သာယာဝတီခရိုင် နတ်တလင်းမြို့နယ်တွင် မိုးရေနှင့် ဂူကြီးချောင်းရေလျှံမှုကြောင့် စာသင်ကျောင်းအချို့ ပိတ်ထားရ

နတ်တလင်း ၄ စက်တင်ဘာ

ပဲခူးတိုင်းဒေသကြီး သာယာဝတီခရိုင် နတ်တလင်းမြို့နယ် အနောက်ခြမ်း ကျေးရွာများတွင် ယနေ့နံနက် ၉ နာရီ၌ ချောင်းခွအုပ်စုကွက်ကြီးကျေးရွာ၊ လူနေအိမ်ခြေ ၁၂၀၊ ဘုန်းကြီးကျောင်းတစ်ကျောင်းနှင့် မူလတန်းကျောင်း၊ သာယာကုန်းအုပ်စု၊ ကျခတ်အိုင်ရွာလူနေအိမ်(၇၂)လုံး၊ မူလတန်းကျောင်း၊ သာယာကုန်းရွာလူနေအိမ်ခြေ ၁၈၀၊ မူလတန်းကျောင်း၊ ကျီးပင်ဆင်ဂေါင်းရွာ လူနေအိမ်(၁၇၉)လုံးတို့သည် ပြီးခဲ့သည့် စက်တင်ဘာလ ၁ ရက်နှင့် ၂ ရက်နေ့များ မိုးသည်းထန်စွာ ရွာသွန်းခြင်း ဂူကြီးချောင်းရေကြီး ရေလျှံမှုတို့ကြောင့် နေအိမ်များ စာသင်ကျောင်းများအတွင်း ရေများဝင်ရောက်သဖြင့် စာသင်ကျောင်းများပိတ်ထားရကြောင်း။

အဆိုပါ ရေကြီးရေလျှံမှုဖြစ်နေခြင်းအား တာပွန်မြို့အုပ်ချုပ်ရေးမှူး ဦးစိုးရွှေ၊ နယ်မြေရဲစခန်းမှုး ရဲအုပ်အောင်ဇော်မိုး၊ နယ်မြေမီးသတ်စခန်းမှတပ်ကြပ်ကြီးအောင်ကိုလွင်၊ တပ်ကြပ်ကြီးဝေယံထွဋ်၊ တာပွန်ပရဟိတအသင်းဥက္ကဋ္ဌဦးအောင်မြင့်ဦးနှင့် အသင်းသားများ ရဲတပ်ဖွဲ့မီးသတ်တပ်ဖွဲ့တို့ သွားရောက်၍ သာယာကုန်းကျေးရွာအုပ်စု အုပ်ချုပ်ရေးမှူး ဦးဇေယျာမင်းနှင့် ဒေသခံပြည်သူများ ပူးပေါင်းကာလိုအပ်သည်များကို ကူညီဆောင်ရွက်ပေးကြကြောင်းနှင့် NGO အဖွဲ့အစည်းများ စေတနာရှင်များက ရေဘေးသင့်ပြည်သူများအား ထမင်းထုပ်များ ဖြန့်ဝေလှူဒါန်းပေးကြကြောင်း သိရသည်။

တင်မြင့် (နတ်တလင်း)