ပြည်ထောင်စုဝန်ကြီး ဒေါက်တာဖေမြင့် အမျိုးသားစာပေဆုများနှင့် စာပေဗိမာန်စာမူဆုများ၊ ဆုချီးမြှင့်ခြင်း အခမ်းအနား ကျင်းပနိုင်ရန်အတွက် ကြိုတင်ညှိနှိုင်းအစည်းအဝေးသို့ တက်ရောက်

ရန်ကုန် ၁၈ နိုဝင်ဘာ

ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဖေမြင့်သည် ယနေ့နံနက်ပိုင်းက ရန်ကုန်မြို့ရှိ မြန်မာ့အသံနှင့် ရုပ်မြင်သံကြားတွင် ပြုလုပ်သည့် ၂၀၁၈ ခုနှစ် အတွက် အမျိုးသာစာပေတစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆုများ၊ ဆုချီးမြှင့်ခြင်းအခမ်းအနား ကျင်းပနိုင်ရန်အတွက် ကြိုတင်ညှိနှိုင်းအစည်းအဝေးသို့ တက်ရောက်သည်။

အစည်းအဝေးသို့ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ညွှန်ကြားရေးမှူးချုပ် ဦးရဲနိုင်၊ ပုံနှိပ်ရေးနှင့်ထုတ်ဝေရေးဦးစီးဌာနမှ ညွှန်ကြားရေးမှူးချုပ် ဦးအောင်မျိုးမြင့်နှင့် တာဝန်ရှိသူများ တက်ရောက်ဆွေးနွေးကြသည်။

အစည်းအဝေးတွင် ၂၀၁၈ ခုနှစ်အတွက် အမျိုးသာစာပေတစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆုများအတွက် ဆုချီးမြှင့်ခြင်းအခမ်းအနား ကျင်းပရေး၊ ဧည့်သည်တော်များ ကြိုဆိုနေရာချထားရေးနှင့် ဧည့်ခံရေး၊ အခမ်းအနားပြင်ဆင်ရေးနှင့် ဆုချီးမြှင့်ရေး၊ မှတ်တမ်းတင် ဓာတ်ပုံရိုက်ကူးရေးဆိုင်ရာများ ဆွေးနွေးကြသည်။

၂၀၁၈ ခုနှစ်အတွက် အမျိုးသာစာပေတစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆုများအတွက် ဆုချီးမြှင့်ခြင်းအခမ်းအနားကို မြန်မာသက္ကရာဇ် ၁၃၈၁ ခုနှစ် နတ်တော်လဆန်း(၁)ရက်နေ့တွင် ကျရောက်မည့် စာဆိုတော်နေ့ အထိမ်းအမှတ်အဖြစ် နိုဝင်ဘာ ၂၇ ရက် နံနက် ၉ နာရီတွင် ရန်ကုန်မြို့ ဆူးလေဘုရားလမ်းရှိ Sule Changri-la ဟိုတယ်၌ ကျင်းပမည်ဖြစ်ပြီး အမျိုးသားစာပေတစ်သက်တာဆု (၂)ဆု၊ အမျိုး သားစာပေဆု (၁၀)ဆု၊ စာပေဗိမာန်စာမူဆု(၂၄)ဆုတို့ကို ချီးမြှင့်သွားမည်ဖြစ်ကြောင်း သိရသည်။

(သတင်းစဉ်)