၁၂ ဇူလိုင်

ဂရိနိုင်ငံ ရှိ  ဂူတစ်လုံးထဲမှ ကျောက်ဖြစ်ရုပ်ကြွင်း တစ်ခုသည် အာဖရိကတိုက် ပြင်ပတွင်တွေ့ရသည့်  ခေတ်သစ်လူသားများ၏ ရှေးအကျဆုံးကြွင်းကျန်ရစ်သော ကျောက်ဖြစ်ရုပ်ကြွင်း တစ်ခုအဖြစ် ဂျာမန် သိပ္ပံပညာရှင်များက တွေ့ရှိခဲ့ကြသည်။

ဂျာမနီ နိုင်ငံ Tuebingen တက္ကသိုလ်မှ ပညာရှင်များပါဝင်သည့် သိပ္ပံပညာရှင်များသည်  ဂရိနိုင်ငံတောင်ပိုင်း ဂူတစ်လုံးအတွင်း တွေ့ရှိရသည့် ဦးခေါင်းခွံနှစ်လုံးကို ပြန်လည်ပုံသွင်းပြီး ရေဒီယိုဓါတ်ရောက်ခြည်သုံးကာ သက်တမ်းစစ်ဆေးမှု ပြုလုပ်ခဲ့ကြသည်။

ဦးခေါင်းခွံတစ်ခုသည် လွန်ခဲ့သောနှစ်ပေါင်း နှစ်သိန်းတစ်သောင်း (၂၁၀ဝ၀ဝ) က ကျောက်ဖြစ်ရုပ်ကြွင်း တစ်ခုဖြစ်သည်။ အခြားဦးခေါင်းခွံတစ်ခုသည် လွန်ခဲ့သော နှစ်ပေါင်း တစ်သိန်းခုနှစ်သောင်း က ဥရောပကျောက်ခေတ်လူသား ဖြစ်သည်။

ယခုတိုင်ယုံကြည်ထားကြသည့် အချိန်ထက် အစောပိုင်းနှစ်ပေါင်းသောင်းချီကတည်းက ခေတ်သစ် လူသားများသည် အာဖရိကတိုက်မှ ထွက်ခွာကာ ဥရောပကျောက်ခေတ်လူသားများနှင့် အခြားလူသားမျိုးနွယ်များ တို့နှင့်အတူ ဆုံမိခဲ့ကြသည် ဟူသော သက်သေပြချက်များကို တွေ့ရှိရကြောင်း ထိုသိပ္ပံပညာရှင်များက ဆိုသည်။

အဆိုပါ သိပ္ပံပညာရှင်များသည် ၎င်းတို့၏တွေ့ရှိချက်ကို ဗြိတိသျှသိပ္ပံဂျာနယ် Nature တွင် ၁၀ ရက်နေ့က ဖော်ပြခဲ့သည်။

အာဖရိကတွင် တွေ့ရှိခဲ့သော လူသားအစဖြစ်သည့်  ရှေးအကျဆုံးဟုသိရှိခဲ့သည့် ခေတ်သစ်လူသား ကျောက်ဖြစ်ရုပ်ကြွင်းမှာ နှစ်ပေါင်း သုံးသိန်း (၃၀ဝ၀ဝ၀)ခန့်ဖြစ်ကြောင်းနှင့်  အရှေ့အလယ်ပိုင်းတွင် တူးဖော်ရရှိခဲ့သော ရုပ်ကြွင်းတစ်ခုမှာ နှစ်ပေါင်းတစ်သိန်းရှစ်သောင်း (၁၈၀ဝ၀ဝ) ရှိကြောင်း ဖော်ပြထားသည်။

ကိုးကား- အန်အိတ်ချ်ကေ

ဘာသာပြန် - မြင့်မြင့်ချို