နေပြည်တော် ဧပြီ ၃
အရာရှိလောင်းဒီပလိုမာသင်တန်း အမှတ်စဉ်(၁၇) သင်တန်းဆင်းပွဲကို ယနေ့ နံနက်ပိုင်းတွင် ရန်ကုန်မြို့ ကမာရွတ် မြို့နယ်ရှိ မြန်မာနိုင်ငံကုန်သွယ်ရေကြောင်း ကောလိပ်၌ ကျင်းပသည်။
အခမ်းအနားသို့ မြန်မာနိုင်ငံကုန်သွယ်ရေကြောင်း ကောလိပ်ကျောင်းအုပ်ကြီး ဦးဇော်ဝင်းထွန်း၊ ပို့ဆောင်ရေးနှင့် ဆက်သွယ်ရေးဝန်ကြီးဌာနမှ တာဝန်ရှိသူများ၊ ဆရာ ဆရာမများ၊ ကျောင်းသား မိဘများ၊ ဧည့်သည်တော်များနှင့် တာဝန်ရှိသူများ တက်ရောက်ကြသည်။
ဦးစွာ မြန်မာနိုင်ငံ ကုန်သွယ်ရေကြောင်းကောလိပ် ကျောင်းအုပ်ကြီး ဦးဇော်ဝင်းထွန်းက ကျောင်းဆင်းတပ်ခွဲကိုစစ်ဆေးပြီး စစ်ရေးပြတပ်ခွဲများက စစ်ကြောင်းပုံဖြင့် ချီတက်အလေးပြုသည်။
ထို့နောက် မြန်မာနိုင်ငံ ကုန်သွယ်ရေကြောင်း ကောလိပ်ကျောင်းအုပ်ကြီးက ကုန်သွယ်ရေကြောင်း အရာရှိလောင်း ဒီပလိုမာ သင်တန်းတွင် ထူးချွန်ဆုရရှိခဲ့ကြသော စံပြအရာရှိလောင်း (ရေကြောင်း) ဆုရ ပိုင်ဖြိုး၊ စံပြအရာရှိလောင်း (အင်ဂျင်နီယာ)ဆုရ ရဲသွေးနိုင်၊ စံပြအရာရှိလောင်း (လျှပ်စစ်နည်းပညာ) ဆုရ အရာရှိလောင်း အောင်ကောင်းမြတ်၊ ကုန်သွယ်ရေကြောင်း အရာရှိလောင်း စာပေထူးချွန်ဆုရ ချမ်းမြေ့ကျော်၊ အင်ဂျင်နီယာ အရာရှိလောင်း စာပေထူးချွန်ဆုရ စည်သူနိုင်၊ လျှပ်စစ်နည်းပညာ အရာရှိလောင်း စာပေထူးချွန်ဆုရ စိုင်းကောင်းသန့်တို့ကို ဂုဏ်ပြုဆုများ ပေးအပ်ချီးမြှင့်ပြီး သင်တန်းဆင်း မိန့်ခွန်းပြောကြားသည်။
ယင်းနောက် ပို့ဆောင်ရေးနှင့် ဆက်သွယ်ရေးဝန်ကြီးဌာန အမြဲတမ်းအတွင်းဝန်က ထူးချွန်ဆုရ အရာရှိလောင်း ခြောက်ဦး နှင့် ၎င်းတို့၏ မိဘများကို တွေ့ဆုံဂုဏ်ပြုအမှာစကား ပြောကြားသည်။
ဆက်လက်၍ ဘွဲ့နှင်းသဘင် အခမ်းအနားကို ကျင်းပရာ မြန်မာနိုင်ငံကုန်သွယ်ရေကြောင်း ကောလိပ်ကျောင်းအုပ်ကြီးက ရေကြောင်းအရာရှိလောင်း ၁၂၄ ဦး၊ ရေကြောင်းအင်ဂျင်နီယာ အရာရှိလောင်း ၁၁၇ ဦး၊ ရေကြောင်းလျှပ်စစ်နည်းပညာ အရာရှိလောင်း ၃၇ ဦး စုစုပေါင်း ၂၇၈ ဦးတို့ကို ဒီပလိုမာလက်မှတ်နှင့် သင်တန်းဆင်း အောင်လက်မှတ်များ ပေးအပ် ချီးမြှင့်သည်။
ကုန်သွယ်ရေကြောင်းအရာရှိလောင်း ဒီပလိုမာသင်တန်း စတင်ဖွင့်လှစ်ခဲ့သည့် ၁၉၆၃ ခုနှစ်မှ ယနေ့အထိ ၆၃ နှစ်တာ ကာလအတွင်း ရေကြောင်းအရာရှိလောင်း ၃၀၆၈ ဦး၊ ရေကြောင်းအင်ဂျင်နီယာ အရာရှိလောင်းနှင့် ရေကြောင်းလျှပ်စစ် နည်းပညာ အရာရှိလောင်း ၃၀၅၉ ဦး စုစုပေါင်း အရာရှိလောင်း ၆၁၂၇ ဦး၊ ရေကြောင်းအရာရှိ ၈၇၄၅၄ ဦး၊ အင်ဂျင်နီယာ အရာရှိ ၂၉၅၇၂ ဦး နှင့် အခြားအဆင့် သင်တန်းသားပေါင်း ၁၆၄၂၉၉ ဦးတို့ကို မွေးထုတ်ပေးနိုင်ခဲ့ကာ ယနေ့အထိရေကြောင်း ဘက်ဆိုင်ရာကျွမ်းကျင်သူ စုစုပေါင်း ၂၈၇၄၅၂ ဦးတို့ကို လေ့ကျင့်သင်ကြား မွေးထုတ်ပေးနိုင်ခဲ့ပြီး ဖြစ်သည်။ သင်တန်းပြီး မြောက်ခဲ့သည့် အရာရှိလောင်းများအနက် လက်ရှိအချိန်တွင် ရေယာဉ်မှူးကြီး (Captain) အဆင့် ၇၂၁ ဦး၊ ကုန်းပတ်အရာ ရှိချုပ် (Chief Officer) အဆင့် ၇၀၁ ဦး၊ ဒုတိယတန်း ကုန်းပတ်အရာရှိ (Second Officer)အဆင့် ၆၅၂ ဦး၊ တတိယတန်း ကုန်းပတ်အရာရှိ (Third Officer) အဆင့် ၈၅၉ ဦးနှင့် အင်ဂျင်နီယာမှူးကြီး (Chief Engineer) အဆင့် ၆၈၅ ဦး၊ ဒုတိယ တန်းစက်မှုလက်မှုအရာရှိ (2nd Engineer) အဆင့် ၆၇၂ ဦး၊ တတိယတန်းစက်မှုလက်မှုအရာရှိ (3rd Engineer) အဆင့် ၁၅၃၅ ဦးတို့သည် နိုင်ငံတကာသင်္ဘောများပေါ်တွင် အမြင့်ဆုံးရာထူးဖြင့် တာဝန်များထမ်းဆောင် လျက်ရှိနေကြပြီဖြစ် ကြောင်း သိရသည်။
သတင်းစဉ်
