လှိုင်းဘွဲ ၂၆ ဒီဇင်ဘာ
ကရင်နှစ် ၂၇၅၉ ခုနှစ် ပြာသိုလဆန်း ၁ ရက်တွင် ကျရောက်သည့် ကရင်နှစ်သစ်ကူးပွဲတော်ကို ကရင်ပြည်နယ် လှိုင်းဘွဲမြို့ အ.ထ.ကကျောင်း၌ ယနေ့ နံနက် ၆ နာရီက စည်ကားသိုက်မြိုက်စွာ ကျင်းပခဲ့သည်။
အခမ်းအနားတွင် နိုင်ငံတော်အလံ အလေးပြုခြင်း၊ ကရင်အမျိုးသားအလံတော်ကို ကရင်အမျိုးသား သီချင်းဖြင့် လွှင့်ထူအလေးပြု၍ အခမ်းအနားကို ဖွင့်လှစ်ခဲ့သည်။ ထို့နောက် နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ထံမှပေးပို့သော ကရင်နှစ်သစ်ကူးနေ့သဝဏ်လွှာကို အမျိုးသား လွှတ်တော်ကိုယ်စားလှယ် ဦးစောချစ်ဦး ကလည်းကောင်း၊ ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့်ထံမှ ပေးပို့သော ကရင်နှစ်သစ်ကူးနေ့ သဝဏ်လွှာကို မြို့နယ်အုပ်ချုပ်ရေးမှူး ဦးမင်းသိန်းတို့က အသီးသီး ဖတ်ကြားခဲ့သည်။
ထို့နောက် ကရင်နှစ်သစ်ကူးနေ့ဖြစ်ပေါ်လာပုံ သမိုင်းကြောင်းကို ပိုးကရင်ဘာသာ၊ စကောကရင်ဘာသာ၊ မြန်မာဘာသာတို့ဖြင့် သက်ဆိုင်ရာ တာဝန်ရှိသူများက ဖတ်ကြားတင်ပြကာ သဘာပတိကြီး ဦးစောအုန်းတင်မှ နံဂုံးချုပ် အမှာစကားပြောကြားပြီး ကရင်အမျိုးသား စည်းလုံးညီညွှတ်ရေးသီချင်း “အောဟု အောဟောင်” သီချင်းဖြင့် သီဆိုဖျော်ဖြေ၍ အခမ်းအနား ပြီးမြောက်ခဲ့သည်။
ခင်စန်းမြင့်(ပြန်/ဆက်)
