အားလုံးမင်္ဂလာပါခင်ဗျာ

ပြည်ထောင်စုလွှတ်တော် နာယကကြီးနှင့်တကွ ပြည်ထောင်စုလွှတ်တော် ကိုယ်စားလှယ်များ၊ ပြည်ထောင်စုအစိုးရအဖွဲ့ဝင်များ၊ ပြည်ထောင်စုအဆင့် အဖွဲ့အစည်းဝင်များ၊ တက်ရောက်လာကြတဲ့ နိုင်ငံအသီးသီးမှ ကိုယ်စားလှယ်တော်များ၊ မြန်မာနိုင်ငံအခြေစိုက် နိုင်ငံခြားသံရုံးများမှ သံအမတ်ကြီးများ၊ သံတမန်များ၊ တက်ရောက်လာကြသူများနဲ့ မြန်မာနိုင်ငံသူ နိုင်ငံသားများအားလုံး ကိုယ်စိတ် နှစ်ဖြာကျန်းမာချမ်းသာပြီး ကျက်သရေမင်္ဂလာအပေါင်းနဲ့ ပြည့်စုံကြပါစေလို့ ဦးစွာ ဆုမွန်ကောင်း တောင်းရင်း နှုတ်ခွန်းဆက်သအပ်ပါတယ်။

ပြည်သူအားလုံးကိုကိုယ်စားပြုတဲ့ ပြည်ထောင်စုလွှတ်တော်က ကျွန်တော့်ကို နိုင်ငံတော်သမ္မတ အဖြစ် ရွေးချယ်တင်မြှောက်ခဲ့တဲ့အတွက် ပြည်သူလူထုရဲ့ဆန္ဒကိုလေးစားစွာနဲ့ နိုင်ငံ့တာဝန်ကို ဂုဏ်ယူ ဝမ်းမြောက်စွာနဲ့ ကျေပွန်အောင် ထမ်းဆောင်သွားမှာဖြစ်ကြောင်း ဦးစွာပြောကြားလိုပါတယ်။

၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲမှာ အဲ့ဒီအချိန်က အာဏာရပါတီဟာ အလွန်အရုပ်ဆိုးအကျည်းတန်တဲ့ မဲမသမာမှုတွေကို ပြုလုပ်ခဲ့တာကြောင့် ဒီမိုကရေစီရဲ့ အနှစ်သာရဖြစ်တဲ့ တရားမျှတပြီး စစ်မှန်တဲ့ရွေးကောက်ပွဲ တစ်ခုမဖြစ်ခဲ့ဘဲ ပါတီစုံဒီမိုကရေစီစနစ်ကို ပျက်ယွင်းစေတဲ့ မရိုးသားတဲ့ နိုင်ငံရေးလုပ်ရပ်ကို လုပ်ဆောင်ခဲ့ပါတယ်။ တပ်မတော်အနေနဲ့ နိုင်ငံရေး ပါတီများနဲ့ ပြည်သူလူထုရဲ့ဆန္ဒနဲ့အညီ တရားဥပဒေအတိုင်း အေးချမ်းစွာဖြေရှင်းနိုင်ဖို့ အဆင့်ဆင့် အကြိမ်ကြိမ် ညှိနှိုင်းမေတ္တာရပ်ခံတောင်းဆိုခဲ့ပေမယ့်လည်း တောင်းဆိုချက်တွေကို လျစ်လျူရှုပြီး မဲမသမာမှုအတွက် ဖြေရှင်းခြင်းမပြုရသေးဘဲ မှန်ကန်မှုမရှိ၊ တရားမျှတမှုမရှိတဲ့ ရွေးကောက်ပွဲ ရလဒ်နဲ့ လွှတ်တော်ခေါ်၊ နိုင်ငံတော်အာဏာကို မတရားတဲ့နည်းလမ်းနဲ့ အဓမ္မရယူဖို့ လုပ်ဆောင်ခဲ့ကြပါတယ်။ ဒါကြောင့် ဖွဲ့စည်းပုံအခြေခံဥပဒေနဲ့အညီ နိုင်ငံတော်ကို အရေးပေါ်အခြေအနေကြေညာပြီး နိုင်ငံတော် တာဝန်တွေကို လွှဲအပ်တာဝန်ပေးခဲ့တာကြောင့် တပ်မတော်က နိုင်ငံ့တာဝန်တွေကို ထမ်းဆောင်ခဲ့ ရတာ ဖြစ်ပါတယ်။ ဖွဲ့စည်းပုံအခြေခံ ဥပဒေပါ အရေးပေါ်ကာလဆိုင်ရာ ပြဋ္ဌာန်းချက်များနဲ့အညီ အဆင့်ဆင့်ဆောင်ရွက်ခဲ့ပြီး ယခုအခါမှာတော့ ပြည်သူလူထုရဲ့ ဆန္ဒနဲ့အညီ လွတ်လပ်ပြီး တရားမျှတတဲ့၊ ဂုဏ်သိက္ခာရှိတဲ့ ပါတီစုံဒီမိုကရေစီ အထွေထွေရွေးကောက်ပွဲကြီးကို ကျင်းပပေးနိုင်ခဲ့ပြီး ဖြစ်ပါတယ်။ လွှတ်တော်ကိုယ်စားလှယ်အသီးသီးဟာ မဲပေးပိုင်ခွင့်ရှိသူများရဲ့ ၅၄ ဒသမ ၂၂ ရာခိုင်နှုန်း လာရောက်မဲပေးရွေးချယ်ခံရသူများဖြစ်ပါတယ်။ လွတ်လပ်ပြီးတရားမျှတစွာ သန့်သန့်ရှင်းရှင်းနဲ့ ရွေးချယ်ခံရသူများဖြစ်တဲ့အတွက် ဥပဒေပြုရေး၊ အုပ်ချုပ်ရေးနဲ့ တရားစီရင်ရေး ကဏ္ဍတွေမှာ အသီးသီး ပြန်လည်ပေါ်ထွန်းလာခဲ့ပြီး ဒီမိုကရေစီစနစ်ကို ပြန်လည်စတင်နိုင်တော့မှာဖြစ်ပါတယ်။

အခုဆိုရင် ကျွန်တော်တို့မြန်မာနိုင်ငံဟာ ဒီမိုကရေစီလမ်းကြောင်းပေါ်ကို ပြန်လည်ခြေချပြီး ပိုမိုကောင်းမွန်တဲ့ အနာဂတ်ဆီကို ဦးတည်လျှောက်လှမ်းနေပြီဖြစ်တဲ့အတွက် ပါတီစုံဒီမိုကရေစီစနစ် ပိုမိုခိုင်မာအောင် ကြိုးပမ်းတည်ဆောက်သွားရမှာဖြစ်ပါတယ်။ ကျွန်တော်တို့အစိုးရသစ်အတွက် စိန်ခေါ်မှုများစွာကလည်း စောင့်ကြိုနေတာကို ကျွန်တော့်အနေနဲ့ ကောင်းစွာသိရှိထားပါတယ်။ ကမ္ဘာ့အရေး၊ မြန်မာ့အရေး၊ နိုင်ငံရေး၊ စီးပွားရေးစတဲ့ အခက်အခဲတွေအပါအဝင် နယ်ပယ်ပေါင်းစုံက စိန်ခေါ်မှုတွေကို အစိုးရနဲ့ ပြည်သူလူထုအတူတကွ လက်တွဲညီညီပူးပေါင်းကာ ရင်ဆိုင်ကျော်လွှား သွားကြမယ်လို့ သန္နိဋ္ဌာန်ချထားပါတယ်။ ဒါ့ကြောင့် ကျွန်တော်ဦးဆောင်တဲ့ အစိုးရအဖွဲ့ရဲ့ ရည်မှန်းချက်၊ မူဝါဒများနဲ့ သဘောထားတွေကို ပြည်ထောင်စုလွှတ်တော်ကတစ်ဆင့် မိဘပြည်သူ များကို တင်ပြပြီး နိုင်ငံနဲ့ပြည်သူအကျိုးကို ထိရောက်အောင်မြင်အောင် ဆောင်ရွက်သွားမှာ ဖြစ်ကြောင်း ပြောကြားလိုပါတယ်။

ကျွန်တော်တို့အစိုးရသစ်အနေနဲ့ စစ်မှန်ပြီး စည်းကမ်းပြည့်ဝတဲ့ ပါတီစုံဒီမိုကရေစီစနစ် ခိုင်မာစေရေး၊ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုတည်ဆောက်ရေးဆိုတဲ့ ရည်ရွယ်ချက် လုပ်ငန်းစဉ်တွေကို ဆက်လက်အကောင်အထည် ဖော်ဆောင်ရွက်သွားမှာဖြစ်ပါတယ်။ ဒီလို ဆောင်ရွက်တဲ့ အခါမှာလည်း ငြိမ်းချမ်းရေး၊ ဒီမိုကရေစီနဲ့ အမျိုးသားပြန်လည်သင့်မြတ်ရေးတွေကို ဘက်စုံလွှမ်းခြုံ ဆောင်ရွက်နိုင်ဖို့အတွက် ပြည်ထောင်စု အတိုင်ပင်ခံကောင်စီ ဥပဒေနဲ့အညီ ပြည်ထောင်စု အတိုင်ပင်ခံကောင်စီကိုလည်း ဖွဲ့စည်းတာဝန်ပေးအပ်ဆောင်ရွက်သွားမှာဖြစ်ပါတယ်။ ပြည်ထောင်စုအတိုင်ပင်ခံကောင်စီအနေနဲ့ ဥပဒေမှာပြဋ္ဌာန်းထားတဲ့အတိုင်း ပြည်ထောင်စုရဲ့ လုံခြုံရေးနဲ့ တရားဥပဒေစိုးမိုးရေးဆိုင်ရာကိစ္စရပ်တွေ၊ နိုင်ငံတကာ ဆက်ဆံရေးဆိုင်ရာကိစ္စရပ်တွေ၊ ငြိမ်းချမ်းရေးဆိုင်ရာကိစ္စရပ်တွေ၊ ဥပဒေပြဋ္ဌာန်းရေးဆိုင်ရာ ကိစ္စရပ်တွေကို နိုင်ငံတော်အစိုးရထံ အကြံပေးတာတွေကို အကောင်အထည်ဖော်ဆောင်ရွက်သွားရမှာဖြစ်ပါတယ်။

ကျွန်တော်တို့အစိုးရအနေနဲ့ ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ (၂၀၀၈ ခုနှစ်) မှာ ပြဋ္ဌာန်းပေးထားတဲ့ ဖက်ဒရယ်ဆိုင်ရာ ပြဋ္ဌာန်းချက်တွေကို ထိရောက်အောင် အကောင်အထည်ဖော် ဆောင်ရွက်သွားမှာလည်း ဖြစ်ပါတယ်။ အထက်မှာ တင်ပြခဲ့သလိုပဲ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုကြီး တည်ဆောက်ဖို့ဆိုရင် ငြိမ်းချမ်းရေးရရှိဖို့ မဖြစ်မနေ လိုအပ်တဲ့အတွက် နိုင်ငံအတွင်းမှာရှိတဲ့ နိုင်ငံရေးပါတီများ၊ တိုင်းရင်းသားပြည်သူများနဲ့ တိုင်းရင်းသားအဖွဲ့အစည်းအားလုံး အကျိုးတူပူးပေါင်း ပါဝင်ဆောင်ရွက်ပြီး ဒီမိုကရေစီနဲ့ ဖက်ဒရယ် စနစ်ကိုအခြေခံတဲ့ ပြည်ထောင်စုကိုဖော်ဆောင်ဖို့ ကြိုးပမ်းသွားမှာဖြစ်ပါတယ်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) အပိုဒ် ၂၀ (င) အရ ပြည်ထောင်စု ငြိမ်းချမ်းရေးညီလာခံမှာ ဆွေးနွေးသဘောတူချုပ်ဆိုထားတဲ့ ပြည်ထောင်စုသဘောတူစာချုပ် (Union Accord) အစိတ်အပိုင်း (၁)၊ (၂) နဲ့ (၃) တို့ကို NCA အပိုဒ် ၂၀ (စ) နဲ့အညီ ပြည်ထောင်စုလွှတ်တော်သို့ တင်သွင်း ဆွေးနွေးအတည်ပြုချက် ရယူဆောင်ရွက်သွားမှာဖြစ်ပါတယ်။ ဒါ့အပြင် အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နဲ့ NCA လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့များ၊ နိုင်ငံရေးပါတီအစုအဖွဲ့များ ဖွဲ့စည်းပုံ အခြေခံ ဥပဒေပြင်ဆင်ရန် ဆွေးနွေးသဘောတူညီထားတဲ့ အချက် ၄၃ ချက်ကိုလည်း ပြည်ထောင်စု လွှတ်တော်သို့ တင်သွင်းဆွေးနွေးသွားမှာဖြစ်ပါတယ်။

နိုင်ငံရဲ့အနာဂတ်အတွက် အဓိကကျတဲ့ ပညာရေးကဏ္ဍနဲ့ ကျန်းမာရေးကဏ္ဍကို အခြေခံအဆင့် ကစလို့ မြှင့်တင်ပေးသွားမှာဖြစ်ပါတယ်။ မိမိတို့ရဲ့ ကလေးတွေ၊ ကျောင်းသား ကျောင်းသူတွေ၊ လူငယ်တွေမှာ နိုင်ငံတကာ အဆင့်မီပညာရေးကို ရရှိဖို့နဲ့ပြည်သူတိုင်း ကျန်းမာရေးစောင့်ရှောက်မှု အလွယ်တကူ ရရှိစေဖို့အတွက် ဆောင်ရွက်သွားမှာ ဖြစ်ပါတယ်။ ကျွန်တော်တို့နိုင်ငံဟာ လွတ်လပ်ရေး ရရှိခဲ့တဲ့အချိန်ကစလို့ ခေတ်အဆက်ဆက် ဖြစ်ပွားခဲ့တဲ့ လက်နက်ကိုင်ပဋိပက္ခတွေကြောင့် နယ်စပ် ဒေသအပါအဝင် တချို့ဒေသတွေမှာ ပညာသင်ကြားခွင့်တွေ ဆုံးရှုံးခဲ့ရပြီး ပညာရည် နိမ့်ပါးခဲ့ကြရပါတယ်။ ယခုလည်း တချို့ဒေသတွေမှာ ဖြစ်ပွားနေတဲ့ လက်နက်ကိုင်ပဋိပက္ခတွေကြောင့် ကလေးတွေရဲ့ ပညာသင်ကြားခွင့်တွေ ဆုံးရှုံးနေရပါတယ်။ ဒါကြောင့်ပညာရေးကဏ္ဍကို နေရာဒေသ ကွာခြားမှုမရှိ တစ်ပြေးညီမြှင့်တင်နိုင်ဖို့အတွက် အထူးအလေးပေးဆောင်ရွက်သွားမှာဖြစ်ပါတယ်။

ကျွန်တော်တို့နိုင်ငံကို ခေတ်မီဖွံ့ဖြိုးတိုးတက်တဲ့ ဒီမိုကရေစီနိုင်ငံတော်အဖြစ် တည်ဆောက်ရာမှာ ထူးချွန်ထက်မြက်တဲ့ လူ့စွမ်းအားအရင်းအမြစ်တွေဖြစ်တဲ့ အသိပညာရှင်၊ အတတ်ပညာရှင်တွေ အများကြီး လိုအပ်ပါတယ်။ မြန်မာတို့ဟာ ဉာဏ်ရည်ထက်မြက်သူတွေဖြစ်ပြီး သမိုင်းတစ်လျှောက်မှာ ထူးချွန်ထက်မြက်တဲ့ ပညာရှင်များစွာ ပေါ်ထွက်ခဲ့ပါတယ်။ အနာဂတ်နိုင်ငံတော်ရဲ့ တာဝန်တွေကို ပခုံးပြောင်း ထမ်းဆောင်ကြရမယ့် မျိုးဆက်သစ်လူငယ်တွေအတွက် နိုင်ငံတကာနဲ့ ရင်ပေါင်တန်း နိုင်မယ့် အတတ်ပညာရှင်၊ အသိပညာရှင်များဖြစ်ဖို့နဲ့ ဗလငါးတန်ပြည့်ဝဖို့အတွက် ပညာရေး ကဏ္ဍကို မဖြစ်မနေမြှင့်တင်ဆောင်ရွက်သွားမှာဖြစ်ကြောင်း ပြောကြားလိုပါတယ်။

ပညာရေးအားနည်းတဲ့ ပြည်နယ်တွေအတွက် အထူးစီမံချက်တွေချမှတ်ပြီး KG+9 အထိ ပညာ သင်ကြားနိုင်ရေး ဆောင်ရွက်ပေးသွားမှာ ဖြစ်ပါတယ်။ အခြေခံပညာ အလယ်တန်းတွေမှာ စက်မှု၊ စိုက်ပျိုးရေး၊ မွေးမြူရေးအခြေခံဘာသာရပ်များ သင်ကြားရေးနဲ့ စက်မှု၊ စိုက်ပျိုး၊ မွေးမြူရေး အထက်တန်းကျောင်းများကိုလည်း တိုးချဲ့ဖွင့်လှစ်ပေးသွားမှာဖြစ်ပြီး စိုက်ပျိုးရေးနဲ့ မွေးမြူရေးသိပ္ပံ ကျောင်းတွေကတစ်ဆင့် သင့်တော်တဲ့ သိပ္ပံကျောင်းများကို တက္ကသိုလ်/ ကောလိပ်အဆင့်မြှင့်တင်ခြင်း နဲ့ တက္ကသိုလ်တွေ၊ Polytechnic သိပ္ပံတွေနဲ့ တက္ကသိုလ်တွေ တိုးချဲ့ဖွင့်လှစ်နိုင်ရေးလည်း ဆောင်ရွက် ပေးသွားမှာ ဖြစ်ပါတယ်။

ခေတ်မီဖွံ့ဖြိုးတိုးတက်တဲ့ နိုင်ငံတစ်ခုတည် ဆောက်ရာမှာ ပညာရည်မြင့်မားရေးနဲ့ တန်းတူ ကျန်းမာ ကြံ့ခိုင်တဲ့ နိုင်ငံသားများဖြစ်လာဖို့ဟာလည်း ပဓာနကျပါတယ်။ တစ်မျိုးသားလုံး ကျန်းမာကြံ့ခိုင်ရေးနဲ့ ကျန်းမာရေး အဆင့်မြှင့်တင်ရေးလုပ်ငန်းတွေကို ထိရောက်တဲ့မူဝါဒတွေနဲ့ ချမှတ်အကောင်အထည် ဖော်တဲ့နေရာမှာ ပြည်သူလူထုကို တိုက်ရိုက်အကျိုးပြုတဲ့ ကျန်းမာရေးစောင့်ရှောက်မှုလုပ်ငန်းတွေ ဖြစ်ဖို့၊ လူတိုင်းလက်လှမ်းမီတဲ့ ကျန်းမာရေးစောင့်ရှောက်မှုပေးနိုင်ဖို့ ကျွန်တော်တို့အစိုးရအနေနဲ့ အလေးထားဆောင်ရွက်သွားမှာဖြစ်ပါတယ်။

နိုင်ငံတော်ရဲ့ စီးပွားရေး ဦးမော့လာစေဖို့အတွက် အသေးစား၊ အငယ်စားနှင့် အလတ်စားစီးပွားရေး လုပ်ငန်း (MSME) တွေ ဖွံ့ဖြိုးတိုးတက်စေဖို့အတွက် စီမံဆောင်ရွက်ပေးသွားမှာဖြစ်ပါတယ်။ ပြည်တွင်း၊ ပြည်ပ ရင်းနှီးမြှုပ်နှံမှုတွေ တိုးတက်လာစေရေးအတွက်လည်း လုပ်ထုံးလုပ်နည်းများ ပြန်လည်သုံးသပ်ပြီး စီးပွားရေးလုပ်ငန်းများ အရှိန်မြှင့်တင်နိုင်ရေး ဆောင်ရွက်သွားပါမယ်။ ပြည်သူများ ကြုံတွေ့နေရတဲ့ စီးပွားရေးကျပ်တည်းမှု၊ ကုန်ဈေးနှုန်းကြီးမြင့်ခြင်းနဲ့ အလုပ်အကိုင်အခွင့်အလမ်း လိုအပ်ချက်တွေကို ပြေလည်အောင်ဖော်ဆောင်ပြီး နိုင်ငံနဲ့ကိုက်ညီတဲ့ ဈေးကွက်စီးပွားရေးစနစ်ကို အကောင်အထည်ဖော် ဆောင်ရွက်သွားမှာဖြစ်ပါတယ်။ အဓိကကျတဲ့အချက်ကတော့ ကုန်ထုတ်လုပ်မှု အားနည်းနေခြင်းပဲ ဖြစ်ပါတယ်။

ပြည်သူများ ဆင်းရဲနွမ်းပါးမှုလျှော့ချရေးနဲ့ တောင်သူလယ်သမားတွေရဲ့ ဘဝမြှင့်တင်ရေးဟာ ကျွန်တော်တို့အတွက် အဓိကကျတဲ့ ဦးစားပေးလုပ်ငန်းစဉ် တစ်ရပ်ဖြစ်ပါတယ်။ ကျေးလက်နေ ပြည်သူအများစုဟာ စိုက်ပျိုးရေးနဲ့ မွေးမြူရေးလုပ်ငန်းတွေအပေါ် အဓိကမှီခိုနေရတာဖြစ်ပါတယ်။ နိုင်ငံ့လူဦးရေရဲ့ ၇၀ ရာခိုင်နှုန်းခန့်ဟာ ကျေးလက်ဒေသတွေမှာ နေထိုင်ကြတာဖြစ်ပါတယ်။ ဒါကြောင့် တောင်သူလယ်သမားများရဲ့ဘဝ မြှင့်တင်ဖို့နဲ့ ကျေးလက်ဒေသ ဖွံ့ဖြိုးတိုးတက်ဖို့အတွက် စီမံ ဆောင်ရွက်ပေးသွားမှာဖြစ်ပါတယ်။ ထိရောက်တဲ့ ရေရှည်စီမံကိန်းတွေ ရေးဆွဲပြီး ဈေးကွက် စီးပွားရေးကို ဆက်လက်ကျင့်သုံးခြင်းဖြင့် ပြည်သူလူထုတစ်ရပ်လုံးရဲ့ အသက်မွေးဝမ်းကျောင်းမှုကို မြှင့်တင်ဖို့နဲ့ လူမှုစီးပွားဘဝ မြှင့်တင်နိုင်ဖို့အတွက် ကြိုးစားလုပ်ဆောင်သွားမှာဖြစ်ပါတယ်။ မြန်မာနိုင်ငံမှာ လူဦးရေ ၅၁ သန်းကျော်ရှိပြီး အမျိုးသမီးလူဦးရေဟာ ၅၃ ရာခိုင်နှုန်းခန့်ရှိပါတယ်။ နိုင်ငံရဲ့သမိုင်းမှာ အမျိုးသမီးစွမ်းဆောင်ရှင်များ၊ ပညာရှင်များ၊ စွမ်းရည် သတ္တိဆု ရရှိသူများစွာ ရှိပါတယ်။ နယ်ပယ်အသီးသီးမှာ အမျိုးသမီးများရဲ့ စွမ်းဆောင်နိုင်ရည်များ ပိုမိုထိရောက်နိုင်ဖို့အတွက် အမျိုးသမီးရေးရာဝန်ကြီးဌာန သီးခြားဖွဲ့စည်းတာဝန်ပေးဆောင်ရွက်သွားမှာ ဖြစ်ပါတယ်။

ဒီနေ့ ကမ္ဘာနဲ့အဝှမ်းကြုံတွေ့နေရတဲ့ သဘာဝဘေးအန္တရာယ်များနဲ့ ရာသီဥတုပြင်းထန်စွာ ပြောင်းလဲမှု တွေကြောင့် သဘာဝသယံဇာတနဲ့ ပတ်ဝန်းကျင်ထိန်းသိမ်းရေးဟာလည်း အရေးကြီးပါတယ်။ ကျွန်တော်တို့ နိုင်ငံတော်ဟာ သစ်ပင်သစ်တောတွေ၊ မြစ်ချောင်းအင်းအိုင်တွေ၊ ကြွယ်ဝတဲ့ ဇီဝမျိုးစုံမျိုးကွဲတွေနဲ့ သဘာဝအရင်းအမြစ်တွေ ပြည့်စုံစွာ ရှိနေပါတယ်။ ယနေ့အချိန်မှာ ကမ္ဘာကြီး ပူနွေးလာမှုနဲ့ ရာသီဥတု ဖောက်ပြန်ပြောင်းလဲမှုတွေရဲ့ စိန်ခေါ်မှုကို ရင်ဆိုင်နေရချိန်မှာ ဒီအရင်းအမြစ်တွေကို ကာကွယ်ဖို့ဆိုတာ လူများနဲ့ သက်ရှိသတ္တဝါများ အသက်ရှင်သန်ရေးအတွက် အရေးကြီးတဲ့ လုပ်ငန်းဖြစ်နေပါတယ်။ သစ်တောပြုန်းတီးမှုနဲ့ ကာဗွန်ထုတ်လွှတ်မှု လျှော့ချနိုင်ဖို့ အတွက် သဘာဝပတ်ဝန်းကျင်ကို မထိခိုက်စေတဲ့ ပြန်လည်ပြည့်ဖြိုးမြဲစွမ်းအင်တွေကို အသုံးချနိုင်ရေး ဆောင်ရွက်သွားမှာဖြစ်ပါတယ်။ လက်ရှိဖြစ်ပေါ်နေတဲ့ အရှေ့အလယ်ပိုင်း ပဋိပက္ခဟာ နှစ်ပတ်ကြာ ပစ်ခတ်တိုက်ခိုက်မှု ခဏရပ်စဲထားသော်လည်း ဘယ်လိုဆက်ဖြစ်လာမလဲဆိုတာ စောင့်ကြည့် လေ့လာရပါဦးမယ်။ ဘယ်လိုအခြေအနေတွေ ဖြစ်လာစေကာမူ စက်သုံးဆီ အခက်အခဲကတော့ ရှိနေဦးမှာဖြစ်တဲ့အတွက် ကျွန်တော်တို့လို နှစ်စဉ်အမေရိကန်ဒေါ်လာ ၅ ဘီလီယံဖိုးခန့် စက်သုံးဆီ တင်သွင်းနေတဲ့ နိုင်ငံမျိုးဟာ စက်သုံးဆီချွေတာရေး မလွဲမသွေ ပြုလုပ်ကြရမှာ ဖြစ်ပါတယ်။ ယာဉ်၊ ယန္တရားသုံး၊ မီးစက်သုံး စသည်ဖြင့် နယ်ပယ်တွေမှာ အတတ်နိုင်ဆုံး လျှော့ချသုံးစွဲတာ အကောင်းဆုံး ဖြစ်ပါတယ်။ ပြည့်ဖြိုးမြဲစွမ်းအင်မှ လျှပ်စစ်ဓာတ်အားထုတ်လုပ်နိုင်ရေး၊ လျှပ်စစ်ကားများ အဖြစ်နိုင်ဆုံး အသုံးပြုရေး မလွဲမသွေ လိုအပ်ပါတယ်။ နိုင်ငံတော်ဖွံ့ဖြိုးတိုးတက်ရေးနဲ့ လျှပ်စစ်ကဏ္ဍဟာ ဆက်စပ်နေတဲ့အတွက် ပြည်တွင်းလျှပ်စစ်ဓာတ်အားလိုအပ်ချက်ကို ဖူလုံအောင် ကြိုးပမ်း ဆောင်ရွက်သွားကြရမှာ ဖြစ်ပါတယ်။ ဆိုလာစွမ်းအင်ဖွံ့ဖြိုးမှုကိုလည်း မြှင့်တင်ဆောင် ရွက်သွားမှာဖြစ်ပါတယ်။

ဧရာဝတီ၊ ချင်းတွင်း၊ စစ်တောင်းမြစ်တွေဟာ မြန်မာနိုင်ငံရဲ့ အဓိကအသက်သွေးကြောများဖြစ်ပြီး စိုက်ပျိုးရေး၊ ကုန်စည်ပို့ဆောင်ရေးနဲ့ ရေအားလျှပ်စစ် ထုတ်လုပ်ခြင်းတို့အတွက် အလွန်အရေးပါ ပါတယ်။ မြစ်ကြောင်းတစ်လျှောက် ကုန်စည်ပို့ဆောင်မှုကို ကုန်ကျစရိတ်သက်သာစွာနဲ့ ဆောင်ရွက်နိုင်သလို မိုးရာသီမှာ စိုက်ပျိုးရေရရှိရေး အတွက်လည်း အသုံးချနိုင်ပါတယ်။ အလားတူ နွေရာသီမှာ မြစ်ရေတင်စီမံကိန်းများနဲ့ မြစ်များရဲ့ ဝဲယာတစ်လျှောက် စိုက်ပျိုးရေး ပြုလုပ်နိုင်ဖို့အတွက်လည်း စီမံဆောင်ရွက်သွားပါမယ်။ ကူးသန်းသွားလာမှုများစွာကို အထောက်အကူ ပြုနေတဲ့ ဧရာဝတီမြစ်၊ ချင်းတွင်းမြစ်တွေကို ရာသီမရွေး ထိရောက်စွာအသုံးချနိုင်ဖို့ ကြိုးပမ်း ဆောင်ရွက်သွားမှာ ဖြစ်ပါတယ်။ ပြည်သူများ သွားလာမှုအဆင် ပြေလွယ်ကူစေဖို့အတွက် ပုံမှန် လမ်းကြောင်းများအတိုင်း သတ်မှတ်နှုန်းထားများနဲ့ ပြေးဆွဲပေးသော ခရီးသည်တင်ဝန်ဆောင်မှုဖြစ်တဲ့ အများပြည်သူ သယ်ယူပို့ဆောင်ရေး (Public Transportation) ကိုလည်း တိုးချဲ့ဆောင်ရွက်သွားမှာ ဖြစ်ပါတယ်။

နိုင်ငံတကာဆက်ဆံရေးမှာလည်း ဟန်ချက်ညီညီ ဆောင်ရွက်သွားမှာဖြစ်ပြီး အိမ်နီးချင်းနိုင်ငံများနဲ့ ချစ်ကြည်ရင်းနှီးမှု တိုးမြှင့်တည်ဆောက်သွားကြရမှာ ဖြစ်ပါတယ်။ ကျွန်တော်တို့နိုင်ငံဟာ အာဆီယံအဖွဲ့ဝင်နိုင်ငံ ဖြစ်တဲ့အတွက် အာဆီယံနဲ့ ပုံမှန်ဆက်ဆံရေး ပြန်လည်ရရှိအောင် ကြိုးစား ဆောင်ရွက်သွားပါမယ်။ အိမ်နီးချင်းနိုင်ငံများ၊ ဒေသတွင်းမိတ်ဆွေ နိုင်ငံများနဲ့ နိုင်ငံရေး၊ စီးပွားရေး၊ လူမှုရေးကဏ္ဍအသီးသီးမှာ ပူးပေါင်းဆောင်ရွက်သွားပြီး နိုင်ငံတကာဆက်ဆံရေးကိုလည်း ငြိမ်းချမ်းစွာ အတူယှဉ်တွဲနေထိုင်ရေးမူကြီး (၅) ရပ်နဲ့ အညီ ခိုင်မာအောင် တည်ဆောက်သွားမှာဖြစ်ပါတယ်။

ကျွန်တော်တို့အစိုးရအနေနဲ့ နိုင်ငံသားတိုင်း ဥပဒေရဲ့အကာအကွယ်ကို အညီအမျှရရှိစေဖို့၊ မှားယွင်းပြီး အပြစ်စီရင်ခြင်းမခံရဖို့၊ ပြစ်မှုနဲ့ ပြစ်ဒဏ်မျှတပြီး တိတိကျကျ မှန်မှန်ကန်ကန် မြန်မြန်ဆန်ဆန် စီရင်နိုင်ဖို့၊ တရားရုံးများ ဖြောင့်မတ်မှန်ကန်စေဖို့တို့ကို ဦးစားပေးဖော်ဆောင်သွားမှာဖြစ်ပါတယ်။ နိုင်ငံတစ်နိုင်ငံရဲ့ တည်ငြိမ်ရေးနဲ့ ဖွံ့ဖြိုးတိုးတက်စေဖို့အတွက် တရားဥပဒေစိုးမိုးရေးဟာ အဓိကကျတဲ့ အခြေခံ အုတ်မြစ်မရှိမဖြစ် လိုအပ်ပါတယ်။ ကျွန်တော်တို့အစိုးရအနေနဲ့ လူမှုရေး ပြန်လည် သင့်မြတ်ရေး၊ တရားမျှတမှုနဲ့ ငြိမ်းချမ်းရေးတို့ကို အထောက်အကူပြုစေရေးနဲ့ နိုင်ငံတော် ဖွံ့ဖြိုး တိုးတက်ရေးအတွက် ထိုက်သင့်တဲ့ ပြစ်ဒဏ်လွတ်ငြိမ်းချမ်းသာခွင့်တွေကိုလည်း စဉ်းစား ဆောင်ရွက်ပေးသွားမှာ ဖြစ်ပါတယ်။

နိဂုံးချုပ်အနေနဲ့ ပါတီစုံဒီမိုကရေစီစနစ် ခိုင်မာအောင် တည်ဆောက်ရေး၊ ဒီမိုကရေစီနဲ့ ဖက်ဒရယ် စနစ်ကို အခြေခံတဲ့ ပြည်ထောင်စုတည်ဆောက်ရေး၊ နိုင်ငံတော်ဖွံ့ဖြိုးတိုးတက်ရေး၊ ပြည်သူလူထုရဲ့ လူမှုစီးပွားဘဝ မြှင့်တင်ရေးစတဲ့ ကိစ္စရပ်တွေကို ကျွန်တော်ခေါင်းဆောင်တဲ့ အစိုးရအဖွဲ့က ဦးတည်ချက်၊ ရည်မှန်းချက်များ ချမှတ်ဆောင်ရွက်သွားမှာဖြစ်ပါတယ်။ ဒီလုပ်ငန်းတွေ၊ ကျွန်တော်တို့ နိုင်ငံတော်ကြီး လက်ရှိရင်ဆိုင်နေရတဲ့ စိန်ခေါ်မှုတွေကို ပြည်သူအားလုံးက အစိုးရနဲ့အတူ ပူးပေါင်းပြီး စည်းလုံးညီညွတ်မှုနဲ့ ရင်ဆိုင်ကျော်လွှားနိုင်မယ်လို့ ယုံကြည်ပါတယ်။ “ပြည်တွင်းအားသည် ပြည်တွင်းမှာသာရှိသည်” ဆိုတဲ့ စကားအတိုင်း တိုင်းရင်းသား ပြည်သူအားလုံး ပူးပေါင်း ဆောင်ရွက်မှသာ အောင်မြင်မှုရရှိနိုင်မှာလည်း ဖြစ်ပါတယ်။

ဒါကြောင့် နိုင်ငံရေးပါတီတွေ၊ အရပ်ဘက်အဖွဲ့အစည်းတွေ၊ စီးပွားရေးလုပ်ငန်းရှင်တွေ၊ တိုင်းရင်းသား အဖွဲ့အစည်းတွေနဲ့ ပြည်သူအားလုံးက ပူးပေါင်းလက်တွဲဆောင်ရွက်ကြဖို့လည်း ဖိတ်ခေါ်ပါတယ်။ ကျွန်တော်တို့ရဲ့ မတူကွဲပြားမှုတွေဟာ အားနည်းချက်လို့မယူဆဘဲ ညှိနှိုင်းဆွေးနွေးအဖြေရှာမှုများနဲ့ စွမ်းအားသစ်တွေရရှိအောင် ကြိုးစားတည်ဆောက်သွားကြရမှာ ဖြစ်ပါတယ်။ ကွဲပြားတဲ့ အမြင်တွေ၊ ယုံကြည်မှုတွေဟာ နောက်ခံအမျိုးမျိုးရှိပေမယ့်လည်း ကျွန်တော်တို့အားလုံးဟာ ဒီနိုင်ငံရဲ့ တစ်မြေတည်းဖွား တိုင်းရင်းသားညီအစ်ကိုများ ဖြစ်ကြတဲ့အတွက် ကျွန်တော်တို့ရဲ့ စည်းလုံးညီညွတ်မှု၊ ဇွဲလုံ့လတွေနဲ့ ကျွန်တော်တို့ရဲ့ ရည်မှန်းချက်ပန်းတိုင်ကို အောင်မြင်အောင် လျှောက်လှမ်းနိုင်မယ်လို့ ယုံကြည်ပါကြောင်း ပြောကြားရင်း နိဂုံးချုပ်အပ်ပါတယ်။

အားလုံးကို ကျေးဇူးတင်ပါတယ်။