ဗန်းမော်  ၂   နိုဝင်ဘာ

ကချင်ပြည်နယ် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနနှင့် ဒိန်းမတ်လူမှုအဖွဲ့အစည်း (DRC/DDG) တို့ပူးပေါင်း၍ ဗန်းမော်ခရိုင်အတွင်းရှိ နေရပ်စွန့်ခွာစခန်းအသီးသီးနေ ဒေသခံပြည်သူများ၏ လက်မှုထုတ်ကုန် ပစ္စည်းများ ဈေးကွက်ပြပွဲ အခမ်းအနားကို နိုဝင်ဘာ ၁ ရက် နံနက် ၉ နာရီက ဗန်းမော်မြို့ မြို့တော်ခန်းမတွင် ကျင်းပသည်။

ရှေးဦးစွာ ဗန်းမော်ခရိုင် အထွေထွေအုပ်ချုပ်ရေးဦးစီးဌာနမှ ဒုတိယခရိုင်အုပ်ချုပ်ရေးမှူး ဦးလင်းသန့်၊ ကချင်ပြည်နယ် ဘေးအန္တရာယ်စီမံခန့်ခွဲရေးဦးစီးမှူး ဒေါ်လှကေသီမာ၊ ဒိန်းမတ်လူမှုအဖွဲ့အစည်း တာဝန်ခံကိုယ်စားလှယ် Mr, Julio တို့က အမှာစကားများ ပြောကြားသည်။

ထို့နောက် ဒိန်းမတ်လူမှုအဖွဲ့အစည်း (DRC/DDG)မှ တာဝန်ခံကိုယ်စားလှယ် Mr, Julio က နေရပ်စွန့်ခွာစခန်းနေ ပြည်သူများ၏ လက်မှုထုတ်ကုန်ဈေးကွက်ပြပွဲ ကျင်းပပေးရခြင်းနှင့် စပ်လျဉ်း၍ ရှင်းလင်းပြောကြားကာ တာဝန်ရှိသူများက ဈေးကွက်ပြပွဲအား ဖဲကြိုးဖြတ် ဖွင့်လှစ်ပေးခဲ့သည်။

အဆိုပါပြပွဲတွင် နေရပ်စွန့်ခွာစခန်းအသီးသီးမှ ဒေသခံပြည်သူများ၏ လက်မှုပညာဖြင့် ထုတ်လုပ်ထားသည့် ဆံထိုး၊ ဘီးကုပ်၊ ခေါင်းစည်းကြိုး၊ လေးခွ၊ ရိုးရာခါးကွင်း၊ သော့တွဲ၊ ဝါးဖြင့်ပြုလုပ်ထားသည့် မီးအိမ်၊ တစ်ရှူးဘောက်၊ ဖုန်းစင်၊ လင်ဗန်း၊ စားပွဲခုံ၊ ကုတင် စသည်တို့အပြင် အိမ်သုံးပစ္စည်းများနှင့် စားသောက်ကုန်ပစ္စည်းများကို ခင်းကျင်းပြသထားပြီး နိုဝင်ဘာ၂ ရက်အထိ ရောင်းချသွားမည်ဖြစ်ကြောင်း သိရသည်။

ဝင်းနိုင်(ကချင်မြေ)