နေပြည်တော် ၁၀ စက်တင်ဘာ
လူကုန်ကူးမှုတိုက်ဖျက်ရေးနေ့ အထိမ်းအမှတ် အသိပညာပေးဟောပြောပွဲ အခမ်းအနားကို ယနေ့ မွန်းလွဲ(၁)နာရီတွင် ဒက္ခိဏသီရိမြို့နယ်၊ အမှတ်(၁၈) အခြေခံပညာအထက်တန်းကျောင်းခန်းမ၌ ကျင်းပသည်။
အခမ်းအနားတွင် ဒက္ခိဏသီရိမြို့နယ် ပညာရေးမှူး ဒေါ်ခင်ဟန်က အမှာစကားပြောကြားပြီး အမှတ်(၁) လူကုန်ကူးမှု တားဆီးနှိမ်နင်းရေးအဖွဲ့မှ ဒုရဲအုပ်ကျော်လင်းထွန်းက လူကုန်ကူးမှု တားဆီးကာကွယ်ရေး အကြောင်းကိုလည်းကောင်း၊ စာရေးဆရာမ ဒေါ်သက်သက်နွယ်က သက်ငယ်မုဒိမ်းမှု တားဆီးကာကွယ်ရေး အကြောင်းကိုလည်းကောင်း အသီးသီးဟောပြောကြသည်။
ထို့နောက် မြို့နယ်ပညာရေးမှူး ဒေါ်ခင်ဟန်နှင့် တာဝန်ရှိသူများက လူကုန်ကူးမှုတိုက်ဖျက်ရေးနေ့ အထိမ်းအမှတ် အထက်တန်းအဆင့်၊ အလယ်တန်းအဆင့် စာစီစာကုံးပြိုင်ပွဲနှင့် ပန်းချီပြိုင်ပွဲတွင် ဆုရရှိကြသည့် ကျောင်းသားကျောင်းသူများကို ဆုများပေးအပ်ချီးမြှင့်ကြသည်။
ယင်းနောက် ဆရာ/ဆရာမများနှင့် ကျောင်းသားကျောင်းသူများက ဒက္ခိဏခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခင်းကျင်းပြသထားသည့် လူကုန်ကူးမှုတိုက်ဖျက်ရေး၊ မူးယစ်ဆေးဝါးအကြောင်း၊ သဘာဝဘေးအန္တရာယ်အကြောင်း စသည့် အသိပညာပေး နံရံကပ်ပြဘုတ်များကို စိတ်ဝင်တစား ကြည့်ရှုလေ့လာခဲ့ကြကြောင်း သိရသည်။
ထွန်းထွန်းဝင်း
