ပွင့်ဖြူမြို့နယ်၌ ဧရာဝတီ မြစ်ကမ်းပါး ပြိုကျမှုကြောင့် လူနေအိမ် ၃၅ လုံး ဘေးလွတ်ရာသို့ ကြိုတင်ပြောင်းရွှေ့ရ

ပွင့်ဖြူ ၂၂ ဇူလိုင်

မကွေးတိုင်းဒေသကြီး၊ ပွင့်ဖြူမြို့နယ် အရှေ့လေးအိမ်ကျေးရွာအုပ်စု မြင်းခြံစုကျေးရွာ၊ ရွှေလှေကျေးရွာအုပ်စု ဂါတ်ကုန်းကျေးရွာ၊ နန်းတော်ကျွန်းကျေးရွာအုပ်စု ထူးကျေးရွာ၊ ဘီးဇပ်ခုံကျေးရွာ၊ သံကိုင်းကျေးရွာအုပ်စု သိမ်ကုန်းကျေးရွာတို့တွင် ဇူလိုင် ၂၂ ရက် နံနက် ၉ နာရီက ဧရာဝတီမြစ်ကမ်းပါး ပြိုကျလာမှုကြောင့် လူနေအိမ် ၃၅ လုံး ဘေးလွတ်ရာသို့ ကြိုတင်ပြောင်းရွှေ့ခဲ့ရကြောင်း ပွင့်ဖြူမြို့နယ် အထွေထွေအုပ်ချုပ်ရေးဦးစီးဌာနရုံးမှ သိရသည်။

အဆိုပါ ကျေးရွာများသည် ဧရာဝတီမြစ်ကမ်းဘေးတွင် တည်ရှိသည့် ကျေးရွာများဖြစ်သည့်အတွက် ဒေသခံ ကျေးလက်နေပြည်သူများအနေဖြင့် ယခုလို မြစ်ကမ်းပါးပြိုကျမှုဒဏ်ကို နှစ်စဉ်ကြုံတွေ့နေရကြောင်း သိရသည်။ ယနေ့ နံနက်ပိုင်းက မြစ်ကမ်းပါးပြိုကျမှုမှာ ကျေးရွာများနှင့် အလွန်နီးကပ်လာသဖြင့် ဒေသခံပြည်သူများ အန္တရာယ်ကင်းဝေးစေရန်အတွက် မြို့နယ်အထွေထွေအုပ်ချုပ်ရေးဦးစီးဌာန၏ ဦးဆောင်မှုဖြင့် ကျေးရွာနေပြည်သူများနှင့် ကျေးရွာရှိ လူမှုကူညီရေးအသင်းအဖွဲ့များက ဝိုင်းဝန်းပူးပေါင်းကာ မြင်းခြံစုကျေးရွာတွင် လူနေအိမ် ၂၁ လုံး၊ ဂါတ်ကုန်းကျေးရွာတွင် လူနေအိမ် ၇ လုံး၊ ထူးကျေးရွာတွင် လူနေအိမ် ၄ လုံး၊ ဘီးဇပ်ခုံကျေးရွာတွင် လူနေအိမ် ၁ လုံး၊ သိမ်ကုန်း ကျေးရွာတွင် လူနေအိမ် ၂ လုံး စုစုပေါင်း လူနေအိမ် ၃၅ လုံးအား ဘေးလွတ်ရာသို့ ပြောင်းရွှေ့ကူညီဆောင်ရွက်ပေးခဲ့ကြောင်း သိရသည်။ မြစ်ကမ်းပါးပြိုကျမှုကြောင့် အခြား လူနှင့် တိရစ္ဆာန် ထိခိုက်မှုမရှိကြောင်း သိရသည်။

ရဲဝင်းနိုင် (ညောင်ဦး)