ဒေးဒရဲမြို့နယ်တွင် တိုးမြစ်ကမ်းပါးနိမ့်လျှောဆင်းခြင်းကြောင့် လူနေအိမ်များဘေးလွတ်ရာသို့ ပြောင်းရွှေ့

ဒေးဒရဲ ၁၄ နိုဝင်ဘာ

ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် ကျုံဘုတ်ကျေးရွာအုပ်စု စက်ကုန်းကျေးရွာတွင် ယနေ့ မွန်းလွဲ ၂ နာရီအချိန်က တိုးမြစ်ကမ်းပါးနိမ့်လျှောဆင်းခြင်းကြောင့် မြေပြိုကျမှုများ ဖြစ်ပေါ်ခဲ့ရာ လူနေအိမ်များ ဘေးလွတ်ရာသို့ ပြောင်းရွှေ့ခဲ့ကြောင်း သိရသည်။

တိုးမြစ်ကမ်းပါးနိမ့်လျှောဆင်းခြင်းကြောင့် အလျား ပေ ၁၂၀ ၊ အနံ ပေ ၈၀ ခန့် မြေပြိုကျမှုများ ဖြစ်ပေါ်ခဲ့ပြီး သွပ်မိုး၊ ပျဉ်ကာ၊ ပျဉ်ခင်း လူနေအိမ် နှစ်လုံးနှင့် သွပ်မိုး၊ ကျောက်ပြားကာ၊ ပျဉ်ခင်း လူနေအိမ် တစ်လုံး၊ စုစုပေါင်း လူနေအိမ် သုံးလုံးအား ဖြိုဖျက်ကာ မိသားစုဝင်များအား ဘေးလွတ်ရာ ဆွေမျိုးများထံသို့ ပြောင်းရွှေ့နေရာချထားခဲ့ပြီး မြေပြိုကျမှုကြောင့် လူနှင့်တိရစ္ဆာန်များ ထိခိုက်သေဆုံးခြင်း မရှိကြောင်းသိရသည်။

အဆိုပါ မြေပြိုကျသည့်နေရာသို့ မြို့နယ်အုပ်ချုပ်ရေးမှူး ဦးထက်မြက်အောင်၊ မီးသတ်ဦးစီးမှူး ဦးတင်ဌေးနှင့် အဖွဲ့များ သွားရောက်၍ လိုအပ်သည်များကို လမ်းညွှန်မှာကြားခဲ့ပြီး မိသားစုဝင်များအတွက် လိုအပ်သောထောက်ပံ့မှုများရရှိရေး စီစဉ်ဆောင်ရွက်ပေး လျက်ရှိကြောင်း သိရသည်။

မြင့်မြင့်ခိုင်(ပြန်/ဆက်)