နေပြည်တော် ဇူလိုင် ၁၆

အမျိုးသားလွှတ်တော် ကိုယ်စားလှယ်များအား ဘဏ္ဍာရေးနှင့် အခွန်ဝန်ကြီးဌာန၏ လုပ်ငန်းဆောင်ရွက်မှုများ ရှင်းလင်းဆွေးနွေးခြင်း အခမ်းအနားကို ယနေ့မွန်းလွဲပိုင်းတွင် နေပြည်တော် အမျိုးသားလွှတ်တော် အဆောင်(၂) ၌ ကျင်းပသည်။

အခမ်းအနားသို့ အမျိုးသားလွှတ်တော်ဥက္ကဋ္ဌ ဦးအောင်လင်းဒွေး၊ ဒုတိယ ဥက္ကဋ္ဌ Jeng Phang နော်တောင်၊ အမျိုးသားလွှတ်တော် ကိုယ်စားလှယ်များ၊ ဘဏ္ဍာရေးနှင့် အခွန်ဝန်ကြီးဌာနမှ တာဝန်ရှိသူများ တက်ရောက်ကြသည်။

ဦးစွာ ရသုံးမှန်းခြေငွေစာရင်းဦးစီးဌာန ညွှန်ကြားရေးမှူးချုပ် ဒေါ်သီတာထွန်းက အရအသုံး ခန့်မှန်းခြေငွေစာရင်း ဆိုင်ရာအဓိပ္ပာယ်ဖွင့်ဆိုချက်နှင့် ဝေါဟာရများ၊ အရအသုံးခန့်မှန်း ခြေငွေစာရင်းတွင် ပါဝင်သော စာရင်းအမျိုးအစားများ၊ ဘဏ္ဍာရန်ပုံငွေအစီအစဉ်၊ ဘတ်ဂျက် စက်ဝန်း (Budget Cycle)၊ မူဝါဒအပေါ် အခြေခံ၍ နှစ်လတ်ဘဏ္ဍာရေးမူဘောင် တည်ဆောက်ခြင်း၊ ဘတ်ဂျက်ရေးဆွဲ စိစစ်တင်ပြခြင်း၊ ဥပဒေအတည်ပြု ပြဋ္ဌာန်းခြင်း၊ ဘတ်ဂျက်အကောင်အထည် ဖော်ဆောင်ရွက်ခြင်း၊ တာဝန်ပိုင်းခြား ဖော်ထုတ်ခြင်း၊ ကြီးကြပ်ခြင်း၊ အစီရင်ခံ စာတင်ပြခြင်းနှင့် စာရင်းစစ်ဆေးခြင်းတို့နှင့် စပ်လျဉ်း၍ ရှင်းလင်းသည်။

ထို့နောက် ပြည်တွင်းအခွန်များဦးစီးဌာန ညွှန်ကြားရေးမှူးချုပ် ဒေါ်မြမြဦးက မြန်မာနိုင်ငံ အခွန်စနစ်ဖွဲ့စည်းမှု၊ ပြည်တွင်း အခွန်များဦးစီးဌာနမှ တာဝန်ယူကောက်ခံ လျက်ရှိသော အခွန်ဥပဒေများ၊ အခွန် အမျိုးအစားများနှင့် အခွန်ဆိုင်ရာ ပြုပြင်ပြောင်းလဲရေး ဆောင်ရွက်နေမှုများနှင့် စပ်လျဉ်း၍ ရှင်းလင်းသည်။

ယင်းနောက် လွှတ်တော်ကိုယ်စားလှယ်များ၏ ဆွေးနွေးမေးမြန်းမှုများ၊ အကြံပြုချက်များအပေါ် ပြန်လည် ရှင်းလင်းဆွေးနွေးပေးခဲ့ကြောင်း သိရသည်။

သတင်းစဉ်