ပြည်ထောင်စုဝန်ကြီး ဒေါက်တာဖေမြင့် UNESCO အာရှ-ပစိဖိတ်ဒေသဆိုင်ရာ ညွှန်ကြားရေးမှုး Mr.Shigeru Aoyagi ဦးဆောင်သော အဖွဲ့အား လက်ခံတွေ့ဆုံ

နေပြည်တော် ၂၁ ဇွန်

ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်သည် ယနေ့ နံနက် ၁၁ နာရီတွင် UNESCO အာရှ-ပစိဖိတ်ဒေသဆိုင်ရာ ညွှန်ကြားရေးမှူး Mr.Shigeru Aoyagi နှင့် မြန်မာနိုင်ငံဆိုင်ရာ UNESCO ဌာနေကိုယ်စားလှယ် Ms.Min Jeong Kim တို့ ပါဝင်သော အဖွဲ့အား ပြည်ထောင်စုဝန်ကြီး၏ ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် မိတ်ဖက်အဖွဲ့အစည်းများနှင့် ပူးပေါင်း၍ မြန်မာနိ်ုင်ငံ ဒေသအနှံ့အပြား ရှိ ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံးများတွင် ဖွင့်လှစ်ထားသော လူထုအခြေပြုဗဟိုဌာန (Community Centres) များ၌ မီဒီယာနှင့် သတင်းအချက် အလက် သိနားလည်မှု (Media and Information Literacy -MIL) သင်တန်းများ ဖွင့်လှစ်ပို့ချနိ်ုင်ရေး၊ Fake News နှင့် အမုန်းစကား ( Hate Speech) များအပေါ် ပြန်လည်တုံ့ပြန်ဆောင်ရွက်နိ်ုင်မည့် အခြေအနေများ၊ သတင်းအချက်အလက် ရပိုင်ခွင့် ဥပဒေ (RTI Law) ရေးဆွဲနေမှု အခြေအနေများနှင့် အမျိုးသားစီမံခန့်ခွဲမှု ကောလိပ်တွင် ဖွင့်လှစ်သင်ကြားလျက်ရှိသည့် စာနယ်ဇင်း ပညာဘာသာရပ် သင်ရိုးညွှန်းတမ်းအား ခေတ်စနစ်နှင့်အညီ ပြန်လည်သုံးသပ် ပြင်ဆင်ရေးဆွဲရေးဆိုင်ရာ ကိစ္စရပ်များနှင့် ပတ်သက်၍ ဆွေးနွေးခဲ့ကြသည်။

(သတင်းစဉ်)