ရန်ကုန် ၄ ဖေဖော်ဝါရီ

မြန်မာ့မီးရထားအနေဖြင့် ရန်ကုန်မြို့ပတ်ရထားလမ်းပိုင်း အဆင့်မြှင်တင်ခြင်းလုပ်ငန်းများ ဆောင်ရွက်လျက်ရှိရာ လက်ရှိဆောင်ရွက်ဆဲနေရာများတွင် လုပ်ငန်းများပြီးစီးပြီဖြစ်၍ ဆောင်ရွက်ရန်ကျန်ရှိသော နေရာများတွင် ဆက်လက်ဆောင်ရွက်နိုင်ရေးအတွက် ရန်ကုန်မြို့ပတ်ရထားများ၏ အချိန်စာရင်းကို ပြောင်းလဲပြေးဆွဲမည်ဖြစ်ကြောင်း သိရသည်။

“ဒီလ ၈ ရက်နေ့ကစပြီး ရန်ကုန်မြို့ပတ်ရထားတွေရဲ့ အချိန်စာရင်းကို ပြောင်းလဲပြီးပြေးဆွဲမှာ ဖြစ်ပါတယ်။ အဲဒါကြောင့်မို့လို့ နေ့စဉ်သွားလာနေတဲ့ ခရီးသွားပြည်သူတွေသိအောင် အသိပေးခြင်းဖြစ်ပါတယ်။ လက်ရှိက ၁၈၃ ခေါက် ပြေးဆွဲနေပါတယ်။ အချိန်စာရင်းပြောင်းလိုက်ရင် အဲဒီထက်နည်းနည်းလျော့ပြီး ၁၆၈ ခေါက်ပြေးဆွဲပေးမှာပါ” ဟု ရန်ကုန်ဘူတာကြီး၌ ယနေ့ကျင်းပသော စာနယ်ဇင်းရှင်းလင်းပွဲတွင် မြန်မာမီးရထားမန်နေဂျာ (သွားလာရေး/တိုင်း ၇) ဉီးဇော်လွင်က ပြောသည်။

ယခင်က လမ်းပိုင်းအလိုက်ပိတ်၍ အဆင့်မြှင့်တင်ပြုပြင်ခြင်းဆောင်ရွက်သဖြင့် လမ်းပိုင်းအတိုများတွင်သာ အဓိကထားပြေးဆွဲခဲ့ရာမှ ယခုအခါတွင် လက်ဝဲရစ် လက်ယာရစ်မြို့ပတ်စနစ်များ ပြန်လည်ပါဝင်လာမည်ဖြစ်ကြောင်း သိရသည်။

“တညင်းကုန်း Level Crossing ကလည်း ပြီးသွားပြီဖြစ်တဲ့အတွက် ကျွန်တော်တို့ မြို့တစ်ပတ်လုံးပတ်တဲ့စနစ်ကို ပြန်ပြီး ဆောင်ရွက်နိုင်တော့မှာ ဖြစ်ပါတယ်။ မြို့တစ်ပတ်လုံးပတ်တဲ့ရထားက စီမံကိန်းမစတင်ခင်မှာ လက်ယာရစ်က ၁၁ စီးရှိပြီး လက်ဝဲရစ်က ၈ စီး စုစုပေါင်း ၁၉ စီးရှိပါတယ်။ လက်ရှိစီမံကိန်းဆောင်ရွက်ဆဲ ကာလမှာ မြို့ပတ်စနစ်ကို ယာယီရပ်ဆိုင်းထားခဲ့ပြီး ဖေဖော်ဝါရီ ၈ ရက်နေ့ ပြင်ဆင်ပြေးဆွဲမည့်ရထား အချိန်စာရင်းမှာ မြို့တစ်ပတ်လုံးပတ်နိုင်သည့် ရထားများက လက်ယာရစ် ၄ စီးနှင့် လက်ဝဲရစ် ၄ စီး စုစုပေါင်း ၈ စီးဟာ မြို့တစ်ပတ်လုံး ပတ်ပေးနိုင်မှာဖြစ်ပါတယ်” ဟု ဉီးဇော်လွင်က ပြောသည်။

ရန်ကုန်မြို့ပတ်ရထားလမ်းပိုင်း အဆင့်မြှင်တင်ခြင်းလုပ်ငန်းများ ဆောင်ရွက်ရာတွင် နေရာပြောင်းလဲ ဆောင်ရွက်မည်ဖြစ်သောကြောင့် မူလရထားအချိန်စာရင်းနှင့် တစ်ထပ်တည်းကျမည်မဟုတ်ဘဲ အချိန်အနည်းငယ် အပြောင်းအလဲရှိလာမည်ဖြစ်ပြီး သက်ဆိုင်ရာဘူတာများတွင် ရထားရောက်ရှိချိန် ထွက်ခွာချိန်များကို ရထားစီးခရီးသည်များ မြင်သာအောင် ကြေညာပေးထားမည်ဖြစ်ကြောင်း သိရသည်။

လက်ရှိကာလ အဆင့်မြှင့်တင် ပြုပြင်လျက်ရှိသည့် လမ်းပိုင်းများအနေဖြင့် ကြည့်မြင်တိုင်-ဘုရားလမ်း (အပြင်လမ်း)၊ တညင်းကုန်း-မင်္ဂလာဒုံ (အပြင်လမ်း)၊ ပုရွက်ဆိတ်ကုန်း-ရေကူး (အတွင်းလမ်း)တို့ဖြစ်ပြီး လက်ဆက်ပြုပြင် ဆောင်ရွက်မည့်လမ်းပိုင်းများမှာ ကြည့်မြင်တိုင်-ဘုရားလမ်း (အပြင်လမ်း)နှင့် ပုရွက်ဆိတ်ကုန်း-ပုဇွန်တောင် (အပြင်လမ်း)တို့ဖြစ်ကြောင်း သိရသည်။

ရထားအချိန်စာရင်း ပြောင်းလဲပြေးဆွဲမည့်လမ်းပိုင်းများမှာ ရန်ကုန်မြို့ပတ်နှင့် လှော်ကားလမ်းပိုင်းဖြစ်ပြီး တိုးကြောင်ကလေး၊ ရွာသာကြီး၊ ဒဂုံတက္ကသိုလ်၊ အုတ်ဖိုစု၊ အရှေ့ပိုင်းတက္ကသိုလ်လမ်းပိုင်း ဆင်ခြေဖုံးရထားများမှာ အချိန်စာရင်းပြောင်းလဲမှုရှိမည် မဟုတ်ကြောင်း သိရသည်။ ရန်ကုန်မြို့ပတ်ရထာလမ်းမိုင် ၂၉.၅ မိုင် (အစုန်-အဆန် မိုင်ပေါင်း ၆၀ နီးပါး) ရှိသည့်အနက် အဆင့်မြှင်တင်ခြင်းလုပ်ငန်း ဆောင်ရွက်ရန်ကျန် ၁၈. ၈ မိုင် ကျန်ရှိကြောင်း သိရသည်။

စီမံကိန်းဆောင်ရွက်ပြီးစီးပါက မူလက တစ်ရက်လျှင် ခရီးသည်ဉီးရေ ၇၃၀၀၀ စီးနင်းရာမှ ၂၆၀၀၀၀ ခန့်အထိ တိုးတက်လာရန် မျှော်မှန်းထားကြောင်း သိရသည်။ ရထားအမြန်နှုန်းကို လက်ရှိ တစ်နာရီ ၂၅ မိုင်နှုန်းမှ ၃၇ မိုင်နှုန်းအထိ အရှိန်မြှင့်မောင်းနှင်နိုင်ရန်အတွက် ဆောင်ရွက်နေခြင်းဖြစ်ပြီး ရန်ကုန်မြို့တစ်ပတ် ကြာချိန်ကို ၂ နာရီ မိနစ် ၅၀ မှ ၁ နာရီ မိနစ် ၅၀ အထိ အချိန်လျော့ချပြေးဆွဲနိုင်မည်ဖြစ်ကြောင်း သိရသည်။ စီမံကိန်းကာလကို ၂၀၁၆-၂၀၁၇ ဘဏ္ဍာရေးနှစ်မှ ၂၀၂၁-၂၀၂၂ ဘဏ္ဍာရေးနှစ်အထိ မျော်မှန်းထားပြီး ရန်ကုန်မြို့ပတ်ရထားလမ်းပိုင်း အဆင့်မြှင့်တင်ပြုပြင်သည့် လုပ်ငန်းများအားလုံးကို ဇူလိုင်လကုန်ခန့်တွင် အပြီးဆောင်ရွက်သွားနိုင်ရန် ရည်မှန်းချက်ထား ဆောင်ရွက်လျက်ရှိကြောင်း သိရသည်။

ထင်ပေါ်ဝင်း(ကမာရွတ်)၊ ဓာတ်ပုံ - ထိန်လင်း