ဖနောင်ပင်   မတ်   ၂

အာရှနှင့် ဥရောပဒေသနိုင်ငံများအကြား ပူးပေါင်းဆောင်ရွက်ခြင်းဖြင့်  ဒေသတွင်းငြိမ်းချမ်းရေး၊ တည်ငြိမ်ရေးနှင့် သာယာဝပြောရေးတို့အတွက် အင်အားတစ်ရပ် ဖြစ်လာမည်ဖြစ်ကြောင်း ကမ္ဘောဒီးယားနိုင်ငံခြားရေးဝန်ကြီး ပရက်ဆိုခွန်းက မတ် ၁ ရက်တွင် ပြောကြားသည်။

၁၉၉၆ ခုနှစ် မတ် ၁ ရက်က ထိုင်းနိုင်ငံ ဗန်ကောက်တွင် စတင်ကျင်းပခဲ့သည့်  အာရှ-ဥရောပနိုင်ငံများ ထိပ်သီးဆွေးနွေးပွဲကို ဂုဏ်ပြုသည့်အနေဖြင့် ကျင်းပသည့် အာရှ-ဥရောပ ထိပ်သီးဆွေးနွေးပွဲအထိမ်း အမှတ်အခမ်းအနားသို့ ပေးပို့သည့်သဝဏ်လွှာတွင်   ၎င်းက   အထက်ပါအတိုင်း ပြောကြားခြင်းဖြစ်သည်။ အာရှ-ဥရောပ  ထိပ်သီးဆွေးနွေးပွဲ  ကျင်းပခဲ့သည့် နှစ်(၃၀)ပြည့်မြောက်သည့် လက်ရှိအချိန်တွင်  ကမ္ဘောဒီးယား တော်ဝင်အစိုးရနှင့် ပြည်သူများကိုယ်စား အာရှဒေသနှင့် ဥရောပဒေသနိုင်ငံများရှိ ပြည်သူများအတွက် ငြိမ်းချမ်းရေး၊ စဉ်ဆက်မပြတ်ဖွံ့ဖြိုးတိုးတက်ရေးနှင့် သာယာဝပြောရေး တို့အတွက်   ဆုတောင်းစကားပေးပို့ပါကြောင်း နိုင်ငံခြားရေးဝန်ကြီး ပရက်ဆိုခွန်း က ပြောကြားသည်။ 

ဆယ်စုနှစ်သုံးခုအတွင်း  အာရှဒေသနှင့် ဥရောပဒေသနိုင်ငံများအကြား   အာရှ-ဥရောပ  ထိပ်သီးဆွေးနွေးပွဲသည် ဆွေးနွေးမှုများ၊ ပူးပေါင်းဆောင်ရွက်မှုများ နှင့်  အပြန်အလှန် နားလည်ယုံကြည်မှုများအတွက်   စင်္ကြံတစ်ခုအဖြစ် ရပ်တည်ဆောင်ရွက်ခဲ့ကြောင်း ၎င်းကပြောကြားသည်။ အာရှ-ဥရောပ ထိပ်သီးဆွေးနွေးပွဲသည်  ဒေသတွင်းအဖွဲ့အစည်းများဖြစ်သည့်  အာဆီယံအတွင်းရေးမှူးချုပ်ရုံးနှင့် ဥရောပသမဂ္ဂတို့ကို ပေါင်းစည်းပေးရုံ သာမက ကမ္ဘာ့နိုင်ငံများ၏  ပြည်တွင်းအသားတင်ထုတ်ကုန်တန်ဖိုး  ထက်ဝက်ကျော်အပါအဝင် လူဦးရေ၊ ကုန်သွယ်ရေးနှင့် ခရီးသွားလုပ်ငန်းတို့ကို   ကိုယ်စားပြုကြောင်း ၎င်းက ပြောကြားသည်။ အာရှ-ဥရောပ ထိပ်သီးဆွေးနွေးပွဲသည် ဒေသများအကြား ယဉ်ကျေးမှု၊ စီးပွားရေးနှင့် နိုင်ငံသားများအချင်းချင်း ဆက်သွယ်ပေးရာ ပေါင်းကူးတံတားအဖြစ်ရပ်တည်ခဲ့ကြောင်း ၎င်းက ပြောကြားသည်။

ကိုးကား - ဆင်ဟွာ

ဘာသာပြန် - စိုးသူရ