ကော့ကရိတ်  ၂၀  ဒီဇင်ဘာ

ကရင်ပြည်နယ်၊ ကော့ကရိတ်မြို့ စိုက်ပျိုးရေးဉီးစီးဌာနသည် SemiGreenhouse ဖြင့် ဟင်းသီးဟင်းရွက်များကို စိုက်ပျိုးခြင်း တောင်သူပညာပေး ကွင်းလက်တွေ့ပြသပွဲကို ယမန်နေ့မွန်းလွဲ ၁ နာရီချိန်က ကော့ကရိတ်မြို့ စံပြဥယျာဉ်ခြံ(ထူးဟဲစေးဟဲ)တွင် ကျင်းပပြုလုပ်ကြောင်းသိရသည်။

အခမ်းအနားတွင် ကော့ကရိတ် ခရိုင်အထွေထွေ အုပ်ချုပ်ရေးဉီးစီးဌာန၊ ဒုခရိုင်အုပ်ချုပ်ရေးမှူး ဉီးကိုကိုဉီးက အဖွင့်အမှာစကားပြောကြားပြီး မြို့နယ်စိုက်ပျိုးရေး ဉီးစီးမှူး ဉီးအောင်နိုင်က Semi Greenhouse ဖြင့် စိုက်ပျိုးနည်းပညာများအကြောင်း ဆွေးနွေးပြောကြားသည်။

ယင်းနောက် International Fertilizer Development Center) တာဝန်ခံ ဉီးဟိန်းဝဏ္ဏအောင်မှ ရန်ပုံငွေထောက်ပံ့မှုနှင့် တောင်သူပညာပေးလုပ်ငန်းများကို စိုက်ပျိုးရေးနှင့်ပေါင်းစပ်ဆောင်ရွက်နေမှု အခြေအနေများကို ဆွေးနွေးပြောကြားသည်။ ဆက်လက်၍ တက်ရောက်လာကြသည့် တောင်သူများနှင့်ဌာနဆိုင်ရာ ဝန်ထမ်းများကိုသခွားမွေး၊ ခရမ်းချဉ်၊ ငရုတ်ချိုမျိုးတို့ကို စနစ်တကျကွင်းလက်တွေ့ စိုက်ပျိုးပြသပြီးခြံထွက် သန့်ရှင်းလတ်ဆက်သော ဟင်းသီးဟင်းရွက်များကို မျှဝေပေးခဲ့သည်။

အဆိုပါတောင်သူ ပညာပေးကွင်းလက်တွေ့ ပြသပွဲသို့ခရိုင်မြို့နယ် အဆင့်ဌာနဆိုင်ရာအကြီး အကဲများခြံတာဝန်ခံနှင့် စိုက်ပျိုးရေးဝန်ထမ်းများ၊ အံကောင်၊ သရက်တော၊ ရွာတန်းရှည်၊ ရေကျော်ကြီး၊ လိုင်ဝ၊ ရန်ကုတ်ကျေးရွာတို့နှင့် အမှတ် ၄ ရပ်ကွက်တို့မှ ဟင်းသီးဟင်းရွက် စိုက်ပျိုးတောင်သူများ တက်ရောက်ကြကြောင်း သိရှိရသည်။

ခင်မျိုးဝင်း(ကော့ကရိတ်ပြန်ဆက်)