ဒဂုံ ၆ နိုဝင်ဘာ
၂၀၁၉ ခုနှစ်အတွက် နိုင်ငံတစ်ဝန်းလုံး ဝက်သက်-ဂျိုက်သိုးကာကွယ်ဆေးအပိုဆောင်း အစုလိုက် ထိုးနှံခြင်းလုပ်ငန်း အသိပညာပေးဆွေးနွေးပွဲကို ရန်ကုန်တိုင်းဒေသကြီး၊ ဒဂုံမြို့နယ်၊ ပြည်သူ့ ကျန်းမာရေး ဦးစီးဌာန ရုံးခန်းမဆောင်၌ ယနေ့နံနက်၉နာရီက ဆောင်ရွက်ခဲ့ကြောင်းသိရသည်။
ဆွေးနွေးပွဲတွင် ဒဂုံမြို့နယ်အထွေထွေအုပ်ချုပ်ရေး ဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးအောင်ကိုကိုက အဖွင့်အမှာစကား ပြောကြားပေးပြီး မြို့နယ်ပြည်သူ့ကျန်းမာရေး ဦးစီး ဌာနမှူး ဒေါက်တာရွှေပြည်က၂၀၁၉ခုနှစ်အတွင်း တစ်နိုင်ငံလုံးအတိုင်းအတာဖြင့် နိုဝင်ဘာ ၂၆ ရက်နေ့မှ ၂၈ ရက်နေ့ အထိအသက်(၉)လမှစ၍(၅)နှစ်ခွဲထိကလေးငယ်များအား ဝက်သက်-ဂျိုက်သိုး ကာကွယ်ဆေးအပိုဆောင်း အစုလိုက်ထိုးနှံခြင်းလုပ်ငန်း ဆောင်ရွက်မည်ဖြစ်၍ မိမိတို့မြို့နယ်၊ ရပ်ကွက်အတွင်းရှိ ကလေးငယ်များ ကျန်ရှိမှုမရှိစေရေး ဝိုင်းဝန်း ပူးပေါင်း ဆောင်ရွက်ပေးစေလိုကြောင်းနှင့် ကာကွယ်ဆေးထိုးနှံရာတွင်လည်း သိရှိရမည့်အချက်များ၊ တစ်နိုင်ငံလုံး အနေဖြင့် ၂၀၂၃ ခုနှစ်တွင် ဝက်သက် -ဂျိုက်သိုး ရောဂါပပျောက်ကင်းစင် ရေးတို့ကို အသိပညာပေး ဆွေးနွေးပေးသည်။
ထို့နောက် ဆွေးနွေးပွဲအပြီးတွင် တက်ရောက်လာကြသော ဌာနဆိုင်ရာများကသိရှိလိုသည့်အချက် များ မေးမြန်း ဆွေးနွေးရာ ဒေါက်တာရွှေပြည်က ပြန်လည်ရှင်းလင်းသည်။ ယင်းကာကွယ်ဆေးထိုး လုပ်ငန်းကို ရန်ကုန်တိုင်းဒေသကြီးအတွင်းရှိ မြို့နယ်များတွင်လည်း သတ်မှတ်ရက်အတွင်း တစ်ချိန်တည်း ကာကွယ်ဆေးထိုးပေးမည်ဖြစ်ကြောင်း တာဝန်ရှိသူထံမှ သိရသည်။
ဇာဖြူဝင်း(ပြန်/ဆက်)
