ရေစကြို ၁၁ ဇန်နဝါရီ
ပခုက္ကူခရိုင်၊ ရေစကြိုမြို့နယ်တွင် ဗိုလ်ချုပ်ပုံပါပိုက်ဆံများ ထုတ်ဝေသုံးစွဲခြင်းကို ဂုဏ်ပြုသောအားဖြင့် လူသုံးကုန်ပစ္စည်းများကို ဗိုလ်ချုပ်ပုံပါပိုက်ဆံဖြင့် လာရောက်ဝယ်ယူပါက ပစ္စည်းတန်ဖိုး၏ ထက်ဝက်ဈေးနှုန်းဖြင့် ရောင်းချပေးလျက်ရှိသည်ဟု သိရသည်။
ထိုသို့ ရောင်းချပေးခြင်းကို မြန်မာနိုင်ငံရင်ခွင်မဲ့ကလေးငယ်များလျှော့ချရေးနှင့် ကာကွယ်စောင့်ရှောက်ရေး အသင်း(ရေစကြို)တို့မှ ဇန်နဝါရီ ၁၀ရက်နှင့် ၁၁ရက်နေ့ညများတွင် ရေစကြိုမြို့ ရွှေတင့်တယ်ခန်းမရှေ့တွင် ရောင်းချပေးလျက်ရှိသည်ဟု သိရသည်။
“ကျွန်တော်တို့ မြန်မာနိုင်ငံရင်ခွင်မဲ့ကလေးငယ်များလျှော့ချရေးနှင့် ကာကွယ်စောင့်ရှောက်ရေးအသင်း(ရေစကြို)ကနေပြီးတော့ အခုအသစ်ထွက်တဲ့ ဗိုလ်ချုပ်ပုံပါပိုက်ဆံတွေ ထုတ်ဝေသုံးစွဲတာကို ဂုဏ်ပြုတဲ့အနေနဲ့ လူသုံးကုန်ပစ္စည်းတွေဖြစ်တဲ့ ဘက်စုံသုံး ဆပ်ပြာဆီ၊ ဆပ်ပြာမှုန့်၊ ကျောင်းသုံးပစ္စည်းတွေဖြစ်တဲ့ ကွန်ပါဘူးတို့လို ပစ္စည်းတွေကို ဗိုလ်ချုပ်ပုံပါပိုက်ဆံနဲ့လာရောက်ဝယ်ယူရင် ရောင်းချတဲ့ပစ္စည်းတွေရဲ့ ပြင်ပပေါက်ဈေးရဲ့ တစ်ဝက်ဈေးနှုန်းနဲ့ ရောင်းချပေးနေတာဖြစ်ပါတယ်”ဟု မြန်မာနိုင်ငံရင်ခွင်မဲ့ကလေးငယ်များလျှော့ချရေးနှင့် ကာကွယ်စောင့်ရှောက်ရေးအသင်း(ရေစကြို)မှ မြို့နယ်အတွင်းရေးမှူး ကိုကျော်သူသူ က ပြောသည်။
အဆိုပါပစ္စည်းများကို ထက်ဝက်ဈေးဖြင့် ဇန်နဝါရီ ၁၀ ရက်နှင့် ၁၁ ရက်နေ့များတွင် ညနေ ၆ နာရီမှ ၈ နာရီထိ ၂ ရက်တာ ရောင်းချပေးလျက်ရှိပြီး ဗိုလ်ချုပ်ပုံပါ ပိုက်ဆံဖြင့် လာရောက်ဝယ်ယူသူ များပြားလျက်ရှိသည်ဟု သိရသည်။
အိမွန်ဆွေ(ရေစကြို)
