နေပြည်တော် စက်တင်ဘာ ၂၅
ရေဘေးဒဏ်ခံစားခဲ့ရသော မွေးမြူရေးလုပ်ငန်းများအတွက် အလှူငွေပေးအပ်လှူဒါန်းပွဲ အခမ်းအနားကို ယနေ့ မွန်းလွဲပိုင်းတွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန နေပြည်တော် ရုံးအမှတ်(၃၆)၌ ကျင်းပရာ ဒုတိယဝန်ကြီး ဒေါက်တာအောင်ကြီး၊ ဌာနဆိုင်ရာတာဝန်ရှိသူများ၊ မြန်မာနိုင်ငံမွေးမြူရေးလုပ်ငန်းအဖွဲ့ချုပ်ဥက္ကဋ္ဌနှင့် ညီနောင်အသင်းမှ တာဝန်ရှိသူများ တက်ရောက်ကြ သည်။
အခမ်းအနားတွင် မြန်မာနိုင်ငံမွေးမြူရေးလုပ်ငန်းအဖွဲ့ချုပ်ဥက္ကဋ္ဌ ဒေါက်တာမြဟန် က လှူဒါန်းရ ခြင်းနှင့်ပတ်သက်၍ ရှင်းလင်းတင်ပြပြီး ဒုတိယဝန်ကြီး ဒေါက်တာအောင်ကြီးက ကျေးဇူးတင် စကားပြန်လည် ပြောကြားသည်။
ထို့နောက် အလှူငွေများပေးအပ်လှူဒါန်းရာ မြန်မာနိုင်ငံ မွေးမြူရေးလုပ်ငန်းအဖွဲ့ချုပ်မှ ငွေကျပ်သိန်း (၂၀၀၀)နှင့် ငွေကျပ် သိန်း(၈၀) တန်ဖိုးရှိ တိရစ္ဆာန်အစာများ၊ မြန်မာဆန်းသီရိကုမ္ပဏီမှ ငွေကျပ် သိန်း(၆၀၀) တန်ဖိုးရှိ တိရစ္ဆာန်ကုသဆေး(၁၈)မျိုး၊ Fortune International Limited မှ ငွေကျပ်(၃၈၇ ဒသမ ၈) သိန်းတန်ဖိုးရှိ တိရစ္ဆာန်ဆေးနှင့် ဆေးပစ္စည်းများကို ပေးအပ်လှူဒါန်းကြရာ ဒုတိယ ဝန်ကြီးနှင့် တာဝန်ရှိသူများက လက်ခံရယူကြပြီး ဗဟိုသဘာဝဘေးဒဏ်စီမံခန့်ခွဲရေး ကော်မတီသို့ ဆက်လက် ပေးအပ်လှူဒါန်းသွားမည်ဖြစ်ကြောင်း သိရသည်။
(သတင်းစဉ်)
