ကယ်တွေ”နဲ့ တွေ့ပြီဆိုရင်တော့ ကုပ်ကုပ်ကလေးရှိနေတတ်ကြသူတွေပါ။

တောင်စဉ်ရေမရ ဝိုင်းအုံဆွေးနွေး

လွန်ခဲ့တဲ့ ဆယ်စုနှစ်ပေါင်းများစွာအကြာက မြန်မာနိုင်ငံမှာ အလုပ်လုပ်ခဲ့ဖူးတဲ့ တစ်ခါက လူတွင်ကျယ် (ယခု အထည်ကြီးပျက်) အချို့ဟာ အငြိမ်းစားယူသွားပြီးတဲ့ အချိန်မျိုးမှာတောင် မြန်မာနိုင်ငံနဲ့ ဝေးဝေးကိုမသွားနိုင်ဘဲ ရစ်သီရစ်သီဖြစ်နေဆဲပါ။ ဒီထဲက အချို့တွေက စစ်ယူနီဖောင်းကြီးတကားကား ဆင်မြန်းပြီးသကာလ မြန်မာနယ်စပ် ဒေသတွေဆီ ပြန်လာကြတယ်။ ဒေါင်းတည်မောင်းတည်ပုံစံမျိုးနဲ့ ခန့်ခန့်ကြီးပါလား ဟရို့။ အချို့ကတော့ မှိုလိုပေါက်အောင် အနောက်တိုင်း မြို့တော်တွေမှာ အတိုင်ပင်ခံလုပ်ငန်းတွေ ဖွင့်စား ကြပြန်တယ်။ မြန်မာနိုင်ငံနဲ့ပတ်သက်ပြီး မပြီးနိုင်မစီးနိုင် တောင်စဉ်ရေမရ ဝိုင်းအုံဆွေးနွေးကြတဲ့ ပွဲတွေ ဟိုနားပေါ်လာလိုက်၊ ဒီနားပေါ်လာလိုက် တသီတတန်းရှိနေပေမယ့် စာရင်းချုပ်လိုက်တော့ အားလုံး မြန်မာနိုင်ငံမှာ ပကတိဖြစ်ပျက်နေတာနဲ့ တက်တက်စင်အောင် လွဲနေတာပါပဲ။

အဲဒီထဲမှာ အချို့ကတော့ အနာဂတ်ကာလ ကန်ထရိုက် ရိုက်စားခွင်တွေရဖို့၊ စားပေါက်စားလမ်းတွေရဖို့ မျှော်မှန်းချက်နဲ့ နေရာယူဖျာခင်း လှုပ်ရှားနေကြတာပါ။ အုပ်စုတစ်စုဆိုရင် “SAC” ဆိုတဲ့ အတိုကောက် ဝေါဟာရစကားစုကိုတောင် ဆင်တူယိုးမှားလုပ်ပြီး သူ့ရဲ့အမှတ်တံဆိပ် လုပ်ထားပါသေးတယ်။ ဒီလိုလုပ်တာဘယ်သူတွေလဲ။ အကြံကုန်လို့ ဂဠုန်ဆားချက်တာလား။

သီလကြောင် (ကြောင်သူတော်)ပါ

ကဲ…ရှေ့ဆက်ပါရစေဦး။ အထူးအစီရင်ခံစာ တင်သွင်းသူအမည်ခံ လူတစ်ဦးဟာ ဝါရှင်တန်ဒီစီရှိ သူ့စခန်းကနေ ဗုံးတွေနဲ့ထုသလို မတော်မတရား စွပ်စွဲချက်တွေနဲ့ လှမ်းလှမ်းပြီး ထုနေလေရဲ့။ သူဟာ သူ့ကိုယ်သူ သီလရှိသူပုံဖမ်းပေမယ့် သီလကြောင် (ကြောင်သူတော်)ပါပဲ။ ဒီလူရဲ့ အပြောအဆို၊ အပြုအမူ တွေကို တရုတ်နဲ့ ရုရှားနိုင်ငံတို့က အာရုံစိုက်ပေးကြ ပါဦးလား။

ရိုးရိုးသားသားဆိုကြပါစို့ရဲ့။ စွမ်းရည်မြင့်တဲ့သူတွေ၊ ဉာဏ်ကြီးရှင်တွေက ရေရှည်မှာ လုပ်သလောက် အကျိုးခံစားခွင့်မရနိုင်တဲ့ ကန်ထရိုက်ကြေးစား လုပ်ကိုင်ပေးရတဲ့ဘဝမျိုးနဲ့ အခုလိုနိုင်ငံတကာအဖွဲ့ အစည်းတွေမှာ ဝင်ရောက်လုပ်ကိုင်လေ့မရှိကြပါဘူး။ သူတို့ဟာ ဘဏ္ဍာရေးဝန်ဆောင်မှုကုမ္ပဏီတွေ၊ ဥပဒေအကျိုးဆောင် ကုမ္ပဏီတွေ၊ ရင်းနှီးမြှုပ်နှံရေး ကုမ္ပဏီတွေ စသည်စသည်ဖြင့် အကျိုးအမြတ် ကြီးမားစွာရနိုင်တဲ့ အလုပ်အကိုင်တွေမှာသာ မျှော်မှန်း လုပ်ကိုင်တတ်ကြတာပါ။

အဲဒီလိုအမြင့်ဆုံးကျွမ်းကျင်သူ ပညာရှင်အဆင့်မှာ မပါဝင်သူတွေကတော့ ငွေရပေါက်ရလမ်း ကြီးမားတဲ့အလုပ်တွေမှာ လုပ်ခွင့်မရကြပေမယ့်လည်း သူတို့ကိုယ်သူတို့ အရေးပါသူဖြစ်သယောင်ယောင်၊ သီလစင်ကြယ်သူ ဖြစ်သယောင်ယောင် လူတွင်ကျယ် ဂိုက်ဖမ်းတတ်ကြတယ်။

သီးခြားကိစ္စရပ်တစ်ခုအနေနဲ့ ဆက်လက် ပြောချင်ပါသေးတယ်။ “စီးပွားရေးပညာရှင်” တစ်ဦး ပါလို့ သူ့ကိုယ်သူ ထုတ်ဖော်ပြောနေတဲ့ လူတစ်ဦး ဟာ လတ်တလောမှာတော့ စာအုပ်တွေ လိုက်ရောင်း နေပါတယ်။

ဒီလူဟာ ဘောဂဗေဒ ဒါမှမဟုတ် ဘဏ္ဍာရေးအကြောင်းရပ်တွေနဲ့ သက်ဆိုင်တဲ့ စာအုပ်စာတမ်းတွေ ဈေးကွက်မှာ အရောင်းထွက်ဖို့ သွက်သွက် လက်လက် လှုပ်ရှားနေပုံရတယ်။ လမ်းကြောင်း အမျိုးမျိုးကတစ်ဆင့် စာအုပ်တွေကို အစွံထုတ်ဖို့ ကြိုးစားနေတဲ့ စီးပွားရေးပညာရှင်ကြီးတစ်ဦးဆိုပါစို့။

ဒီနေရာမှာ ပြည်သူတွေ မေးသင့်တဲ့မေးခွန်း တစ်ခုပေါ်လာတယ်။ ဘယ်လိုအစိုးရမျိုးမဆို နိုင်ငံတော်ရဲ့ လျှို့ဝှက်ကန့်သတ်အဆင့်ရှိတဲ့ သတင်းအချက်အလက်တွေကို ယုံကြည်ရပါတယ်ဆိုတဲ့ အခြားနိုင်ငံသား တစ်ဦးကို ပေးအပ်ဖို့သင့်ပါသလား။ သာဓကဆောင်ရရင် အမေရိကန်နဲ့ ယူကေနိုင်ငံတို့ဟာ နှစ်မြွှာအသည်း မဟာမိတ်တွေဖြစ်ကြတဲ့တိုင်အောင် မိမိနိုင်ငံရဲ့ လျှို့ဝှက်အပ်တဲ့၊ အတိမ်းအစောင်းမခံနိုင်တဲ့ သတင်း အချက်အလက်တွေကို တစ်နိုင်ငံနဲ့တစ်နိုင်ငံ မျှဝေပေးသင့်ပါသလား။ ဥပမာအားဖြင့် အရင်းနှီးဆုံး လုပ်ဖော်ကိုင်ဖက်နိုင်ငံတွေ ဖြစ်တဲ့တိုင်အောင် ယူကေနိုင်ငံသားတစ်ဦးကို အမေရိကန်အစိုးရက သူ့ရဲ့လျှို့ဝှက် စာလွှာစာတမ်းတွေကို ပေးအပ်လိုက်တာမျိုးရှိပါသလား။ မဟာမိတ်နိုင်ငံရဲ့ နိုင်ငံသားတစ်ဦးဖြစ်လို့ဆိုပြီး အမေရိကန် သမ္မတရဲ့ စီးပွားရေးအကြံပေးပုဂ္ဂိုလ်အဖြစ် ခန့်အပ်ပြီး လျှို့ဝှက်အဆင့်ရှိ သတင်းအချက်တွေကို ပေးလို့ရကောင်းပါသလား။ ဒီလိုအခြေအနေမျိုးဆိုက်အောင် လုပ်သင့်လုပ်ထိုက်ပါသလား။

နိုင်ငံခြားသားတစ်ဦးကို ယုံမှတ်ပုံအပ်ခဲ့

ပြောမယုံ ကြုံဖူးမှသိဆိုသလို ကျွန်တော်တို့ မြန်မာနိုင်ငံတစ်နိုင်ငံတည်းမှာပဲ အထက်ဖော်ပြပါ ဖြစ်စဉ်မျိုး ဖြစ်သွားခဲ့တာပါ။ မြန်မာအစိုးရ အဖွဲ့ခေါင်းဆောင်ရဲ့ အထက်တန်းအကြံပေးတစ်ဦးအဖြစ် နိုင်ငံခြားသား တစ်ဦးကို ခန့်ထားခဲ့တာပါ။ သွားလေသူအစိုးရအဖွဲ့ဟာ လုပ်ထုံးလုပ်နည်း စံချိန်စံညွှန်းနဲ့အညီ လုပ်ကိုင်ဘိအလား နိုင်ငံခြားသားတစ်ဦးကို ယုံမှတ်ပုံအပ်ခဲ့တာပါ။ ဥဒါဟရုဏ် ညွှန်းဆိုရရင် လေးစားအပ်ပါသော နိုင်ငံခြားသား စီးပွားရေးပညာရှင်တစ်ဦးဦးကို စင်ကာပူဝန်ကြီးချုပ် ဒါမှမဟုတ် ထိုင်းဝန်ကြီးချုပ်ရဲ့ အကြံပေးပုဂ္ဂိုလ်အဖြစ် ခန့်အပ်ပါ့မလား၊ အနောက်တိုင်းအစိုးရအဖွဲ့ တစ်ရပ်ရပ်ကရော ခန့်အပ်တာမျိုး ကြားဖူးကြပါရဲ့လား၊ နိုင်ငံခြားသားတစ်ဦးကို နိုင်ငံတစ်နိုင်ငံရဲ့ ခေါင်းဆောင်ပိုင်း အတွင်းစည်းထဲအထိ ဝင်ရောက်စေပြီး စီးပွားရေးအကြံပေးအဖြစ်ထားတာမျိုး ဖြစ်နိုင်ပါရဲ့လား၊ သွေးမတော်၊ မျိုးမတူ၊ လူမျိုးခြား တစ်ဦးကို ယုံမှတ်ပုံအပ်ဖို့သင့်ပါရဲ့လား။ ဒီမေးခွန်းကို လူတိုင်းမမေးမြန်းသင့်ဘူးလား။

ဟုတ်သမှသိပ်မှန်လွန်းလှပါတယ်။ မြန်မာနိုင်ငံ မှာ ၂၀၁၅ ခုနှစ်မှ ၂၀၂၀ ပြည့်နှစ်အထိ နိုင်ငံခြားသံရုံးတစ်ရုံးက တာဝန်ရှိသူတစ်ဦးဟာ အစိုးရအဖွဲ့ရဲ့ အစည်းအဝေးအချို့ကို ကိုယ်တိုင်ကိုယ်ကျ တက်ရောက်ခဲ့တယ်ဆိုတာ လူတိုင်းသိနေတဲ့အချက်ပါ။ (သူဘယ်သူလဲဆိုတာကိုလည်း ခင်ဗျားသိပါလိမ့်မယ်။)

ရိုးရိုးကျင့် မြင့်မြင့်ကြံကြပါ ပြည်သူအပေါင်းတို့။ ။

{ ၂၂-၇-၂၀၂၄ ရက်နေ့ထုတ် The Global New Light of Myanmar သတင်းစာပါ ဆောင်းပါးရှင် Dr. Nay Zaw Min (Roma) ၏ Myanmar Derangement Syndrome ဆောင်းပါးကို ဘာသာပြန်ဆိုဖော်ပြအပ်ပါသည်။}