နေပြည်တော် ၂၁ မေ

ပြည်ထောင်စုနယ်မြေ၊ နေပြည်တော် ဓာတုပစ္စည်းနှင့်ဆက်စပ်ပစ္စည်းများ အန္တရာယ်တားဆီး ကာကွယ်ရေး စစ်ဆေးရေးအဖွဲ့ဥက္ကဋ္ဌ နေပြည်တော်အထွေထွေအုပ်ချုပ်ရေးဦးစီးဌာန ညွှန်ကြားရေးမှူး ဦးထွန်းနိုင်ကို ဦးဆောင်၍ ဌာနဆိုင်ရာများ ပါဝင်သော အဖွဲ့သည် ယနေ့ နံနက် ၁၀ နာရီတွင် ပုဗ္ဗသီရီ မြို့နယ်အတွင်းရှိ ရေလုံဆေးသုတ်ခြင်း ဝန်ဆောင်မှုလုပ်ငန်းလုပ်ကိုင်မည့် Superb Stellar Myanmar ကုမ္မဏီမှ ဓာတုပစ္စည်းများအား သိုလှောင်ခြင်း၊ သုံးစွဲခြင်း၊ တင်သွင်းခြင်း၊ သယ်ယူပို့ဆောင်ခြင်းနှင့် လက်ဝယ်ထားရှိခြင်းတို့အတွက် လုပ်ငန်းလိုင်စင်လျှောက်ထားလာမှုနှင့် ပတ်သက်၍ အဆိုပါလုပ်ငန်း တည်နေရာသို့ ကွင်းဆင်းစစ်ဆေးဆောင်ရွက်ခဲ့ကြောင်း သိရသည်။

ထို့သို့စစ်ဆေးဆောင်ရွက်ရာတွင် နေပြည်တော် ဓာတုပစ္စည်းနှင့်ဆက်စပ်ပစ္စည်းများ အန္တရာယ် တားဆီးကာကွယ်ရေး စစ်ဆေးရေးအဖွဲ့ ဥက္ကဋ္ဌနှင့် တာဝန်ရှိသူများသည် လုပ်ငန်းဆောင် ရွက်ရာတွင် သတ်မှတ်ထားသော စံချိန်၊ စံညွှန်းများ၊ ညွှန်ကြားချက်များနှင့်အညီ ဆောင်ရွက်ထားရှိမှု ရှိ၊ မရှိနှင့် သုံးစွဲနေသောဓာတုပစ္စည်းများနှင့် ပတ်သက်၍ ပတ်ဝန်းကျင်ထိခိုက်မှု မရှိစေရေးအတွက် ဆောင်ရွက်ထားမှု အခြေအနေများ၊ လုပ်ငန်းခွင်အတွင်း မတော်တဆဖြစ်ပွား လာပါက အန္တရာယ်ကင်းရှင်းလျော့ နည်းစေရေး ကြိုတင်စီမံဆောင်ရွက်ထားရှိမှု အခြေအနေများအား လှည့်လည်ကြည့်ရှု့စစ်ဆေးရာ ကုမ္မဏီမှ တာဝန်ရှိသူများက ရှင်းလင်းပြသခဲ့ကြောင်း သိရသည်။

စိုးမိုး(ပြန်/ဆက်)