နေပြည်တော် ဇွန် ၁၄

စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် ယနေ့နံနက်ပိုင်းတွင် မန္တလေး တိုင်းဒေသကြီး ကျောက်ဆည်စက်မှုနယ်မြေ အမှတ် (၃၆) အကြီးစားစက်ရုံ (ကျောက်ဆည်) ရှိ ငလျင်ကြောင့် ထိခိုက်ပျက်စီးခဲ့သည့် အဆောက်အအုံများ၊ စက်ပစ္စည်းများကို လှည့်လည်ကြည့်ရှု စစ်ဆေးပြီး လိုအပ်သည်များ မှာကြားသည်။

ကြည့်ရှုစစ်ဆေး

ဆက်လက်၍ ပြည်ထောင်စုဝန်ကြီးသည် အမှတ် (၃၃) အကြီးစားစက်ရုံ (ကျောက်ဆည်) ၌ ဘိလပ်မြေများ ထုတ်လုပ်နေမှုနှင့် ငလျင်ကြောင့် ထိခိုက်ပျက်စီးခဲ့သည့် စက်ပစ္စည်းကိရိယာများ၊ အဆောက်အအုံများ စစ်ဆေး ပြုပြင်နေမှုတို့ကို လှည့်လည်ကြည့်ရှုစစ်ဆေးပြီး လမ်းတံတား၊ စက်ရုံ၊ အလုပ်ရုံ၊ သာသနိက အဆောက်အအုံ များအား ပြန်လည်ထူထောင်ရေးလုပ်ငန်းများ ဆောင်ရွက်နိုင်ရန်အတွက် လိုအပ်သော ဘိလပ်မြေများ ဖြည့်ဆည်းပေးနိုင်ရေးအတွက် စက်ရုံ၌တပ်ဆင်ထားသည့် စက်ပစ္စည်းများ၏ စက်စွမ်းအား ပြည့်လည်ပတ် ထုတ်လုပ်နိုင်ရေး ကြိုးစားဆောင်ရွက်ရန်၊ ကုန်ထုတ်လုပ်မှု လုပ်ငန်းများစဉ်ဆက်မပြတ် ဆောင်ရွက်နိုင်ရေး အတွက် လိုအပ်သော စက်အရန်ပစ္စည်းများ၊ ကုန်ကြမ်းများနှင့် သွင်းအားစုများကို ကြိုတင်ဝယ်ယူ စုဆောင်းထားရှိရန်၊ စက်ပစ္စည်းကိရိယာများ၊ အဆောက်အအုံများအား စစ်ဆေးပြုပြင်ခြင်း လုပ်ငန်းများ ဆောင်ရွက်ရာတွင် လုပ်ငန်းခွင် ဘေးအန္တရာယ် ကင်းရှင်းရေးကို အလေးထား ကြပ်မတ်ဆောင်ရွက်ရန် မှာကြားသည်။

ထို့နောက် ပြည်ထောင်စုဝန်ကြီးသည် အိမ်သုံးပစ္စည်းစက်ရုံ (မင်းစု) ၌ ငလျင်ကြောင့် ထိခိုက်ပျက်စီးခဲ့သည့် ထရန်စဖော်မာနှင့် ဆက်စပ်ပစ္စည်းများ ပြုပြင်ပြီးစီးမှု အခြေအနေကိုလည်းကောင်း၊ မြစ်သားမြို့နယ်ရှိ အမှတ် (၇) အထည်စက်ရုံ (မြစ်သား) ရှိ ငလျင်ကြောင့် ထိခိုက်ပျက်စီးခဲ့သည် အဆောက်အအုံများ ပြုပြင်နေမှု၊ ချည်မျှင်များ ထုတ်လုပ်နေမှုကိုလည်းကောင်း လှည့်လည်ကြည့်ရှု စစ်ဆေးပြီး လိုအပ်သည်များ မှာကြားသည်။

ယင်းနောက် ပြည်ထောင်စု ဝန်ကြီးသည် ဝမ်းတွင်းမြို့ရှိ ဖိုးပြုံးချိုရက်ကန်းနှင့် ချည်မျှင်အချောကိုင် ထုတ်လုပ်ခြင်း လုပ်ငန်းတွင် စောင်အမျိုးမျိုးရက်လုပ်နေမှု အခြေအနေတို့ကို လှည့်လည်ကြည့်ရှု အားပေးခဲ့ကြောင်း သိရသည်။

သတင်းစဉ်