ကျောက်မဲ   ၅    စက်တင်ဘာ  

ကျောက်မဲမြို့နယ်၊ စည်ပင်သာယာရေးဌာနမှ အမှတ်(၈)ရပ်ကွက်၊ ကျောက်မဲကြီးကျေးရွာသွားလမ်း မြေသားလမ်းအား ကျေးရွာနေပြည်သူများ ရာသီမရွေး အဆင်ပြေစွာ သွားလာနိုင်ရေးအတွက် ကတ္တရာလမ်းခင်းခြင်း လုပ်ငန်းကို ကျောက်မဲမြို့နယ်၊ စည်ပင်သာယာရေးဌာနမှ သြဂုတ်လ(၂၅)ရက်နေ့တွင် စတင်၍ လုပ်ငန်းခွင် အင်ဂျင်နီယာ ဒေါ်ဝေဝေသိန်း၊ ကြီးကြပ်အင်ဂျင်နီယာ ဦးဆန်းဝင်းတို့က ဆောင်ရွက်လျက်ရှိရာ စက်တင်ဘာလ(၄)ရက်နေ့တွင် မြို့နယ်စည်ပင်အမှုဆောင်အရာရှိ ဒုတိယညွှန်ကြားရေးမှူး ဦးစိုးနိုင်ဦးက လမ်းအရည်အသွေး ကောင်းမွန်စေရေး ကြီးကြပ်ဆောင်ရွက်ခဲ့ကြောင်း သိရသည်။

ကျောက်မဲမြို့၊ ကျောက်မဲကြီးကျေးရွာနေ ပြည်သူများ နေ့စဉ်သွားလာ အသုံးပြုနေသည့် လမ်းမှာ ယခင်က မြေသားလမ်းဖြစ်ပြီး မိုးတွင်းကာလများတွင် လမ်းပေါ်၌ ရေကျော်၍ ရွံ့ဗွက်များ ဖြစ်ပေါ်နေကာ ရဟန်းသံဃာတော်များ၊ ကျေးရွာနေပြည်သူများ၊ ကျောင်းသား/သူများ သွားလာရာတွင် အဆင်မပြေမှုများနှင့် ယာဉ်အန္တရာယ် စိုးရိမ်နေရပြီး ယခုနှစ်တွင် မြို့နယ်စည်ပင်သာယာရေးဌာနမှ ၂၀၁၈-၂၀၁၉ ဘဏ္ဍရေးနှစ် ဌာနခွင့်ပြုရန်ပုံငွေကျပ်(၁၃၅ ဒသမ ၃)သိန်းဖြင့် ကျေးရွာနေပြည်သူများ ရာသီမရွေး အဆင်ပြေစွာ သွားလာနိုင်ရေးအတွက် အဆိုပါမြေသားလမ်းအား လမ်းအရှည်(၉၅၀)ပေ၊ အကျယ်(၁၂)ပေရှိ ကတ္တရာလမ်းအဖြစ် အဆင့်မြှင့်တင် ဆောင်ရွက်လျက်ရှိကြောင်း ခရိုင်ပြန်/ဆက်မှ သိရသည်။ 

MDN