အောင်လံ ၂၇ ဩဂုတ်
မကွေးတိုင်းဒေသကြီး အောင်လံမြို့နယ် မိုးကောင်းကျေးရွာ၌ စက်မှုဝန်ကြီးဌာနနှင့် တိုင်းဒေသကြီးအစိုးရအဖွဲ့တို့ ပူးပေါင်းစီစဉ်သည့် စက်မှုနှင့် အသက်မွေးပညာရွေ့လျားသင်တန်း အမှတ်စဉ်(၁၀၈)၊ အခြေခံ အိမ်သုံး လျှပ်စစ်ဝါယာသွယ်တန်းခြင်းသင်တန်း ဖွင့်ပွဲအခမ်းအနားကို ဩဂုတ် ၂၇ ရက် နံနက် ၉ နာရီခွဲက ကျေးရွာ ဓမ္မာရုံတွင်ကျင်းပပြုလုပ်ရာ တိုင်းဒေသကြီးအစိုးရအဖွဲ့ အလုပ်သမားရေးရာဝန်ကြီး တက်ရောက် ဖွင့်လှစ်ခဲ့ကြောင်းသိရသည်။
ဖွင့်ပွဲအခမ်းအနားသို့ မြို့နယ်အုပ်ချုပ်ရေးမှူး ဦးဝင်းသန်းနှင့် မြို့နယ်အဆင့် ဌာနဆိုင်ရာအကြီးအကဲများ၊ ကျေးရွာအုပ်ချုပ်ရေးမှူးနှင့်သင်တန်းသားများတက်ရောက်ကြသည်။ အခမ်းအနားတွင် တိုင်းဒေသကြီးအလုပ်သမားရေးရာဝန်ကြီး ဦးမြင့်ဆွေက သင်တန်းဖွင့်အမှာစကားပြောကြားပြီး အမှတ်(၅)စက်မှုသင်တန်းကျောင်း(မကွေး)မှ ကျောင်းအုပ်ကြီး ဦးသန့်ဇင်က သင်တန်းနှင့်ပတ်သက်၍ရှင်းလင်းပြောကြားသည်။ ထို့နောက် တက်ရောက်လာကြသော ဧည့်သည်တော်များက သင်တန်းအတွက်ပြင်ဆင်ထားရှိမှုများကိုလေ့လာကြည့်ရှုကြသည်။
သင်တန်းကို ဩဂုတ်လ(၂၆)ရက်မှ စက်တင်ဘာ(၇)ရက်နေ့အထိ သင်ကြားပို့ချမည်ဖြစ်ကြောင်း နှင့် သင်တန်းသို့ မိုးကောင်းနှင့် ပတ်ဝန်းကျင်ကျေးရွာများမှ သင်တန်းသား(၃၅)ဦး တက်ရောက်လျှက်ရှိကြောင်းသိရသည်။
သိန်းလွင်(အောင်လံ)
