နေပြည်တော် ၄ ဒီဇင်ဘာ
ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဟန်ဇော်သည် ယနေ့နံနက်ပိုင်းတွင် မိတ္ထီလာ- တောင်ကြီး -ကျိုင်းတုံ-တာချီလိတ် လမ်းပေါ်ရှိ တာကော်-မိုင်းပျဉ်း-ကျိုင်းတုံ လမ်းအပိုင်း၌ ကတ္တရာလမ်း ဆောင်ရွက်ထားမှု၊ ကျောက်စီမြေထိန်းနံရံနှင့် ရေမြောင်းများ ဆောင်ရွက်ထားရှိမှု၊ ယာဉ်အန္တရာယ် ကင်းရှင်းရေးအတွက် Guard Rail များ ဆောင်ရွက်ထားရှိမှုတို့ကို လမ်းတစ်လျှောက် ကြည့်ရှုစစ်ဆေးပြီး အတက်အဆင်း မတ်စောက်သည့် တောင်ကြောဖြစ်သည့်အတွက် လိုအပ်သည့် နေရာများတွင် လမ်းချဲ့ပေးရန် တာဝန်ရှိသူများကို မှာကြားသည်။
မိတ္ထီလာ-တောင်ကြီး - ကျိုင်းတုံ-တာချီလိတ် လမ်းပေါ်ရှိ တာကော်-မိုင်းပျဉ်း - ကျိုင်းတုံ လမ်းအပိုင်း ၁၇၉ ဒသမ ၀၄ ကီလိုမီတာကို ကတ္တရာကွန်ကရစ် ၄ ဒသမ ၈ ကီလိုမီတာ၊ ကွန်ကရစ်လမ်း ၆ ဒသမ ၃၁ ကီလိုမီတာနှင့် ကတ္တရာလမ်း ၁၆၇ ဒသမ ၉၃ ကီလိုမီတာရှိကြောင်း သိရသည်။
ထို့နောက် ပြည်ထောင်စုဝန်ကြီးသည် ကျိုင်းတုံခရိုင် လမ်းဦးစီးဌာနမှ ဆောင်ရွက်နေသော အရှည် ၄ ဒသမ ၃၆ ကီလိုမီတာရှိ ကျိုင်းတုံမြို့ရှောင်လမ်းကို ကြည့်ရှုစစ်ဆေးပြီး တာဝန်ရှိသူများကို လုပ်ငန်းပိုင်းဆိုင်ရာ လိုအပ်ချက်များ မှာကြားသည်။
အရှည် ၄ ဒသမ ၃၆ ကီလိုမီတာရှိ ကျိုင်းတုံမြို့ရှောင်လမ်းသည် မိတ္ထီလာ-တောင်ကြီး - ကျိုင်းတုံ- တာချီလိတ် လမ်းမကြီးမှ ဖြတ်သန်းမောင်းနှင်လာသော ကုန်တင်ယာဉ်ကြီးများနှင့် ခရီးသည်ယာဉ်များ ဖြတ်သန်းသွားလာရာတွင် မြို့တွင်း၌ မကြာခဏ ယာဉ်ကြောပိတ်ဆို့မှုများ ဖြစ်ပေါ်နေသဖြင့် ဖောက်လုပ် နေခြင်းဖြစ်ကြောင်း သိရသည်။
သတင်းစဉ်
