ရန်ကုန် ဧပြီ ၂၇
မြန်မာနေရှင်နယ်လိဂ်ကလပ် ရတနာပုံအသင်းသည် လာမည့် ရာသီသစ်အတွက် ခြောက်ဦးမြောက် ပြည်တွင်းကစားသမား သစ်ခေါ်ယူလိုက်ပြီဖြစ်ပြီး အား/ကာသိပ္ပံအသင်း တောင်ပံကစားသမား သန်းတိုးအောင်ကို ခေါ်ယူခဲ့သည်။
ရတနာပုံအသင်းသည် အသင်းပိုင်ရှင် အပြောင်းအလဲပြုလုပ်၍ အသင်းအား ပြန်လည်တည်ဆောက်နေပြီး ကစားသမားသစ်များ ဆက်တိုက်ခေါ်ယူနေရာ သန်းတိုးအောင် မတိုင်မီက ဆွမ်လမန်၊ သက်ပိုင်ထွေး၊ ပြည့်ဖြိုးအောင် (ဂိုး)၊ သီဟထက်အောင်နှင့် မိုးဆွေတို့ကို ခေါ်ယူထားသည်။ သန်းတိုးအောင်သည် ရတနာပုံ ယူ-၁၉ အသင်းတွင် ကစားခဲ့သူဖြစ်ပြီး ပရော်ဖက်ရှင်နယ် ကစားသမားဘဝကို အား/ကာသိပ္ပံအသင်းတွင် ဖြတ်သန်းကာ ရတနာပုံအသင်းသို့ ပြန်လည်ရောက်ရှိလာခြင်းဖြစ်သည်။
ရတနာပုံအသင်းသည် ရာသီသစ်အတွက် ပြည်တွင်း၊ ပြည်ပ ကစားသမားသစ်များ ထပ်မံခေါ်ယူမည်ဖြစ်သည်။
သတင်း - ချစ်ကိုကို
ဓာတ်ပုံ - YDNB FC
