မန္တလေး ၆ အောက်တိုဘာ
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေးဦးစီးဌာနနှင့် မြန်မာနိုင်ငံ ကော်ဖီအသင်းတို့ ပူးပေါင်းကျင်းပသော မြန်မာ့ကော်ဖီပွဲတော်(၂၀၁၉)ကို မန္တလေးမြို့ရှိ မန္တလာသီရိ အားကစားကွင်းတွင် ယနေ့ နံနက် ၁၀ နာရီက ကျင်းပပြုလုပ်သည်။
အဆိုပါ ကော်ဖီပွဲတော်တွင် မြန်မာနိုင်ငံဒေသအသီးသီးမှ ထွက်ရှိသော ကော်ဖီများအား ခင်းကျင်းပြသလျက်ရှိပြီး ပြည်ပအဖွဲ့အစည်းများ၊ ကော်ဖီထုတ်လုပ်သူများ၊ ကော်ဖီလုပ်ငန်း လုပ်ကိုင်သူများ၊ ကော်ဖီသွင်းအားစု လုပ်ကိုင်သူများ၊ စားသောက်ဆိုင်လုပ်ကိုင်သူများ အစရှိသော ကော်ဖီလုပ်ငန်းများအပြင် ကော်ဖီပင်အမျိုးမျိုး၊ ကော်ဖီပင်ကြီးထွားပုံအဆင့်ဆင့်၊ ကော်ဖီစေ့ ထုတ်လုပ်ပုံအဆင့်ဆင့် တို့အား ပြသထားသော ပြခန်းများလည်းပါဝင်သည်။
အဆိုပါ ကော်ဖီပွဲတော်ကို အောက်တိုဘာ ၆ ရက်မှ ၇ ရက်ထိ ကျင်းပသွားမည်ဖြစ်ပြီး ဆိုင်ခန်းပေါင်း (၃၆)ခန်းပါဝင်ကာ မြန်မာ့ကော်ဖီအရည်အသွေး မြှင့်တင်ရန်နှင့် ဈေးကွက်ပိုမို ချဲ့ထွင်နိုင်ရန် ရည်ရွယ်ကျင်းပခြင်းဖြစ်ကြောင်းသိရပြီး မည်သူမဆို လာရောက်လေ့လာ နိုင်ကြောင်း သိရသည်။
သန်းဇော်မင်း(ပြန်/ဆက်)
