၂၀၂၆ ခုနှစ် နှစ်သစ်ကာလသည် မြန်မာနိုင်ငံအတွက် မင်္ဂလာအပေါင်းနှင့် ပြည့်စုံပြီး ပိုမိုကောင်းမွန်သည့် နိုင်ငံတော်သစ် ပေါ်ပေါက်လာတော့မည်ဖြစ်သည်။ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်က ဦးဆောင်ကျင်းပသည့် လွတ်လပ်၍တရားမျှတသည့် ပါတီစုံ ဒီမိုကရေစီ အထွေထွေရွေးကောက်ပွဲကို အပိုင်း (၃) ပိုင်းခွဲ၍ ၂၆၃ မြို့နယ်တွင်ကျင်းပခဲ့ရာ မဲပေးခွင့်ရှိသည့် လူဦးရေ၏ ၅၄ ဒသမ ၂၂ ရာခိုင်နှုန်းသည် ဆန္ဒအလျောက် စည်းကမ်းတကျ မဲပေးခဲ့ကြပြီး ရွေးကောက်ပွဲကို အောင်မြင်စွာကျင်းပပြုလုပ်နိုင်ခဲ့သည်။

ပြည်သူများအနေဖြင့် မိမိတို့၏ ရပ်ရွာ၊ မြို့နယ်၊ တိုင်းပြည်အကျိုးကို အကောင်းဆုံး ဆောင်ရွက်ပေးနိုင်မည်ဟု ယုံကြည်သည့် ပါတီနှင့်လူပုဂ္ဂိုလ်တို့ကို ယုံကြည်ချက်ဖြင့် မဲပေး ရွေးချယ်ခဲ့ကြသည်။ ယခုအခါ ပြည်သူများက ရွေးချယ်ပေးခဲ့ကြသည့် ပြည်သူ့ကိုယ်စားလှယ်များသည် ပြည်ထောင်စုလွှတ်တော်၊ ပြည်သူ့လွှတ်တော်၊ အမျိုးသားလွှတ်တော်နှင့်တိုင်းဒေသကြီးနှင့် ပြည်နယ် အသီးသီးရှိ လွှတ်တော်များတွင် နိုင်ငံတော်နှင့်ပြည်သူ့အကျိုးကို စတင်ထမ်းဆောင်နေကြပြီဖြစ်သည်။ မကြာမီရက်ပိုင်းတွင် ပြည်ထောင်စုလွှတ်တော်တွင် နိုင်ငံတော်သမ္မတနှင့်ဒုတိယ သမ္မတများကို ရွေးချယ် တင်မြှောက်ကာ ဒီမိုကရေစီအစိုးရသစ်တစ်ရပ် ပေါ်ထွန်းလာ တော့မည်ဖြစ်သည်။

ပေါ်ထွန်းလာမည့် ဒီမိုကရေစီအစိုးရသစ်ကို နိုင်ငံတော်၏ တာဝန်များကို စနစ်တကျ လွှဲပြောင်းပေးအပ် သွားမည်ဖြစ်သည်။ တပ်မတော်နှင့်ပတ်သက်၍ မတ်လ ၂၆ ရက်နေ့က (၈၁)နှစ်မြောက် တပ်မတော်နေ့ စစ်ရေးပြ အခမ်းအနားသို့ ပါဝင်တက်ရောက်ကြသည့် တပ်မတော်တွင် တာဝန်ထမ်းဆောင်ခဲ့သော အငြိမ်းစား တပ်မတော်အရာရှိကြီးများအား တပ်မတော် (ကြည်း၊ ရေ၊ လေ) မိသားစုများက ဂါရဝပြု ကန်တော့သည့် အခမ်းအနားတွင် နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဒုတိယဥက္ကဋ္ဌ ဒုတိယတပ်မတော် ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီးစိုးဝင်းက “တပ်မတော်အနေဖြင့် တပ်မတော်၏ ခေါင်းဆောင်အစဉ်အဆက် သင်ဆရာ၊ ကြားဆရာ၊ မြင်ဆရာများ၏ လမ်းညွှန်ချက်များအတိုင်း၊ စစ်ပညာရပ်များအတိုင်း၊ ချမှတ်ထားသည့် မူဝါဒ လမ်းစဉ်များအတိုင်း ဆက်လက်လျှောက်လှမ်းကြမည်ဖြစ်ကြောင်း၊ တပ်မတော်၏ အဓိက တာဝန်ဖြစ်သည့် နိုင်ငံတော်ကာကွယ်ရေးတာဝန်ကို ဆက်လက်၍ တာဝန်ကျေပွန်စွာ ထမ်းဆောင် သွားမည်ဖြစ်ပြီး နိုင်ငံတော်အစိုးရ၏ မူဝါဒနှင့်အညီလည်း လက်တွဲညီညီ ဆက်လက် ဆောင်ရွက်သွားမည်ဖြစ်ကြောင်း” ပြောကြားခဲ့သည်။

မြန်မာနိုင်ငံ သမိုင်းကြောင်းတစ်လျှောက်မှ ယနေ့အချိန်အထိ တပ်မတော်အနေဖြင့် နိုင်ငံတော်ကို ဦးဆောင်နိုင်ခြင်းသည်၊ တပ်မတော်အနေဖြင့် နိုင်ငံတော်ကာကွယ်ရေးတာဝန်များကို ထမ်းဆောင်နိုင်ခြင်းသည် ခေတ်အဆက်ဆက် လွတ်လပ်ရေးကြိုးပမ်းစဉ်ကာလမှစ၍ လွတ်လပ်ရေး ရပြီးနောက် မျက်မှောက်ကာလအထိ အဆင့်ဆင့်သော တပ်မတော်ခေါင်းဆောင်ကြီးများ၊ မိဘ၊ ဆရာသမားများ၏ သွန်သင်ဆုံးမမှုများ၊ သင်ဆရာ၊ မြင်ဆရာ၊ ကြားဆရာများ၏ အဆင့်ဆင့် လက်ဆင့်ကမ်း သွန်သင်ဆုံးမမှုများကြောင့် ခိုင်မာစွာရပ်တည်နေနိုင်ခြင်း ဖြစ်သည်။ ပြည်တွင်းရန်၊ ပြည်ပရန်တို့ကို တွန်းလှန် တိုက်ဖျက်နိုင်ခြင်းဖြစ်သည်။ ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေးနှင့် အချုပ်အခြာအာဏာတည်တံ့ ခိုင်မြဲရေးဟူသည့် ဒို့တာဝန်အရေး(၃) ပါးကို ကာကွယ်စောင့်ရှောက်နိုင်ခြင်းဖြစ်သည်။

တပ်မတော်သားများအနေဖြင့် တိုင်းရင်းသားပြည်သူများက မွေးဖွားလာသော မျိုးချစ် တပ်မတော်သားများဖြစ်ပြီး တပ်မတော်သာအမိ၊ တပ်မတော်သာအဖအဖြစ် ခံယူပြီး အဆင့်ဆင့်သော ခေါင်းဆောင်များနှင့် ချမှတ်ထားသော လမ်းညွှန်ချက်များကို တစ်သဝေမတိမ်း လိုက်နာ ဆောင်ရွက်လျက်ရှိသည်။ တပ်မတော်သည် အစဉ်အလာကောင်းများနှင့်အညီ တပ်မတော်ကြီး ထာဝစဉ် နုပျိုနေစေရန် အရည်အချင်းပြည့်ဝသည့် တပ်မတော်၊ အင်အားပြည့်ဝသည့်တပ်မတော်၊ စွမ်းရည် ထက်မြက်သည့် တပ်မတော်အဖြစ် ဆက်လက်တည်ဆောက်လျက်ရှိသည်။

မကြာမီကာလတွင် ပြည်သူများလိုလားသည့် ဒီမိုကရေစီအစိုးရသစ်တစ်ရပ် ပေါ်ထွက်လာတော့မည် ဖြစ်ပြီး အဆိုပါအစိုးရသစ်သည် တိုင်းပြည်ဖွံ့ဖြိုးတိုးတက်စေရန်၊ တရားဥပဒေစိုးမိုးစေရန်၊ ပြည်သူလူထု၏ စားဝတ်နေရေးအဆင်ပြေစေရန်၊ နိုင်ငံတော်နှင့် ပြည်သူများ၏ လူမှုစီးပွားဘဝများ ဖွံ့ဖြိုးတိုးတက်လာစေရန် ဆောင်ရွက်ကြတော့မည်ဖြစ်သည်။ ထိုသို့ဆောင်ရွက်နိုင်ရန် တိုင်းပြည် တည်ငြိမ်အေးချမ်းရေးသည် အထူးလိုအပ်သည့်အတွက် တပ်မတော်၏အခန်းကဏ္ဍသည် လွန်စွာ အရေးကြီးပြီး အမျိုးသားနိုင်ငံရေးဦးဆောင်မှုတွင် တပ်မတော်သည် အစဉ်အလာမပျက် ဆက်လက် တာဝန်ကျေပွန်စွာ ထမ်းဆောင်သွားမည်ဖြစ်သည်။ ထို့ကြောင့် တပ်မတော်၏ အဓိကတာဝန်ဖြစ်သည့် နိုင်ငံတော်ကာကွယ်ရေးနှင့် လုံခြုံရေးတာဝန်များကို ကျေပွန်စွာထမ်းဆောင်ရန်အတွက် စွမ်းရည် ပြည့်ဝသည့် တပ်မတော်ဖြစ်အောင် ဆက်လက်ကြိုးပမ်းဆောင်ရွက်သွားမည်ဟု ယုံကြည်ပါကြောင်း။ ။