ဖောင်းပြင်       ၂၈       နိုဝင်ဘာ 

စစ်ကိုင်းတိုင်းဒေသကြီး မော်လိုက်ခရိုင် ဖောင်းပြင်မြို့နယ် အမှတ်(၈၇)အခြေခံပညာ မူလတန်း(လွန်) ကျောင်းဝင်း အတွင်း အမျိုးသားသဘာဝဘေးအန္တရာယ်စီမံခန့်ခွဲမှုရန်ပုံငွေ ကျပ် (၁၇၆ ဒသမ ၅)သန်းဖြင့် နိုင်မြန်မာထွန်း ကုမ္ပဏီမှ တာဝန်ယူတည်ဆောက်နေသည့် အလျားပေ (၁၃၀) အနံပေ(၃၀)ရှိ School Shelter တည်ဆောက်နေမှုတို့အား နိုဝင်ဘာ ၂၇ ရက် နံနက်ပိုင်းက စစ်ကိုင်းတိုင်းဒေသကြီးအစိုးရဖွဲ့ လူမှုရေးဝန်ကြီး ဒေါက်တာဇော်ဝင်း ဦးဆောင်သည့် တိုင်းဒေသကြီး လွှတ်တော်ကိုယ်စားလှယ်များ တိုင်းအဆင့်ဌာနဆိုင်ရာအကြီးအကဲများ ခရိုင်အထွေထွေ အုပ်ချုပ်ရေး ဦးစီးဌာန ခရိုင်အုပ်ချုပ်ရေးမှူး ဦးညီညီလွင်နှင့်  မြို့နယ်အဆင့် တာဝန်ရှိသူများက ကွင်းဆင်း ကြည့်ရှု စစ်ဆေးခဲ့ပြီး အဆောက်အဦး အရည်အသွေးပြည့်မီရေး သတ်မှတ်ကာလ အတွင်း လုပ်ငန်းများ ပြီးစီးရေးနှင့် လုပ်ငန်းခွင်အန္တရာယ် ကင်းရှင်းရေးတို့ကို အလေးထားဆောင် ရွက်ကြရန် လမ်းညွှန်မှာကြားခဲ့ကြောင်း သိရသည်။

ယင်းနောက် စစ်ကိုင်းတိုင်းဒေသကြီးအစိုးရအဖွဲ့ လူမှုရေးဝန်ကြီးဦးဆောင်သည့် အဖွဲ့သည် ဖောင်းပြင် မြို့နယ် ပြည်သူ့ဆေးရုံ၌ ဝက်သက်-ဂျိုက်သိုးကာကွယ်ဆေး အပိုဆောင်းထိုးနှံပေးနေမှု များနှင့် ဆေးကုသခံယူ နေသူများအား လှည့်လည်ကြည့်ရှု၍ အားပေးစကားပြောကြားခဲ့ပြီး ကျန်းမာရေး ဝန်ထမ်းအိမ်ယာ တည်ဆောက်မည့် မြေနေရာများအား လိုက်လံကြည့်ရှုခဲ့ပြီး လိုအပ်သည်များအား လမ်းညွှန်မှာကြားခဲ့ကြောင်း သိရသည်။

မော်လိုက်သားလေး