မန္တလေး ၁၁ ဧပြီ
မန္တလေးမြို့တွင် ပထမအကြိမ် ရှမ်းတိုင်းရင်းသားများရိုးရာသင်္ကြန်ကို ယနေ့မှာ ရှမ်းတိုင်းရင်းသားများ သာရေး နာရေးအသင်းတိုက်တွင် ကျင်းပပြုလုပ်သည်။
ရှမ်းတိုင်းရင်းသားများရိုးရာသင်္ကြန်ကို ရှမ်းတိုင်းရင်းသားအသင်းအဖွဲ့များ၊ ရှမ်းပြည်နယ်ဇာတိ အသင်းအဖွဲ့များ၊ လူမှုရေးအသင်းအဖွဲ့များ စုပေါင်းကျင်းပခြင်းဖြစ်သည်။
‘ရှမ်းတိုင်းရင်းသားအသင်းအဖွဲ့များအနေနဲ့ ကိုယ့်ရဲ့ရှမ်းတိုင်းရင်းသားရိုးရာ သင်္ကြန်လေးကို ဖော်ထုတ်ပြသချင်တာ၊ စုစုစည်းစည်းနဲ့ ဆောင်ရွက်စေချင်တာ စတဲ့ ရည်ရွယ်ချက်နဲ့ ခုလိုဆောင်ရွက်တာဖြစ်ပါတယ်’ ဟု ရှမ်းတိုင်းရင်းသားများရိုးရာသင်္ကြန်ဖြစ်မြောက်ရေး ကော်မတီဝင် စိုင်းအောင်မိန်း (မိုတိုင်း) ကပြောသည်။
အဆိုပါပွဲတော်တွင် ရှမ်းရိုးရာ ကုန်းဆွန်း ဘုရားရေသပ္ပါယ်ခြင်း၊ ရိုးရာ အဆိုအကများဖြင့် ဖျော်ဖြေခြင်းနှင့် ရိုးရာအစားစာများဖြင့် စတုဒီသာကျွေးခြင်းများ ပြုလုပ်ခဲ့ကြသည်။ ရှမ်းတိုင်းရင်းသားများရိုးရာသင်္ကြန်ပွဲတော်ကို ၂၀၁၉ ခုနှစ်တွင် စတင်ကျင်းပခဲ့ခြင်းဖြစ်ပြီး နှစ်စဉ် ဆက်လက်ဆောင်ရွက်သွားမည်ဖြစ်ကြောင်း သိရသည်။
အိမို့မို့ခိုင်
