ဗန်းမော် ၂၀ အောက်တိုဘာ
ကချင်ပြည်နယ် ဗန်းမော်မြို့၌ အောက်တိုဘာလ ၂၀ ရက် နံနက် ၉ နာရီက မြန်မာ့ရိုးရာလှေသဘင်ပွဲတော် ဖွင့်ပွဲအခမ်းအနားနှင့် လှေလှော်ပြိုင်ပွဲကို မင်းကုန်းရပ်ကွက် ဂေါ်ရာကန်(ခ)မေတ္တာမွန် မင်္ဂလာရေကန်တော်တွင် ကျင်းပသည်။
ရှေးဦးစွာ ပြည်နယ်ဗမာ တိုင်းရင်းသားလူမျိုးရေးရာဝန်ကြီး ဦးခင်မောင်မြင့်(ခ)ဦးဒိတ်နှင့် ပြည်သူ့လွှတ်တော်ကိုယ်စားလှယ် ဦးအောင်သိန်းတို့က အဖွင့်အမှာစကားပြောကြားပြီး ကချင်ပြည်နယ် အစိုးရအဖွဲ့မှ ထောက်ပံ့ငွေ(၁၂၂၃၄၀ဝ၀) ကျပ်နှင့် အားကစားဝတ်စုံ(၅၈၈)စုံအား ပြည်နယ်ဗမာ တိုင်းရင်းသားလူမျိုးရေးရာဝန်ကြီး ဦးဒိတ်(ခ)ဦးခင်မောင်မြင့်နှင့် လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီး ဦးဇော်ဝင်းတို့မှ ပေးအပ်ရာ တာဝန်ရှိသူများမှ လက်ခံရယူခဲ့သည်။
ဆက်လက်၍ ကချင်ပြည်နယ်လွှတ်တော်ဥက္ကဌ ဦးထွန်းတင်နှင့် ဒုတိယဥက္ကဋ္ဌ ဦးဒိန်ခန်ဖုန်(ခ)ခန်လင်၊ ပြည်နယ်ဗမာ တိုင်းရင်းသားလူမျိုးရေးရာဝန်ကြီး ဦးခင်မောင်မြင့်(ခ)ဦးဒိတ်၊ လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီး ဦးဇော်ဝင်း၊ ပြည်သူ့လွှတ်တော်ကိုယ်စားလှယ် ဦးအောင်သိန်း၊ ပြည်နယ် လွှတ်တော်ကိုယ်စားလှယ် ဦးဇော်သင်းတို့က မြန်မာ့ရိုးရာလှေသဘင် ပွဲတော်အား ဖဲကြိုးဖြတ်ဖွင့်လှစ်ပေးခဲ့ပြီး အလှပြရေယာဉ်များဖြင့် လှည့်လည်လှော်ခတ် ပြသခဲ့ကြသည်။
အဆိုပါ မြန်မာ့ရိုးရာလှေသဘင်ပွဲတော်တွင် ဗန်းမော်မြို့နယ်အတွင်းရှိ ရပ်ကွက်/ကျေးရွာများမှ ပြိုင်ပွဲဝင်လှေလှော်အသင်း(၅၂)သင်း ဝင်ရောက်ယှဉ်ပြိုင်မည်ဖြစ်ပြီး အမျိုးသား ၂၁ တက်၊ ၁၇ တက်၊ ၉ တက် ပြိုင်ပွဲနှင့် အမျိုးသမီး ၁၇ တက်၊ ၉ တက် ပြိုင်ပွဲများ ပါဝင်မည်ဖြစ်ကာ ပြိုင်ပွဲမှာ ရက်သတ္တနှစ်ပတ်ခန့် ကြာမြင့်မည်ကြောင်း သိရသည်။
ဝင်းနိုင်(ကချင်မြေ)
