ရန်ကုန် ၁၈ ဇန်နဝါရီ
ရန်ကုန်မြို့တော်ဝန်ဆု တတိယအကြိမ် ပြည်သူ့နီတိ အသိပညာပေးစာမေးပွဲ(ဗဟိုအဆင့်) ရေးဖြေပြိုင်ပွဲကို ရန်ကုန်မြို့ လသာမြို့နယ် အမှတ်(၂) အခြေခံပညာအထက်တန်းကျောင်း၌ ယနေ့ နံနက် ၉ နာရီက ကျင်းပခဲ့ကြောင်း သိရသည်။
ယနေ့ကျင်းပသော (ဗဟိုအဆင့်) ရေးဖြေပြိုင်ပွဲသို့ မြို့နယ်အဆင့် ပြည်သူ့နီတိ အသိပညာပေးစာမေးပွဲများတွင် မူလတန်း၊ အလယ်တန်း၊ အထက်တန်းအဆင့်များမှ ပထမ၊ ဒုတိယ၊ တတိယ ရရှိခဲ့ကြသော ကျောင်းသား/ ကျောင်းသူ စုစုပေါင်း ၃၈၇ ဦးအနက် ၃၇၇ ဦးဝင်ရောက်ဖြေဆိုခဲ့ကြောင်း သိရသည်။ အဆိုပါကျောင်းသားကျောင်းသူများမှ အရည်အချင်းပြည့်မီသော ကျောင်းသားကျောင်းသူများသည် ဇန်နဝါရီ ၂၅ ရက်တွင် ရန်ကုန်မြို့တော်ခန်းမ၌ ကျင်းပမည့် (ဗဟိုအဆင့်) လူတွေ့ နှုတ်ဖြေပြိုင်ပွဲသို့ ဝင်ရောက်ယှဉ်ပြိုင်ရမည်ဖြစ်ကြောင်း သိရသည်။
ဆုများကို (ဗဟိုအဆင့်) ရေးဖြေနှင့် နှုတ်ဖြေပြိုင်ပွဲများမှ ရရှိသော ရမှတ်များအပေါ်မူတည်၍ အတန်းတစ်တန်းလျှင် ပထမ၊ ဒုတိယ၊ တတိယနှင့် အထူးဆု ၁၀ ဆုစီ ရွေးချယ်ချီးမြှင့်မည်ဖြစ်ကြောင်း သိရသည်။ ထို့ပြင် မြိုနယ်အဆင့်တွင် အောင်မြင်ခဲ့ကြသော ကျောင်းသားကျောင်းသူများကိုလည်း ဆုများချီးမြှင့်မည်ဖြစ်ကြောင်း ရန်ကုန်မြို့တော် စည်ပင်သာယာရေးကော်မတီထံမှ သိရသည်။
ထင်ပေါ်ဝင်း(ကမာရွတ်)၊ ဓာတ်ပုံ- ထိန်လင်း
